യുപിഎസ്‌സി സിവില്‍ സര്‍വീസ് പരീക്ഷാ ഫലം പ്രഖ്യാപിച്ചു. രാജസ്ഥാന്‍ സ്വദേശി അനുജ് അഗ്‌നിഹോത്രിക്കാണ് ഒന്നാം റാങ്ക്. ആദ്യ 150 റാങ്കുകളില്‍ അഞ്ച് മലയാളികള്‍ ഇടംപിടിച്ചു. ആര്‍. ശ്രുതി (18), ജെ.എസ്. ശ്രീജ (57), ബി. ഗോപിക (105), അജയ് രാജ് (109), വി.സി. ശ്രീലക്ഷ്മി (133) എന്നിവരാണ് മലയാളികള്‍. രാജേശ്വരി സുവേ രണ്ടാം റാങ്കും അകാന്‍ഷ് ധുല്‍ മൂന്നാം റാങ്കും നേടി. ആകെ 958 പേര്‍ യോഗ്യത നേടി.

ഫലം അറിയാം: upsc.gov.in, upsconline.gov.in

ഓരോരുത്തര്‍ക്കും എത്ര മാര്‍ക്ക് ലഭിച്ചെന്ന് 15 ദിവസത്തിനകം വെബ്‌സൈറ്റില്‍ പ്രസിദ്ധപ്പെടുത്തുമെന്ന് യുപിഎസ്‌സി വാര്‍ത്തക്കുറിപ്പില്‍ അറിയിച്ചു. 2025 ഓഗസ്റ്റിലായിരുന്നു പരീക്ഷ. ഡിസംബര്‍, ഫെബ്രുവരി മാസങ്ങളിലായാണ് പഴ്‌സനാലിറ്റി ടെസ്റ്റ് നടത്തിയത്. രണ്ടുപേരുടെ ഫലം തടഞ്ഞുവച്ചിട്ടുണ്ട്. ഐഎഎസ്, ഐഎഫ്എസ്, ഐപിഎസ്, സെന്‍ട്രല്‍ സര്‍വീസസ് – ഗ്രൂപ്പ് എ – ഗ്രൂപ്പ് ബി എന്നീ പോസ്റ്റുകളിലേക്കാണ് നിയമനം.