ജമ്മു കശ്മീര്‍ സോജില പാസിലെ ഹിമപാതത്തില്‍ മരണം 6 ആയി. വാഹനം മഞ്ഞുവീഴ്ചയില്‍ പെട്ടതിനെ തുടര്‍ന്ന് അഞ്ച് പേരും സംഭവസ്ഥലത്ത് വെച്ചുതന്നെ മരണപ്പെടുകയായിരുന്നു. അഞ്ചോളം ആളുകള്‍ക്ക് പരുക്കേറ്റിട്ടുണ്ട്. ഇവരെ വിദഗ്ദ്ധ ചികിത്സയ്ക്കായി അടുത്തുള്ള ആശുപത്രിയിലേക്ക് മാറ്റിയതായി ഉദ്യോഗസ്ഥന്‍ പറഞ്ഞു. ശ്രീനഗര്‍ – ലേ ദേശീയപാതയില്‍ ഗതാഗത തടസ്സം നേരിടുകയാണ്.

വാഹനങ്ങള്‍ ഇനിയും സ്ഥലത്ത് കുടുങ്ങി കിടക്കുന്നതായാണ് വിവരം. ഇവരെ പുറത്തെത്തിക്കാനുള്ള രക്ഷാപ്രവര്‍ത്തനവും മേഖലയില്‍ നടക്കുകയാണ്. സംസ്ഥാന ദുരന്ത സേനയുടെയും, ബോര്‍ഡര്‍ റോഡ് ഓര്‍ഗനൈസേഷന്റെയും നേതൃത്വത്തിലാണ് രക്ഷാപ്രവര്‍ത്തനം. കാര്‍ഗിലില്‍ നിന്ന് ശ്രീനഗറിലേക്ക് പോയവരാണ് ഹിമ പാതത്തില്‍ അകപ്പെട്ടത്. കനത്ത മഞ്ഞും മോശം കാലാവസ്ഥയും രക്ഷാപ്രവര്‍ത്തനത്തിന് വെല്ലുവിളി ഉയര്‍ത്തുന്നുണ്ട്. കാര്‍ഗില്‍ ജില്ലയിലാണ് സോജിലാ പാസ് സ്ഥിതി ചെയ്യുന്നത്.