അഞ്ചുവയസുകാരന് സഹപാഠിയായ പെണ്കുട്ടിയുടെ ക്രൂരമര്ദനം
ലക്നൗവില് സ്വകാര്യ സ്കൂളില് അഞ്ച് വയസുകാരന് സഹപാഠിയായ പെണ്കുട്ടിയുടെ ക്രൂരമര്ദനം. വൃന്ദാവന് യോജനയിലെ എഎല്എസ് അക്കാദമിയില് ബുധനാഴ്ചയായിരുന്നു സംഭവം. സ്കൂളില് നിന്ന് മടങ്ങിയെത്തിയ കുട്ടിയുടെ മുഖത്തെ നീരും പരിക്കുകളും ശ്രദ്ധയില്പ്പെട്ടതോടെയാണ് വീട്ടുകാര് സംഭവം അറിയുന്നത്. ക്ലാസ് ലീഡറായ പെണ്കുട്ടിയാണ് ക്രൂരമായി മര്ദിച്ചത്. പന്ത്രണ്ട് മിനിറ്റിലധികം തുടര്ച്ചയായുള്ള മര്ദനത്തില് കുട്ടിയുടെ മുഖത്ത് പരിക്കേറ്റതായാണ് വിവരം.
സ്കൂളില് നിന്ന് മടങ്ങിയെത്തിയ കുട്ടിയുടെ മുഖത്തെ നീരും പരിക്കുകളും കാരണം അവശനിലയിലായ കുട്ടിയെ വീട്ടുകാര് ഉടന് തന്നെ ആശുപത്രിയില് എത്തിക്കുകയായിരുന്നു. തുടര്ന്ന് കുട്ടിയുടെ മാതാപിതാക്കള് സ്കൂള് അധികൃതരെ സമീപിച്ച് ക്ലാസ് മുറിയിലെ സിസിടിവി ദൃശ്യങ്ങള് പരിശോധിക്കാന് ആവശ്യപ്പെട്ടു.
സിസിടിവി ദൃശ്യങ്ങളില് ക്ലാസ് ലീഡറായ പെണ്കുട്ടി അഞ്ച് വയസുകാരനെ തുടര്ച്ചയായി അടിക്കുകയും ഇടിക്കുകയും മുടിക്ക് കുത്തിപിടിച്ച് വലിച്ചിഴക്കുന്നതും കാണാം. അദ്ധ്യാപിക ക്ലാസില് ഇല്ലാതിരുന്ന സമയത്താണ് അച്ചടക്കത്തിന്റെ പേരുംപറഞ്ഞ് ഈ ക്രൂരത അരങ്ങേറിയത്. സ്കൂള് അധികൃതരോ മറ്റ് ജീവനക്കാരോ ഇത് തടയാന് ഇടപെട്ടില്ലെന്നാണ് കുടുംബത്തിന്റെ ആരോപണം. ക്ലാസിലെ മറ്റ് രണ്ട് കുട്ടികളെയും ഈ പെണ്കുട്ടി മാറിമാറി മര്ദ്ദിക്കുന്നതും സിസിടിവി ദൃശ്യങ്ങളില് ഉണ്ട്.
സിസിടിവി ദൃശ്യങ്ങള് പുറത്തുവന്നതിന് പിന്നാലെ പ്രതിഷേധവുമായി കൂടുതല് രക്ഷിതാക്കള് രംഗത്തെത്തി. കുറ്റക്കാര്ക്കെതിരെ കര്ശന നടപടി സ്വീകരിക്കണമെന്നും ആവശ്യപ്പെട്ടിരുന്നു. ദൃശ്യങ്ങള് പരിശോധിച്ച ശേഷം മര്ദിച്ച വിദ്യാര്ത്ഥിനിയെ സ്കൂളില് നിന്ന് പുറത്താക്കിയതായി പ്രിന്സിപ്പള് അറിയിച്ചു. ഇത്തരം സംഭവങ്ങള് ഇനി ആവര്ത്തിക്കാതിരിക്കാന് കൃത്യമായ നടപടികള് സ്വീകരിക്കുമെന്നും അധികൃതര് ഉറപ്പുനല്കി.
അതേസമയം, കുട്ടിയുടെ കുടുംബം പൊലീസില് പരാതി നല്കിയിട്ടുണ്ട്. പരാതിയുടെ അടിസ്ഥാനത്തില് പൊലീസ് അന്വേഷണം ആരംഭിച്ചു. സിസിടിവി ദൃശ്യങ്ങള് പൊലീസ് വിശദമായി പരിശോധിച്ച് വരികയാണ്. ക്ലാസ് മുറിയില് കുട്ടികളുടെ മേല്നോട്ടം വഹിക്കുന്നതില് സ്കൂള് ജീവനക്കാരുടെ ഭാഗത്തുനിന്ന് വീഴ്ച സംഭവിച്ചതായി പൊലീസ് വ്യക്തമാക്കി.
https://www.facebook.com/Malayalivartha
