രാഷ്ട്രപതിഭരണത്തിലുള്ള ഉത്തരാഖണ്ഡില്‍ ഹരീഷ് റാവത്ത് സര്‍ക്കാരിനോടു ചൊവ്വാഴ്ച നിയമസഭയില്‍ വിശ്വാസവോട്ട് തേടാന്‍ സുപ്രീം കോടതി നിര്‍ദേശിച്ചു. വിശ്വാസവോട്ടെടുപ്പ് അനുവദിക്കാമെന്നു കേന്ദ്രസര്‍ക്കാര്‍ കോടതിയില്‍ വ്യക്തമാക്കിയതിനേത്തുടര്‍ന്നാണിത്. നടപടികള്‍ സുപ്രീം കോടതിയുടെ മേല്‍നോട്ടത്തിലാകും.
ഒന്‍പതു കോണ്‍ഗ്രസ് വിമത എം.എല്‍.എമാര്‍ പിന്തുണ പിന്‍വലിച്ചതിനു പിന്നാലെ ഹരീഷ് റാവത്ത് സര്‍ക്കാര്‍ നിയമസഭയില്‍ വിശ്വാസവോട്ട് തേടാനിരിക്കെയാണ് കേന്ദ്രസര്‍ക്കാര്‍ രാഷ്ട്രപതിഭരണം ഏര്‍പ്പെടുത്തിയത്. ഇതു ചോദ്യം ചെയ്തുള്ള നിയമപോരാട്ടത്തിനൊടുവിലാണു സുപ്രീം കോടതിയുടെ ഇടപെടല്‍.ചൊവ്വാഴ്ച രാവിലെ 11 മുതല്‍ ഉച്ചയ്ക്ക് ഒന്നുവരെ രാഷ്ട്രപതിഭരണം സസ്‌പെന്‍ഡ് ചെയ്യും. ആ സമയത്തിനുള്ളില്‍ നിയമസഭയിലെ നടപടികള്‍ പൂര്‍ത്തിയാക്കണം. കോടതി ചുമതലപ്പെടുത്തിയ നിരീക്ഷകന്‍ സഭയിലുണ്ടാകും. സുപ്രീം കോടതിയുടെ മേല്‍നോട്ടത്തിലായതിനാല്‍ നടപടിക്രമങ്ങള്‍ വീഡിയോയില്‍ പകര്‍ത്തും. ഇതടക്കമുള്ള രേഖകള്‍ പിറ്റേന്നു മുദ്രവച്ച കവറില്‍ സുപ്രീം കോടതിയില്‍ ഹാജരാക്കണം.
സര്‍ക്കാരിനെ അനുകൂലിക്കുന്നവര്‍ സഭയുടെ ഒരുവശത്തും എതിര്‍ക്കുന്നവര്‍ മറുവശത്തും ഇരിക്കണം. സ്പീക്കര്‍ ആവശ്യപ്പെടുമ്പോള്‍ സര്‍ക്കാരിനെ പിന്തുണയ്ക്കുന്നവര്‍ കൈപൊക്കി വോട്ടെടുപ്പില്‍ പങ്കെടുക്കണം. നിരീക്ഷകന്‍ എണ്ണം തിട്ടപ്പെടുത്തി രേഖപ്പെടുത്തും. വിശ്വാസവോട്ട് അല്ലാതെ ഒരു കാര്യവും ചര്‍ച്ച ചെയ്യാന്‍ അനുമതിയില്ല. സാമാജികര്‍ക്കു സഭയിലെത്താനുള്ള സൗകര്യവും സുരക്ഷയുമൊരുക്കാന്‍ ഉത്തരാഖണ്ഡ് പോലീസ് മേധാവിക്കും ചീഫ് സെക്രട്ടറിക്കും ജസ്റ്റിസുമാരായ ദീപക്മിശ്ര, ശിവകീര്‍ത്തി സിങ് എന്നിവരടങ്ങിയ ബെഞ്ച് നിര്‍ദേശം നല്‍കി. സ്പീക്കര്‍ അയോഗ്യരായി പ്രഖ്യാപിച്ച ഒന്‍പതു കോണ്‍ഗ്രസ് വിമതരെ വോട്ടെടുപ്പില്‍ പങ്കെടുപ്പിക്കുന്നതു സംബന്ധിച്ച് സുപ്രീം കോടതി അഭിപ്രായം പറഞ്ഞില്ല.
വിശ്വാസവോട്ടെടുപ്പിനു കേന്ദ്രസര്‍ക്കാര്‍ അനുകൂലമാണെന്ന് ഇന്നലെ കേസ് പരിഗണിച്ചപ്പോള്‍തന്നെ അറ്റോര്‍ണി ജനറല്‍ മുകള്‍ റോത്തഗി കോടതിയെ അറിയിച്ചു. തുടര്‍ന്നാണു ലജിസ്ലേറ്റീവ് പ്രിന്‍സിപ്പല്‍ സെക്രട്ടറിയെ നിരീക്ഷകനായി നിയോഗിച്ച് വിശ്വാസവോട്ടെടുപ്പ് നടത്താന്‍ ഉത്തരവുണ്ടായത്. നേരത്തേ, സംസ്ഥാനസര്‍ക്കാരിന്റെ ഹര്‍ജി പരിഗണിച്ച ഉത്തരാഖണ്ഡ് ഹൈക്കോടതി വിശ്വാസവോട്ടെടുപ്പിനു നിര്‍ദേശം നല്‍കിയിരുന്നെങ്കിലും കേന്ദ്ര സര്‍ക്കാര്‍ സുപ്രീം കോടതിയില്‍ നിന്നു സ്‌റ്റേ സമ്പാദിക്കുകയായിരുന്നു. അയോഗ്യതയ്‌ക്കെതിരേ കോണ്‍ഗ്രസ് വിമതര്‍ സമര്‍പ്പിച്ച ഹര്‍ജി ഇന്ന് ഉത്തരാഖണ്ഡ് ഹൈക്കോടതി പരിഗണിക്കും. ഉത്തരവ് അനുകൂലമാകുന്നപക്ഷം ഇവര്‍ക്കു വോട്ടെടുപ്പില്‍ പങ്കെടുക്കാന്‍ കഴിയും.

എഴുപതംഗ നിയമസഭയില്‍ കോണ്‍ഗ്രസിനു 36 അംഗങ്ങളാണുണ്ടായിരുന്നത്. പ്രോഗ്രസീവ് ഡെമോക്രാറ്റിക് ഫ്രണ്ടിന്റെ ആറ് എം.എല്‍.എമാരുടെ പിന്തുണയും സര്‍ക്കാരിനുണ്ട്. ഒമ്പതു വിമതര്‍ മറുകണ്ടം ചാടിയതോടെ കോണ്‍ഗ്രസിന്റെ അംഗബലം 27 ആയി കുറഞ്ഞു. ബി.ജെ.പിക്ക് 27 അംഗങ്ങളാണു സ്വന്തമായുള്ളത്. വിശ്വാസവോട്ടെടുപ്പില്‍ മൂന്നു സ്വതന്ത്രരും രണ്ടു ബി.എസ്.പി. അംഗങ്ങളും ഉള്‍പ്പെടെ അഞ്ച് അംഗങ്ങളുടെ നിലപാട് നിര്‍ണായകമാകും.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha