ഭാവിയില്‍ ഇന്ത്യയുടെ മാപ്പ് തെറ്റിച്ചാല്‍ കടുത്ത ശിക്ഷ നേരിടേണ്ടി വന്നേക്കും. ഇന്ത്യയെ തെറ്റായി ചിത്രീകരിക്കുന്ന സംഭവങ്ങള്‍ വര്‍ദ്ധിച്ചു വരുന്ന സാഹചര്യത്തില്‍ ഇത്തരം നടപടികള്‍ക്കെതിരേ വന്‍തുക പിഴയും ദീര്‍ഘകാല തടവും ലഭിക്കുന്ന നിയമം കൊണ്ടുവരികയാണ് കേന്ദ്രസര്‍ക്കാര്‍. പിഴ 10 ലക്ഷം മുതല്‍ 100 കോടി വരെയാകാമെന്നും ഏഴ് വര്‍ഷം വരെ തടവുമാണ് ഇപ്പോള്‍ ആലോചിക്കുന്നത്.
മാപ്പ് സംബന്ധിച്ച വരയ്ക്കലും, പ്രചരിപ്പിക്കലും പ്രസിദ്ധീകരിക്കലും ചെയ്യുന്നതിന് മുമ്പായി ബന്ധപ്പെട്ട വകുപ്പില്‍ നിന്നും അനുമതി നിര്‍ബ്ബന്ധിതമാക്കും. അന്താരാഷ്ട്ര അതിരുകള്‍ തെറ്റിച്ച് വരയ്ക്കുക, വിവരങ്ങള്‍ തെറ്റായി രേഖപ്പെടുത്തുക തുടങ്ങിയ കാര്യങ്ങള്‍ ഏത് മാധ്യമത്തില്‍ നിര്‍മ്മിച്ചാലും പ്രചരിപ്പിച്ചാലും പ്രസിദ്ധീകരിച്ചാലും അത് ഒരു കോടി രൂപ മുതല്‍ 100 കോടി രൂപ വരെ പിഴയ്ക്കും ഏഴ് വര്‍ഷത്തിന് മുകളില്‍ തടവിന് ശിക്ഷിക്കപ്പെടാനും കാരണമാകുമെന്ന് കരട് ബില്ലില്‍ പറഞ്ഞിട്ടുണ്ട്.
ജമ്മുവും കശ്മീരും പാകിസ്താന്റെ ഭാഗങ്ങളാക്കിയും അരുണാചല്‍പ്രദേശ് ചൈനയുടെ ഭാഗമാക്കിയും ചില മാപ്പുകള്‍ സാമൂഹ്യസൈറ്റുകളില്‍ പ്രത്യക്ഷപ്പെട്ടത് ശ്രദ്ധയില്‍ പെട്ടതിനെ തുടര്‍ന്നാണ് നിയമം കൊണ്ടുവരാന്‍ ആലോചിക്കുന്നത്. അടുത്തിടെ കശ്മീര്‍ ചൈനയിലും ജമ്മു പാകിസ്താനിലുമായി ചിത്രീകരിച്ച മാപ്പ് ട്വിറ്ററിലും പ്രത്യക്ഷപ്പെട്ടിരുന്നു. ഇത് വലിയ പ്രതിഷേധത്തിന് വഴി വെയ്ക്കുകയും സര്‍ക്കാര്‍ പിന്നീട് തിരുത്തുകയും ചെയ്തിരുന്നു.
ഇന്ത്യയുമായി ബന്ധപ്പെട്ട സ്ഥല വിവരങ്ങള്‍ ചമയ്ക്കുകയോ പ്രചരിപ്പിക്കുകയോ പ്രസിദ്ധീകരിക്കുകയോ ആരു ചെയ്താലും അതിന് ബന്ധപ്പെട്ട വകുപ്പില്‍ നിന്നും ലൈസന്‍സ് നേടേണ്ടി വരും. നിയമം നടപ്പിലായാല്‍ ഗൂഗിള്‍ പോലെയുള്ള ഓണ്‍ലൈന്‍ പഌറ്റ്‌ഫോമിന് പോലും ഇന്ത്യയിലെ ഗൂഗിള്‍ മാപ്പും ഗൂഗിള്‍ എര്‍ത്തും നടത്താന്‍ ലൈസന്‍സിന് അപേക്ഷിക്കേണ്ടതായി വരും.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha