ഉത്തരാഖണ്ഡില്‍ കോണ്‍ഗ്രസ് സര്‍ക്കാര്‍ വിശ്വാസ വോട്ട് നേടിയെന്നു സുപ്രീം കോടതി പ്രഖ്യാപിച്ചതിനു പിന്നാലെ കേന്ദ്രമന്ത്രിസഭ ചേര്‍ന്നു രാഷ്ട്രപതി ഭരണം പിന്‍വലിക്കാന്‍ തീരുമാനിച്ചു. രാത്രി ഒന്‍പതോടെ ഇതുസംബന്ധിച്ച വിജ്ഞാപന മിറങ്ങി. ഇന്നലെ രാവിലെ തന്നെ രാഷ്ട്രപതിഭരണം പിന്‍വലിക്കാന്‍ തയ്യാറാണെന്നു കേന്ദ്രം സുപ്രീംകോടതിയെ അറിയിച്ചിരുന്നു. 
ഉത്തരാഖണ്ഡില്‍ വീണ്ടും കോണ്‍ഗ്രസ് മന്ത്രിസഭ സത്യപ്രതിജ്ഞ ചെയ്ത് അധികാരമേല്‍ക്കുമെന്ന് എഐസിസി നേതൃത്വവും മുന്‍ മുഖ്യമന്ത്രി ഹരീഷ് റാവത്തും വ്യക്തമാക്കി. റാവത്തും ഇതര നേതാക്കളും ഇന്നുതന്നെ ഡല്‍ഹിയിലെത്തി കോണ്‍ഗ്രസ് പ്രസിഡന്റ് സോണിയ ഗാന്ധിയെ കണ്ടു ചര്‍ച്ച നടത്തിയേക്കും. റാവത്ത് തന്നെയാകും പുതിയ മുഖ്യമന്ത്രിയാകുക എന്നാണു സൂചന. 
ജനാധിപത്യത്തിന്റെ വിജയമാണ് ഉത്തരാഖണ്ഡിലേതെന്ന് കോണ്‍ഗ്രസ് ഉപാധ്യക്ഷന്‍ രാഹുല്‍ ഗാന്ധിയും ഹരീഷ് റാവത്തും പറഞ്ഞു. ചൊവ്വാഴ്ച നടന്ന വിശ്വാസ വോട്ടെടുപ്പിന്റെ വിശദാംശങ്ങള്‍ പരിശോധിച്ച ശേഷമാണു ഹരീഷ് റാവത്ത് സര്‍ക്കാര്‍ വിശ്വാസ വോട്ട് നേടിയതായി ഇന്നലെ സുപ്രീംകോടതി വ്യക്തമാക്കിയത്. വിശ്വാസ വോട്ട് നടപടികള്‍ നിരീക്ഷിക്കാന്‍ കോടതി നിയോഗിച്ച നിരീക്ഷകന്റെയും സ്പീക്കറുടെയും റിപ്പോര്‍ട്ടുകള്‍ കോടതി അംഗീകരിച്ചു. വോട്ടെടുപ്പിന്റെ വീഡിയോ ദൃശ്യങ്ങളും കോടതി പരിശോധനയ്ക്കു വിധേയമാക്കി. ഇതിനു ശേഷമാണ് ഹരീഷ് റാവത്ത് വിശ്വാസ വോട്ടു നേടിയെന്നു കോടതി ഉത്തരവിട്ടത്.

ഉത്തരാഖണ്ഡിലെ രാഷ്ട്രപതി ഭരണം പിന്‍വലിക്കാന്‍ തയാറാണെന്നു കോടതി നടപടികള്‍ തുടങ്ങിയപ്പോള്‍തന്നെ കേന്ദ്രസര്‍ക്കാര്‍ വ്യക്തമാക്കിയിരുന്നു. അറ്റോര്‍ണി ജനറല്‍ മുകുള്‍ റോഹ്ത്തഗിയാണു കേന്ദ്രത്തിന്റെ നിലപാട് അറിയിച്ചത്. വലിയ രാഷ്ട്രീയ തിരിച്ചടിയുണ്ടായ സാഹചര്യത്തില്‍ കൂടുതല്‍ സമ്മര്‍ദങ്ങളിലേക്കു നീങ്ങേണ്ടതില്ലെന്നു നരേന്ദ്ര മോദി സര്‍ക്കാര്‍ തീരുമാനിക്കുകയായിരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha