ക്രിമിനില്‍ അപകീര്‍ത്തി നിയമം ഭരണഘടനാവിരുദ്ധമല്ലെന്ന് സുപ്രീംകോടതി വിധി. മാനനഷ്ടക്കേസുകള്‍ സംബന്ധിച്ച ഇന്ത്യന്‍ കുറ്റകൃത്യനിയമത്തിലെ വകുപ്പുകളുടെ ഭരണഘടനാസാധുത സുപ്രീം കോടതി ശരിവച്ചു.

ജസ്റ്റിസുമാരായ ദീപക് മിശ്രയും പ്രഫുല്ല സി. പന്തും അടങ്ങുന്ന ബെഞ്ചിന്റെതാണു നടപടി. മറ്റൊരാളുടെ വ്യക്തിസ്വാതന്ത്ര്യത്തിനുമേല്‍ കടന്നുകയറ്റം പാടില്ലെന്നും അഭിപ്രായസ്വാതന്ത്ര്യം അനിയന്ത്രിത സ്വാതന്ത്ര്യമല്ലെന്നും കോടതി ചൂണ്ടിക്കാട്ടി. മാനനഷ്ടക്കേസുകളില്‍ ക്രിമിനല്‍ നടപടി റദ്ദാക്കണമെന്നാവശ്യപ്പെട്ട് കോണ്‍ഗ്രസ് ഉപാധ്യക്ഷന്‍ രാഹുല്‍ ഗാന്ധി, ആംആദ്മി പാര്‍ട്ടി നേതാവ് അരവിന്ദ് കെജ്‌രിവാള്‍, ബി.ജെ.പിയുടെ രാജ്യസഭാംഗം സുബ്രഹ്മണ്യം സ്വാമി തുടങ്ങിയവര്‍ സമര്‍പ്പിച്ച ഹര്‍ജികള്‍ തള്ളിയാണ് രണ്ടംഗ ബെഞ്ചിന്റെ ഉത്തരവ്. 
അഭിപ്രായസ്വാതന്ത്ര്യം പരിഗണിക്കുമ്പോള്‍ വ്യക്തിസ്വാതന്ത്ര്യം പരിഗണിക്കാതിരിക്കാനാവില്ലെന്നു ബെഞ്ച് നിരീക്ഷിച്ചു. മാനനഷ്ടത്തിന് രണ്ടുവര്‍ഷംവരെ തടവ് ആകാമെന്ന ഐ.പി.സി 499, 500 വകുപ്പുകള്‍ പ്രകാരമാണ് കോടതിയുടെ നടപടി. ഈ വകുപ്പുകള്‍ ഭരണഘടനാ വിരുദ്ധമാണെന്നും റദ്ദാക്കണമെന്നുമായിരുന്നു ഹര്‍ജിക്കാരുടെ വാദം. അപകീര്‍ത്തിക്കേസുകള്‍ ക്രിമിനല്‍ നടപടി ക്രമത്തില്‍നിന്ന് ഒഴിവാക്കണമെന്നും ഇത് അഭിപ്രായസ്വാതന്ത്ര്യത്തെ ഹനിക്കുമെന്നും എഡിറ്റേഴ്‌സ് ഗില്‍ഡ് ഓഫ് ഇന്ത്യയും നിരവധി മാധ്യമസ്ഥാപനങ്ങളും സംഘടനകളും ഉന്നയിച്ചിരുന്നു.
എന്നാല്‍, ക്രിമിനല്‍ അപകീര്‍ത്തി നിയമം ഭരണഘടനാവിരുദ്ധമല്ലെന്നും ഇന്ത്യന്‍ കുറ്റകൃത്യം നിയമ (ഐ.പി.സി) പ്രകാരം അതു കുറ്റമായി തുടരുമെന്നും കോടതി വ്യക്തമാക്കി.

അഭിപ്രായസ്വാതന്ത്ര്യത്തിനുള്ള അവകാശം മറ്റുള്ളവര്‍ക്കു ഭരണഘടന നല്‍കുന്ന അവകാശങ്ങള്‍ക്കുമേലുള്ള കടന്നുകയറ്റമാകരുതെന്നു വ്യക്തമാക്കിയ ബെഞ്ച്, കോടതികളില്‍ നിലവിലുള്ള ഇത്തരം കേസുകളില്‍ വാദം തുടരാനും നിര്‍ദേശം നല്‍കി. ജീവിക്കാനുള്ള അവകാശം ഉറപ്പുവരുത്തുന്ന ഭരണഘടനയുടെ 21ാം വകുപ്പില്‍ പ്രശസ്തിക്കുള്ള അവകാശം കൂടി ഉള്‍പ്പെടുന്നതാണ്. ഐ.പി.സിയിലെ 499, 500 വകുപ്പുകള്‍ റദ്ദാക്കണമെന്ന ഹര്‍ജിക്കാരുടെ ആവശ്യത്തെ കേന്ദ്രസര്‍ക്കാരും ചില സംസ്ഥാനങ്ങളും ശക്തമായി എതിര്‍ത്തു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha