കാശ്മീരില്‍ വന്‍ ജനകീയ പ്രക്ഷോഭങ്ങള്‍ക്കും പൊലീസ് വെടിവയ്പ്പിനും കാരണമായ സ്‌കൂള്‍ വിദ്യാര്‍ത്ഥിനിയുടെ മാനഭംഗത്തില്‍ പുതിയ വഴിത്തിരിവ്. തന്നെ മാനഭംഗപ്പെടുത്തിയത് സൈനികര്‍ തന്നെയാണെന്നും എന്നാല്‍ പ്രദേശവാസിയായ യുവാവില്‍ സംഭവം ആരോപിക്കാന്‍ പൊലീസ് നിര്‍ബന്ധിക്കുകയായിരുന്നു എന്നും പെണ്‍കുട്ടി വെളിപ്പെടുത്തി.

അതേ സമയം പെണ്‍കുട്ടിയുടേതെന്ന പേരില്‍ നേരത്തെ പുറത്തിറങ്ങിയ വീഡിയോയിലെയും പ്രാദേശിക കോടതിയില്‍ നല്‍കിയ മൊഴിയെയും ഖണ്ഡിക്കുന്നതാണ് ഇപ്പോഴത്തെ വെളിപ്പെടുത്തല്‍.

പെണ്‍കുട്ടിയെ സൈനികന്‍ ഉപദ്രവിക്കാന്‍ ശ്രമിച്ചുവെന്ന് ആരോപിച്ച് കാശ്മീരിലെ ഹന്ദ്‌വാരാ മേഖലയില്‍ നടന്ന പ്രതിഷേധത്തിനു നേരെ സുരക്ഷാ സേന നടത്തിയ വെടിവയ്പ്പില്‍ അഞ്ച് പേര്‍ മരിച്ചിരുന്നു.

പെണ്‍കുട്ടിയുടെ പേരിലിറങ്ങിയ ഒരു വീഡിയോ ദൃശ്യത്തില്‍ തന്നെ ഉപദ്രവിച്ചത് സൈനികരല്ലെന്നും പ്രദേശവാസിയായ ഒരു യുവാവാണെന്നും പെണ്‍കുട്ടി അവകാശപ്പെട്ടിരുന്നു. തുടര്‍ന്ന് ഹന്ദ്‌വാരയിലെ മജിസ്‌ട്രേറ്റിന് മുന്നില്‍ നല്‍കിയ മൊഴിയിലും പെണ്‍കുട്ടി ഇതേ വാദമാണ് നിരത്തിയിരുന്നത്.

തന്നെക്കൊണ്ട് നിര്‍ബന്ധിച്ചാണ് വീഡിയോ എടുത്തതെന്നും പുറത്ത് വിടില്ലെന്ന് ഉറപ്പ് നല്‍കിയതായും പെണ്‍കുട്ടി പറയുന്നു. മജിസ്‌ട്രേറ്റിന് മുന്നില്‍ നല്‍കിയ മൊഴിയും പൊലീസ് നിര്‍ബന്ധിച്ച് തയ്യാറാക്കിയതാണെന്നും പെണ്‍കുട്ടി കൂട്ടിച്ചേര്‍ത്തു. സംഭവത്തിന് ശേഷം ആദ്യമായി മാധ്യമങ്ങള്‍ക്ക് മുന്നിലെത്തിയപ്പോഴാണ് പെണ്‍കുട്ടി ഇക്കാര്യം വെളിപ്പെടുത്തിയത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha