മരിച്ചെന്നു ഡോക്ടര്‍ പറഞ്ഞ നവജാത ശിശുവിനു സംസ്‌കാര ചടങ്ങിനിടെ ജീവനുണ്ടെന്നു കണ്ടെത്തി. ഉടനെ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല. ജനിച്ച ഉടന്‍ ലഭിക്കേണ്ട പരിചരണങ്ങള്‍ ലഭിക്കാത്തതിനാലാണ് കുഞ്ഞ് മരിച്ചത്.

കര്‍ണാടകയിലെ ചിക്കമഗളൂരു ഭദ്രാവതി സര്‍ക്കാര്‍ ആശുപത്രിയിലാണു സംഭവം. ചിക്കമഗളൂരു തല്ലിക്കട്ടെയിലെ സോണി ബായി, വെള്ളിയാഴ്ച ആശുപത്രിയില്‍ ശസ്ത്രക്രിയയിലൂടെ ആണ്‍കുഞ്ഞിനു ജന്മം നല്‍കിയിരുന്നു. എന്നാല്‍ പുറത്തെടുക്കുമ്പോഴേക്കും കുഞ്ഞു മരിച്ചതായി ശസ്ത്രക്രിയ നടത്തിയ ഗൈനക്കോളജിസ്റ്റ് ഡോ. മഞ്ചുനാഥ് കുഞ്ഞിന്റെ അച്ഛന്‍ ചന്ദ്രനായികിനെ അറിയിച്ചു. ആശുപത്രി ജീവനക്കാര്‍ കുഞ്ഞിനെ വെളുത്ത തുണിയില്‍ പൊതിഞ്ഞു കെട്ടി പിതാവായ ചന്ദ്രനായികിനു കൈമാറുകയും ചെയ്തു.

ജഡം വീട്ടിലെത്തിച്ച് സംസ്‌കരിക്കാനായി കുഴിയില്‍ ഇറക്കി വെച്ചപ്പോഴാണ് ഹൃദയത്തിന്റെ ഭാഗത്തു നേരിയ ചലനമുള്ളതായി സംശയം തോന്നിയത്. പരിശോധിച്ചപ്പോള്‍ ഹൃദയം മിടിക്കുന്നതായി വ്യക്തമായി. ഉടനെ തിരികെ ആശുപത്രിയില്‍ എത്തിക്കുകയും ചെയ്തു. പക്ഷേ ജനിച്ച ഉടന്‍ ലഭിക്കേണ്ട പരിചരണങ്ങള്‍ ലഭിക്കാത്തതിനാല്‍ അവശനിലയിലായ കുട്ടി പിന്നീടു മരിക്കുകയായിരുന്നു.

സംഭവം വിവാദമായതോടെ കുഞ്ഞ് മരിച്ചെന്നു വിധിയെഴുതിയ ഡോക്ടറെ നിര്‍ബന്ധിത അവധിയില്‍ പ്രവേശിപ്പിച്ചു. ഇതു സംബന്ധിച്ചു വിശദമായ അന്വേഷണം നടത്തി കൂടുതല്‍ നടപടികള്‍ സ്വീകരിക്കുമെന്ന് ആരോഗ്യ വകുപ്പ് അറിയിച്ചു.