പഞ്ചാബിലെ പത്താന്‍കോട്ട് വ്യോമസേനാ താവളത്തിലെ ഭീകരാക്രമണത്തില്‍ പാക്കിസ്ഥാന്റെ പങ്കുവ്യക്തമാക്കുന്ന കൂടുതല്‍ തെളിവുകള്‍ യുഎസ് ഇന്ത്യയ്ക്കു കൈമാറി. ഭീകരസംഘടനയായ ജയ്‌ഷെ മുഹമ്മദ് തലവന്‍ മസൂദ് അസ്ഹറിനെ പ്രതിചേര്‍ത്ത് കുറ്റപത്രം സമര്‍പ്പിക്കുന്ന കാര്യം എന്‍ഐഎ പരിഗണിക്കുന്നതിനിടെയാണ് പുതിയ തെളിവുകള്‍ യുഎസ് നല്‍കുന്നത്. ആക്രമണം പാക്കിസ്ഥാനിലാണ് ഉത്ഭവിച്ചതെന്നു സ്ഥിരീകരിക്കുന്ന തെളിവുകളാണിത്.
ജനുവരി ഒന്നിനായിരുന്നു പത്താന്‍കോട്ട് ആക്രമണം നടന്നത്. ഇതിന്റെ സൂത്രധാരകരെന്നു വിശ്വസിക്കപ്പെടുന്നവരുടെ ഫെയ്‌സ്ബുക് അക്കൗണ്ടുകളുടെ ഐപി വിലാസങ്ങള്‍ പാക്കിസ്ഥാനിലേതാണ്. ജയ്‌ഷെ മുഹമ്മദിനു സാമ്പത്തിക സഹായം നല്‍കുന്ന അല്‍ റഹ്മത് ട്രസ്റ്റിന്റെ വെബ്‌സൈറ്റിന്റെ ഐപി വിലാസവും പാക്കിസ്ഥാനിലേതാണ്. ജയ്ഷിന്റെ നേതാവ് കാഷിഫ് ജാന്റെ സുഹൃത്തുക്കളാണ് ഫെയ്‌സ്ബുക് അക്കൗണ്ട് ഉപയോഗിച്ചത്. ഇവര്‍ക്കും ജിഹാദി ബന്ധമുണ്ട്. കൊല്ലപ്പെട്ട നാലു ഭീകരരുടെ ചിത്രങ്ങളും ഇവരുടെ പക്കലുണ്ടായിരുന്നു.
ആക്രമണസമയത്ത് അല്‍ റഹ്മത് ട്രസ്റ്റിന്റെ വെബ്‌പേജ്, റാംഗൊനൂര്‍ ഡോട്ട് കോം (ൃമിഴീിീീൃ.രീാ), അല്‍കാലംഓണ്‍ലൈന്‍ ഡോട്ട് കോം (മഹൂമഹമാീിഹശില.രീാ) എന്നീ വെബ്‌സൈറ്റുകളിലാണ് അപ്‌ലോഡ് ചെയ്തത്. താരിഖ് സിദ്ദിഖീ എന്ന ഇമെയില്‍ ആണ് ഈ രണ്ടു വെബ്‌സൈറ്റുകളും കൈകാര്യം ചെയ്യുന്നത്.വിലാസമായി നല്‍കിയിരിക്കുന്നതു കറാച്ചിയിലെ സ്ഥലവും. ഈ എല്ലാ വെബ്‌സൈറ്റുകളും ഐപി വിലാസങ്ങളും പാക്കിസ്ഥാനില്‍ നിന്നുള്ളതാണെന്നും ഈ വെബ്‌സൈറ്റുകളിലെ അപ്‌ഡേഷനുകള്‍ പത്താന്‍കോട്ട് ആക്രമണത്തിന്റെ സമയത്തായിരുന്നെന്നും യുഎസ് സ്ഥിരീകരിച്ചു.