വേശ്യവൃത്തിയെ പരമ്പരാഗത ആചാരമായി സ്വീകരിച്ചിരിക്കുന്ന സമൂഹത്തില്‍ നിന്നും വിവാഹ ജീവിതത്തിലേക്ക് പ്രവേശിച്ച യുവതിയും ഭര്‍ത്താവും സുരക്ഷ ആവശ്യപ്പെട്ട് പോലീസിന് മുന്നിലേക്ക്. തങ്ങളുടെ പ്രണയം പൂവണിയിക്കാന്‍ തന്റെ സമൂഹം സമ്മതിക്കുന്നില്ലെന്നും വിവാഹത്തിന് പോലീസ് സംരക്ഷണം ആവശ്യമാണെന്നും കാണിച്ച് രംഗത്ത് വന്നിരിക്കുന്നത് വേശ്യാവൃത്തി നൂറ്റാണ്ടുകളായി ആചാരമായി കരുതുന്ന വാഡിയ ഗ്രാമത്തില്‍ നിന്നുള്ള യുവതിയാണ്.
മൃഗാശുപത്രിയില്‍ ജോലി ചെയ്യുന്ന സവര്‍ണ്ണ വിഭാഗത്തില്‍ പെട്ട യുവാവുമായി ഇവര്‍ കഴിഞ്ഞ ദിവസം ഒളിച്ചോടുകയും റജിസ്റ്റര്‍ വിവാഹം ചെയ്യുകയുമുണ്ടായി. എന്നാല്‍ സമുദായത്തിന്റെ പാരമ്പര്യത്തെ ധിക്കരിച്ചു എന്ന കാരണത്താല്‍ ഇവരെ വേട്ടയാടാന്‍ സമുദായാംഗങ്ങളായ ഗ്രാമീണര്‍ രംഗത്ത് വന്നതാണ് ഭീഷണിയായിരിക്കുന്നത്. പ്രശ്‌നത്തില്‍ പോലീസും ചില ജീവകാരുണ്യ സംഘടനകളും ഇടപെട്ടിട്ടുണ്ട്. തങ്ങളുടെ പ്രണയം പൂവണിയാന്‍ ഗ്രാമീണര്‍ സമ്മതിക്കുന്നില്ലെന്നും ഇവരില്‍ നിന്നും സംരക്ഷണം വേണമെന്നുമാണ് ദമ്പതികളുടെ ആവശ്യം.
വേശ്യാവൃത്തി തങ്ങളുടെ പരമ്പരാഗത ആചാരമായി കരുതുന്ന വാഡിയ ഗ്രാമത്തില്‍ 13 ാം വയസ്സില്‍ തന്നെ പെണ്‍കുട്ടികള്‍ വേശ്യവൃത്തിയിലേക്ക് നയിക്കപ്പെടുന്നുണ്ട്്. ഒരിക്കല്‍ പെട്ടുപോയിക്കഴിഞ്ഞല്‍ മോചനമില്ലാത്ത വേശ്യാവൃത്തിയില്‍ കഥയിലെ നായികയായ 24 കാരിയോട് നിരന്തരം തന്നെ സന്ദര്‍ശിക്കാന്‍ വന്നിരുന്ന ഉയര്‍ന്ന സമുദായത്തിലെ 25 കാരന് പ്രണയം തോന്നുകയായിരുന്നു. ഒട്ടേറെ ആലോചനയ്ക്ക് ശേഷം ഇയാള്‍ പ്രണയം തുറന്നു പറഞ്ഞു. ആറു മാസം വേണ്ടി വന്നു ഇക്കാര്യം പെണ്‍കുട്ടിയെ കൃത്യമായി ബോദ്ധ്യപ്പെടുത്താന്‍. തുടര്‍ന്ന് യുവതി തന്റെ മാതാപിതാക്കളെ അറിയിക്കുകയും അവരുടെ സമ്മതം വാങ്ങുകയും ചെയ്തു.
ഇക്കാര്യം ഗ്രാമീണര്‍ അറിയുകയും അവര്‍ ഇതിനെതിരേ രംഗത്ത് വരികയുമായിരുന്നു. ആചാരം ഒരാളെങ്കിലും തെറ്റിക്കുന്നത് മറ്റുള്ളവര്‍ക്കും ഇങ്ങിനെ ചെയ്യാന്‍ പ്രേരണയാകുമോ എന്ന് ഭയന്ന ഇവര്‍ യുവാവും യുവതിയും ഒന്നിക്കുന്നതിനെതിരേ രംഗത്ത് വരികയായിരുന്നു. രാജസ്ഥാനിലെ ഒരു ധനാഡ്യന്‍ സ്വീകരിക്കുമെന്ന് പറഞ്ഞ ഇവര്‍ പ്രലോഭനം തുടങ്ങിയതോടെ യുവതിയും യുവാവും ഒളിച്ചോടുകയും ആഗസ്റ്റ് 26 ന് വിവാഹം കഴിക്കുകയുമായിരുന്നു. ഇപ്പോള്‍ ഇവരുടെ വിഷയത്തില്‍ വാഡിയ ഗ്രാമണരെ ഇത്തരം ദുരാചാരങ്ങളില്‍ നിന്നും രക്ഷിച്ച് സാധാരണ മനുഷ്യരാക്കി മാറ്റാന്‍ തുനിഞ്ഞിറങ്ങിയിരിക്കുന്ന വിചാര്‍ത്താ സമുദായ് സമാര്‍ത്തന്‍ മഞ്ച് പോലെയുള്ള സംഘടന ഇടപെട്ടിരിക്കുകയാണ്. പഴയജീവിതത്തില്‍ നിന്നും രക്ഷപ്പെടാന്‍ ആഗ്രഹിക്കുന്നവര്‍ക്ക് എല്ലാവിധ പിന്തുണയും നല്‍കുമെന്ന് സംഘടന പറയുന്നു.
ദമ്പതികള്‍ ആവശ്യപ്പെട്ടാല്‍ ആവശ്യമായ എല്ലാ സുരക്ഷയും നല്‍കുമെന്നും നിയമപരമായി പരാതി നല്‍കിയാല്‍ നടപടിയെടുക്കുമെന്ന് പോലീസും പറഞ്ഞിട്ടുണ്ട്. ഈ സമുദായത്തില്‍ നിന്നുള്ള യുവതിയെ സ്വീകരിക്കുന്ന കാര്യത്തില്‍ യുവാവ് പറയുന്നത് ഇങ്ങിനെയാണ്. താന്‍ ഒരു സാമൂഹ്യസേവനം ചെയ്യുകയല്ല. ഒളിച്ചോടാന്‍ തീരുമാനം എടുത്തതിന് പിന്നില്‍ യുവതിയോടുള്ള പ്രണയം മാത്രമാണ്. അത് അവളുടെ തെറ്റല്ല എന്നതിനാല്‍ പഴയ ജീവിതത്തെക്കുറിച്ച് ഓര്‍ത്ത് വേവലാതിപെടുന്നില്ല. പുതിയ ജീവിതം തുടങ്ങാനാണ് ഉദ്ദേശിക്കുന്നത്. വിവാഹദിനം സ്വപ്നം സത്യമായ പോലെയാണ് തോന്നിയത്. ഇപ്പോഴും വിശ്വസിക്കാനായിട്ടില്ല. കുട്ടിയും കുടുംബവുമൊക്കെയുള്ള സാധാരണ ജീവിതം നയിക്കാമെന്ന് വിശ്വസിച്ചിരുന്നില്ല. എന്നാല്‍ അദ്ദേഹം തനിക്ക് ശക്തി തരികയായിരുന്നു എന്നാണ് യുവതി പറയുന്നത്.