ശബരിമലയിലെ സ്ത്രീ പ്രവേശനത്തെ എതിര്‍ത്തുകൊണ്ട് കൊണ്ട് പാരമ്പര്യ വാദികളായ ഒരു കൂട്ടം വനിതകള്‍ 'റെഡി ടു വെയ്റ്റ്' എന്ന ഹാഷ് ടാഗുമായി രംഗത്ത്. മഹാരാഷ്ട്രയിലെ ഹാജി അലി ദര്‍ഗ്ഗയില്‍ തൃപ്തി ദേശായിയുടെ നേതൃത്വത്തില്‍ സ്ത്രീകള്‍ പ്രവേശിച്ചതിന്റെ തുടര്‍ച്ചയായാണ് ഈ നവ മാധ്യമ കാമ്പെയ്ന്‍.

ശബരിമലയല്ല ഇപ്പോള്‍ പ്രാധാന്യം കൊടുക്കേണ്ട പ്രധാന വിഷയമെന്നാണ് റെഡി ടു വെയ്റ്റ് എന്ന ഈ ഹാഷ് ടാഗ് ക്യാംപെയിന്റെ ഭാഗമായ സ്ത്രീകള്‍ പറയുന്നത്. സൗമ്യ, ജിഷ, തൊഴിലന്വേഷിച്ച് കേരളത്തിലെത്തി മാനഭംഗത്തിന് ഇരയാവുകയും ചെയ്യുന്ന ബംഗ്ലാദേശി പെണ്‍കുട്ടികള്‍, ആദിവാസി ഊരുകളിലെ അവിവാഹിതരായവര്‍ എന്നിവരുടെ പ്രശ്‌നങ്ങളാണ് ആദ്യം പരിഹരിക്കപ്പെടേണ്ടത് എന്നാണ് ഇവരുടെ വാദം. ഒപ്പം തീരുമാനമെടുക്കാനുള്ള സ്വാതന്ത്ര്യം സ്ത്രീകള്‍ക്കാണെന്നും പറയുന്നു.

തങ്ങള്‍ ശബരിമലയില്‍ പ്രവേശിക്കാന്‍ വിശ്വാസ പ്രകാരമുള്ള പ്രായം വരെ കാത്തിരിക്കാന്‍ തയ്യാറാണ് എന്ന പ്രസ്താവനയോടെയാണ് സ്ത്രീകള്‍ രംഗത്ത് എത്തിയിരിക്കുന്നത്. സ്ത്രീ സുരക്ഷയും ആദിവാസി അവഗണനയും എല്ലാം പരിഹരിക്കപ്പെടാതെ കിടക്കുന്ന ഒരു രാജ്യത്ത് ഇത്തരത്തിലുള്ള കപട പ്രക്ഷോഭങ്ങള്‍ അനാവശ്യമാണെന്നാണ് പുരോഗമന വാദികളോട് ഇവര്‍ക്ക് പറയാനുള്ളത്.

പാരമ്പര്യവാദങ്ങളും വിശ്വാസങ്ങളും നിരീശ്വരവാദികള്‍ക്കുള്ളതല്ല, വിശ്വാസികള്‍ക്കുള്ളതാണ്. വിശ്വാസങ്ങള്‍ ഓരോരുത്തരുടേയും ജീവിതത്തിന്റെയും സംസ്‌കാരത്തിന്റയും ഭാഗമാണ്. അതിനെ മാറ്റാനോ അട്ടിമറിക്കാനോ ഉള്ള ശ്രമങ്ങള്‍ക്ക് കൂട്ട് നില്‍ക്കില്ല. കാമ്പെയ്‌നിങിനെ പിന്തുണയ്ക്കുന്ന മഞ്ജു പണിക്കര്‍ പറയുന്നു.

റെഡി ടു വെയ്റ്റ് കാമ്പെയ്‌നിങിന്റെ ഭാഗമായി സോഷ്യല്‍ മീഡിയ ഇന്നലെ ചൂട് പിടിച്ച വാദ പ്രതിവാദങ്ങളുടെ വേദിയായി മാറി. ഈ മുന്നേറ്റത്തെ പരിഹസിച്ചു കൊണ്ട് ട്രോളന്മാരും രംഗത്ത് എത്തിയിട്ടുണ്ട്.