കേന്ദ്ര സര്‍ക്കാര്‍ അഴിമതി ആരോപണവുമായും, കൈക്കൂലികേസുകളുമായും നിരന്തരമായി വേട്ടയാടുന്നുണ്ടെങ്കിലും ആം ആദ്മി പാര്‍ട്ടിക്കു യാതൊരു കൂസലുമില്ലെന്നു തെളിയിച്ചിരിക്കുകയാണ് അരവിന്ദ് കെജ്രിവാള്‍. രാഷ്ട്രീയത്തില്‍ സംശുദ്ധിയുടെ കാര്യത്തില്‍ വിട്ടുവീഴ്ച്ചയ്ക്ക് മുഖ്യമന്ത്രി അരവിന്ദ് കെജ്രിവാള്‍ തയ്യാറല്ല. മന്ത്രിസഭയിലെ മന്ത്രിക്കെതിരെ ലൈംഗിക ആരോപണം ഉയര്‍ന്നതിന് പിന്നാലെ അദ്ദേഹത്തെ പുറത്താക്കി കൊണ്ടാണ് ആം ആദ്മി സര്‍ക്കാര്‍ സര്‍ക്കാര്‍ നടപടി കൈക്കൊണ്ടത്.

രണ്ടു സ്ത്രീകള്‍ക്കൊപ്പമുള്ള അശ്ലീല ദൃശ്യങ്ങളടങ്ങിയ സിഡി ലഭിച്ചതിനെ തുടര്‍ന്ന് സാമൂഹിക ക്ഷേമവകുപ്പുമന്ത്രി സന്ദീപ് കുമാറിനെയാണ് ഡല്‍ഹി നിയമസഭയില്‍നിന്നു അരവിന്ദ് കെജ്രിവാള്‍ പുറത്താക്കിയത്. അപകീര്‍ത്തിപരമായ സിഡി ലഭിച്ചുവെന്നും അതിന്റെ അടിസ്ഥാനത്തില്‍ സന്ദീപിനെ പുറത്താക്കുന്നുവെന്നും മുഖ്യമന്ത്രി അരവിന്ദ് കേജ്രിവാള്‍ ട്വിറ്ററില്‍ കുറിച്ചു. കെജ്രിവാള്‍ ട്വിറ്ററില്‍ ഈ വിവരം കുറിക്കുമ്പോളാണ് ഈ വിവാദത്തെ കുറിച്ച് ലോകം അറിയുന്നതും.

മുതിര്‍ന്ന 'ആപ്' നേതാക്കളുടെ യോഗത്തിലാണ് മന്ത്രിയെ പുറത്താക്കാന്‍ തീരുമാനമെടുത്തത്. വിവാഹിതാനായ സന്ദീപ് കുമാര്‍ മറ്റ് രണ്ട് സ്ത്രീകള്‍ക്കൊപ്പമുള്ള ചിത്രങ്ങളും വീഡിയോകളും അടങ്ങുന്ന സിഡിയാണ് പുറത്തുവന്നത്. മുഖ്യമന്ത്രി കെജ്രിവാളിന് ഒരു അജ്ഞാതനാണ് പരാതിയുള്ള കത്ത് സഹിതം വീഡിയോ നല്‍കിയത്. ഇക്കാര്യം പരിശോധിച്ച ശേഷമാണ് വിഷയം കൂടുതല്‍ നാറ്റിക്കാതെ കെജ്രിവാള്‍ കൈകാര്യം ചെയ്തത്.

ആദര്‍ശങ്ങള്‍ നിറഞ്ഞ പാര്‍ട്ടിയാണ് എഎപി. അഴിമതി, അപകീര്‍ത്തി എന്നിവയില്‍ ഒരു വിട്ടുവീഴ്ചയും നടത്തില്ല. കൈക്കൂലി വാങ്ങുന്നതായി കണ്ടെത്തിയ മന്ത്രിമാരെ ഉടന്‍ തന്നെ പുറത്താക്കിയിട്ടുണ്ട്. സന്ദീപിനെതിരെ വ്യക്തമായ തെളിവുകള്‍ ലഭിച്ചിട്ടുണ്ടെന്നും കേജ്രിവാള്‍ ട്വിറ്ററില്‍ വ്യക്തമാക്കി. സുല്‍ത്താന്‍പൂരിലെ മജ്റ മണ്ഡലത്തില്‍നിന്നുള്ള എംഎല്‍എയായ സന്ദീപ് കേജ്രിവാള്‍ മന്ത്രിസഭയിലെ ഏറ്റവും പ്രായം കുറഞ്ഞ മന്ത്രിയായിരുന്നു.

ഡല്‍ഹി മന്ത്രിസഭയിലെ പ്രധാനപ്പെട്ട ദളിത് മുഖം കൂടിയായിരുന്നു 35 കാരനായ സന്ദീപ് കുമാര്‍. സാമൂഹ്യ ക്ഷേമത്തിന് പുറമെ വനിതാ ശിശുക്ഷേപമ വകുപ്പിന്റെയും ചുമതല സന്ദീപ് കുമാറിനായിരുന്നു. നിയമമന്ത്രിയായിരുന്ന ജിതേന്ദ്ര സിങ്, ഭക്ഷ്യമന്ത്രിയായിരുന്ന അഹ്മദ് ഖാന്‍ എന്നിവര്‍ക്ക് ശേഷം ഒന്നര വര്‍ഷത്തിനിടെ 'ആപ്' മന്ത്രിസഭയില്‍നിന്ന് പുറത്താക്കപ്പെടുന്ന മൂന്നാമത്തെ മന്ത്രിയാണ് സന്ദീപ്കുമാര്‍. കഴിഞ്ഞ ഒക്ടോബറില്‍ കൈക്കൂലി ആവശ്യപ്പെടുന്നത് പിടിക്കപ്പെട്ടതിനെ തുടര്‍ന്ന് ഭക്ഷ്യപരിസ്ഥിതി മന്ത്രിയായിരുന്ന ആസിം അഹമദ് ഖാനെ കെജ്രിവാള്‍ പുറത്താക്കിയിരുന്നു. ഡല്‍ഹി ഉപമുഖ്യമന്ത്രി മനീഷ് സിസോദിയ എന്നല്ല തന്റെ മകനായാല്‍ പോലും കളങ്കിതരെ വച്ചുപൊറുപ്പിക്കില്ലെന്ന് അന്ന് കെജ്രിവാള്‍ പറയുകയും ചെയ്തിരുന്നു.