കോണ്‍ഗ്രസ് ഉപാധ്യക്ഷന്‍ രാഹുല്‍ഗാന്ധിയുടെ കര്‍ഷകരെ കയ്യിലെടുക്കാനുള്ള പുതു തന്ത്രം. 'കട്ടില്‍ സഭ' (ഘാട്ട് സഭ) എന്നുവിളിക്കുന്ന ചര്‍ച്ചകള്‍ നടത്തിക്കൊണ്ടാണ് യുപിയിലെ പ്രചരണ പരിപാടിക്ക് രാഹുലും കോണ്‍ഗ്രസും തുടക്കമിടുന്നത്. പക്ഷേ പ്രഖ്യാപിച്ചതിനു പിന്നാലെതന്നെ മോദിയുടെ 'ചായ്‌പേ ചര്‍ച്ച' എന്ന ആശയത്തിനോട് കിടപിടിക്കാന്‍ രാഹുലിന്റെ 'കട്ടില്‍ ചര്‍ച്ച'യ്ക്ക് കഴിയുമോ എന്ന ചോദ്യമാണ് സോഷ്യല്‍ മീഡിയയിലും വിവിധ മാദ്ധ്യമങ്ങളിലും ഉയരുന്നത്.
യുപിയില്‍ ഇന്നുമുതല്‍ പ്രചാരണം നടത്തുന്ന രാഹുല്‍ ഗാന്ധി കിഴക്കന്‍ യുപിയിലെ ദിയോരിയയില്‍ നിന്നാണ് പര്യടനം തുടങ്ങുന്നത്. സംസ്ഥാനത്ത് പാര്‍ട്ടിയെ ശക്തിപ്പെടുത്താനും പുനരുജ്ജീവിപ്പിക്കാനും ലക്ഷ്യമിട്ടും കര്‍ഷകരെ കൂടെനിര്‍ത്താനുദ്ദേശിച്ചും 2500 കിലോമീറ്ററിന്റെ കിസാന്‍ യാത്രയാണ് രാഹുല്‍ നടത്തുന്നത്. ഇതിന്റെ ഭാഗമായാണ് കട്ടില്‍ സഭകള്‍ നടത്തുക. ദിയോറിയയിലെ വേദിയില്‍ ഇതിനായി 2000 കട്ടിലുകളാണ് സജ്ജീകരിച്ചിട്ടുള്ളത്. കര്‍ഷകരെ കയ്യിലെടുക്കുകയെന്ന ലക്ഷ്യത്തോടെയാണ് അവര്‍ക്കിഷ്ടമുള്ള ഘാട്ട് സഭകളുടെ മാതൃകയില്‍ സദസ്സ് സജ്ജീകരിച്ചിട്ടുള്ളത്.
യുപിയില്‍ കര്‍ഷകരും ഗ്രാമമുഖ്യന്മാരുമെല്ലാം സായാഹ്നങ്ങളില്‍ ഇത്തരത്തില്‍ കട്ടിലുകള്‍ ഗ്രാമത്തിലൊരിടത്ത് കൂട്ടിയിട്ട് വട്ടംകൂടിയിരുന്ന് വെടിവട്ടം നടത്തുന്നതിന്റെ മാതൃകയുള്‍ക്കൊണ്ടാണ് പുതിയ പ്രചാരണ തന്ത്രം.
പക്ഷേ, ചായക്കടക്കാരന്റെ മകനായിരുന്ന മോദി നമോ ചായക്കട തുടങ്ങിയതിന് പകരമാകുമോ കര്‍ഷകനൊന്നുമല്ലാത്ത രാഹുല്‍ കര്‍ഷകനായി നടിച്ച് കൈക്കൊള്ളുന്ന കട്ടില്‍ സഭ തന്ത്രമെന്ന ചോദ്യമാണ് ബിജെപിക്കാരും മറ്റ് എതിര്‍കക്ഷികളും ഉയര്‍ത്തുന്നത്.
ഏതായാലും രാഹുലിന്റെ തന്ത്രം യുപിയില്‍ വിജയിക്കുമെന്ന പ്രതീക്ഷയിലാണ് ദിയോറിയ രുദ്രാപൂരിലെ മൈതാനത്ത്് 2,000 ഘാട്ടുകള്‍ ഒരുക്കി കോണ്‍ഗ്രസ് കിസാന്‍ യാത്രയുടെ തുടക്കം ഉജ്ജ്വലമാക്കുന്നത്. ഉത്തര്‍പ്രദേശിലെ അണികളെയും കര്‍ഷകരെയുമെല്ലാം ഉത്സാഹ ഭരിതരാക്കാനും 27 വര്‍ഷത്തിന് ശേഷം സംസ്ഥാനത്ത് മികച്ച തിരിച്ചുവരവ് നടത്താനും കോണ്‍ഗ്രസിനെ സഹായിക്കുമെന്ന വിലയിരുത്തലിലാണ് പാര്‍ട്ടി നേതൃത്വം. കര്‍ഷകരുമായി വഴിയരികില്‍ നേരിട്ട് കൂടിക്കാഴ്ച നടത്തുന്നത് ഉള്‍പ്പെടെ ദിയോരിയയില്‍ നിന്നും ആരംഭിക്കുന്ന കിസാന്‍ യാത്രയില്‍ രാഹുല്‍ ലക്ഷ്യമിടുന്നുണ്ട്.
ഇന്ന് തുടങ്ങി ഏകദേശം ഒരു മാസം കൊണ്ട് പൂര്‍ത്തിയാകുന്ന യാത്ര അടുത്ത വര്‍ഷം തെരഞ്ഞെടുപ്പ് നടക്കുന്ന 403 നിയോജക മണ്ഡലങ്ങളിലെ 223 എണ്ണത്തിലൂടെ കടന്നുപോകും. യാത്രയ്ക്കിടയില്‍ പല ഗ്രാമങ്ങളിലും വിശ്രമിച്ച് രാഹുല്‍ കട്ടില്‍ ചര്‍ച്ചകള്‍ നടത്തും. കര്‍ഷകരുടെയും ജനങ്ങളുടെയും പ്രശ്‌നങ്ങള്‍ നേരിട്ടറിയാന്‍ ഉദ്ദേശിച്ചാണ് യാത്ര. ഇതിനൊപ്പം കര്‍ഷകരില്‍ നിന്ന് നിവേദനങ്ങളും സ്വീകരിക്കും.
ഓരോ സ്ഥലത്തേയും പ്രാദേശിക കോണ്‍ഗ്രസ് നേതാക്കള്‍ യാത്രയില്‍ രാഹുലിനെ അനുഗമിക്കും.