ഇനി എഫ്‌ഐആറും ഓണ്‍ലൈനില്‍. പൊലീസ് കേസ് രജിസ്റ്റര്‍ ചെയ്താല്‍ 24 മണിക്കൂറിനകം വെബ്‌സൈറ്റില്‍ അപ്‌ലോഡ് ചെയ്യണമെന്നു സുപ്രീം കോടതി. യൂത്ത് ലോയേഴ്‌സ് അസോസിയേഷന്‍ നല്‍കിയ പൊതുതാല്‍പര്യ ഹര്‍ജിയിലാണ് കോടതിയുടെ ഉത്തരവ്. ജസ്റ്റിസുമാരായ ദീപക് മിശ്രയും സി. നാഗപ്പനും അടങ്ങുന്ന ഡിവിഷന്‍ ബെഞ്ചാണ് നിര്‍ണായകമായ ഉത്തരവ് പുറപ്പെടുവിച്ചത്. കേന്ദ്രഭരണപ്രദേശങ്ങള്‍ക്കും എല്ലാ സംസ്ഥാനങ്ങള്‍ക്കും ഉത്തരവ് ബാധകമാണ്.
ഉള്‍പ്രദേശങ്ങളില്‍ ഉള്ള പൊലീസ് സ്‌റ്റേഷനുകളില്‍ ഈ സമയപരിധി 72 മണിക്കൂര്‍ വരെയാകാം. എന്നാല്‍ സ്ത്രീകള്‍ക്കും കുട്ടികള്‍ക്കും എതിരായ ലൈംഗിക അതിക്രമം, നുഴഞ്ഞുകയറ്റം പോലെ രാജ്യസുരക്ഷയെ ബാധിക്കുന്ന സംഭവങ്ങള്‍ തുടങ്ങിയ കേസുകളില്‍ എഫ്‌ഐആര്‍ അപ്ലോഡ് ചെയ്യണമെന്ന് നിര്‍ബന്ധമില്ല. എഫ്‌ഐആര്‍ വെബ്‌സൈറ്റില്‍ അപ്ലോഡ് ചെയ്തില്ലെന്ന കാരണത്താല്‍ കേസുകള്‍ കോടതിയിലെത്തുമ്പോള്‍ പ്രതികള്‍ക്ക് യാതൊരു ആനുകൂല്യവും ലഭിക്കില്ലെന്നും കോടതി വ്യക്തമാക്കി.
മുന്‍കൂര്‍ ജാമ്യം ഉള്‍പ്പെടെയുള്ള കാര്യങ്ങളിലും ഇത് പരിഗണിക്കില്ല. 48 മണിക്കൂറിനുള്ളില്‍ എഫ്‌ഐആര്‍ അപ്ലോഡ് ചെയ്യുന്ന കാര്യമാണ് പരിഗണിച്ചതെങ്കിലും ഒടുവില്‍ 24 മണിക്കൂറായി നിശ്ചയിക്കുകയായിരുന്നു.
ഡല്‍ഹി ഹൈക്കോടതി ഉത്തരവിന്റെ ചുവട് പിടിച്ചാണ് യൂത്ത് ലോയേഴ്‌സ് അസോസിയേഷന്‍ ഹര്‍ജിയുമായി സുപ്രീംകോടതിയെ സമീപിച്ചത്. നഗരത്തിലെ പൊലീസ് സ്‌റ്റേഷനുകളില്‍ എഫ്‌ഐആര്‍ രജിസ്റ്റര്‍ ചെയ്താല്‍ 24 മണിക്കൂറിനുള്ളില്‍ വെബ്‌സൈറ്റില്‍ അപ്ലോഡ് ചെയ്യണമന്നായിരുന്നു ഡല്‍ഹി ഹൈക്കോടതിയുടെ വിധി.