ഇന്ത്യയുടെ പുതിയ കാലാവസ്ഥാ നിരീക്ഷണ ഉപഗ്രഹമായ ഇന്‍സാറ്റ് 3 ഡിആറിന്റെ വിക്ഷേപണം വിജയം. ആന്ധ്രപ്രദേശ് ശ്രീഹരിക്കോട്ടയിലെ സതീഷ് ധവാന്‍ സ്‌പേസ് സെന്ററിലെ രണ്ടാംവിക്ഷേപണത്തറയില്‍ നിന്ന് ജിഎസ്എല്‍വി എഫ്05 റോക്കറ്റിലാണ് ഉപഗ്രഹം വിക്ഷേപിച്ചത്. വൈകിട്ട് 4.50 ന് കുതിച്ചുയര്‍ന്ന ജിഎസ്എല്‍വി റോക്കറ്റ് ഉപഗ്രഹത്തെ ബഹിരാകാശത്ത് എത്തിച്ചു. പിന്നീട് ഉപഗ്രഹത്തിനൊപ്പമുള്ള പ്രൊപ്പലന്റാണ് ഭൂസ്ഥിര ഭ്രമണപഥത്തില്‍ ഉപഗ്രഹത്തെ സുരക്ഷിതമായി സ്ഥാപിച്ചത്.
നേരത്തെ നിശ്ചയിച്ചതിലും 40 മിനിറ്റ് വൈകിയാണ് വിക്ഷേപണം നടന്നത്. വിക്ഷേപണം വിജയകരമായെന്ന വിവരം 5.15 ഓടെ ട്വിറ്ററും ഫെയ്‌സ്ബുക്കും വഴി ഐഎസ്ആര്‍ഒ അറിയിച്ചു. ഉപഗ്രഹ നിര്‍മാണ, വിക്ഷേപണ രംഗത്ത് ഇന്ത്യയുടെ ശക്തി ഉറപ്പിക്കുന്നതാണ് ഈ വിക്ഷേപണ വിജയമെന്ന് ഐഎസ്ആര്‍ഒ കേന്ദ്രങ്ങള്‍ പറഞ്ഞു. 'ചന്ദ്രയാന്‍രണ്ട്' അടക്കമുള്ള പദ്ധതികള്‍ക്ക് ജിഎസ്എല്‍വി റോക്കറ്റുകളെയാണ് ഐഎസ്ആര്‍ഒ ആശ്രയിക്കുന്നത്. 415 ടണ്‍ ആണ് റോക്കറ്റിന്റെ ഭാരം.
കാലാവസ്ഥ, സമുദ്ര, അന്തരീക്ഷ പഠനത്തില്‍ വിപ്ലവകരമായ മാറ്റങ്ങളുണ്ടാക്കാന്‍ വിക്ഷേപണം സഹായിക്കുമെന്ന് ഐ.എസ്.ആര്‍.ഒ അറിയിച്ചു. വിവരങ്ങള്‍ ശേഖരിക്കുന്നതിലെ കൃത്യതയാണ് ഇന്‍സാറ്റ്3ഡിആറിനെ മറ്റ് കാലാവസ്ഥാ ഉപഗ്രഹങ്ങളില്‍നിന്ന് വ്യത്യസ്തമാക്കുന്നത്. കാലാവസ്ഥാ നിരീക്ഷണത്തിന് പുറമെ അന്തരീക്ഷത്തിന്റെ താപനില, സാന്ദ്രത, മേഘങ്ങള്‍, ഓസോണ്‍ പാളിയിലുണ്ടാകുന്ന മാറ്റങ്ങള്‍ എന്നിവ നിരീക്ഷിക്കാന്‍ ഉപഗ്രഹം സഹായിക്കും.
2,211 കിലോഗ്രാമാണ് ഉപഗ്രഹത്തിന്റെ ഭാരം. ഇതില്‍ 1,225 കിലോഗ്രാം ഇന്ധനമാണ്. ഭാരം കൂടുതലുള്ളതു കൊണ്ടാണ് പി.എസ്.എല്‍.വിയെ ഒഴിവാക്കി ജി.എസ്.എല്‍.വി റോക്കറ്റ് വിക്ഷേപണത്തിന് ഉപയോഗിച്ചത്. രണ്ടു മുതല്‍ രണ്ടര ടണ്‍ വരെ ഭാരമുള്ള ഉപഗ്രഹങ്ങള്‍ ഭ്രമണപഥത്തിലെത്തിക്കാന്‍ ജി.എസ്.എല്‍.വി റോക്കറ്റിന് ശേഷിയുണ്ട്. 400 കോടി രൂപയാണ് മൊത്തം ചെലവ്.
അതേ സമയം ചൈനയുടെ ഉപഗ്രഹവിക്ഷേപണം പരാജയപ്പെട്ടു. ഗാഫെന്‍ ഉപഗ്രഹവുമായി പറന്നുയര്‍ന്ന മാര്‍ച് ഫോര്‍ സി റോക്കറ്റിന് ഉപഗ്രഹത്തെ ഭ്രമണപഥത്തിലേക്ക് കൈമാറാന്‍ സാധിച്ചില്ല. ഏറ്റവും പുതിയ സാങ്കേതിക വിദ്യയില്‍ നിര്‍മ്മിച്ചതാണീ ഉപഗ്രഹം.