ആണ്‍കുഞ്ഞിന് വേണ്ടി പൂജകളും വഴിപാടുകളും നടത്തി. എന്നാല്‍ ജനിച്ചത് പെണ്‍കുഞ്ഞ്. ആണ്‍കുഞ്ഞിനെ ലഭിക്കാത്തതില്‍ ദേഷ്യംപൂണ്ട യുവതി നാലുമാസം പ്രായമുള്ള കുഞ്ഞിനെ കഴുത്തറുത്ത് കൊന്നു. ഉപയോഗശൂന്യമായ എസിക്കുള്ളില്‍ കുഞ്ഞിനെ ഒളിപ്പിക്കുകയും ചെയ്തു. ജയ്പൂരിലാണ് മനുഷ്യമനസ്സാക്ഷിയെ ഞെട്ടിക്കുന്ന സംഭവം നടന്നത്.

കുഞ്ഞിനെ കാണാനില്ലെന്ന് 32കാരിയായ നേഹാ ഗോയല്‍ തന്നെ പോലീസില്‍ പരാതി നല്‍കി. പരാതിയുടെ അടിസ്ഥാനത്തില്‍ നടത്തിയ തെരച്ചിലില്‍ കുട്ടിയുടെ മൃതദേഹം കണ്ടെത്തി. പോലീസ് നടത്തിയ അന്വേഷണത്തിലാണ് നേഹ തന്നെയാണ് കുഞ്ഞിനെ കൊന്നതെന്ന് പൊലീസ് മനസിലാക്കിയത്.

കറിക്കത്തി ഉപയോഗിച്ച് കഴുത്തറുത്താണ് നേഹ സ്വന്തം മകള്‍ മഹികയെ കൊലപ്പെടുത്തിയത്. കൂടാതെ പതിനേഴു കുത്തുകളാണ് ആ കുഞ്ഞ് ശരീരത്തില്‍ ഉണ്ടായിരുന്നത്. കുഞ്ഞിന്റെ ദേഹത്ത് പുരണ്ട നേഹയുടെ രക്തമാണ് അവര്‍ക്ക് വിനയായത്. വീട്ടിലുള്ളവര്‍ തന്നെയാണ് കൊലയ്ക്ക് പിന്നിലെന്ന് സൂചന ലഭിച്ചതിനെ തുടര്‍ന്ന് പൊലീസ് കുടുംബാംഗങ്ങളുടെ രക്തം ശേഖരിച്ചിരുന്നു.

നേഹയുടെ രണ്ടാമത്തെ കുഞ്ഞാണ് മഹിക. മൂത്ത മകള്‍ക്ക് എട്ടു വയസുണ്ട്. ആണ്‍ കുഞ്ഞിനായി ഇവര്‍ പല ചികിത്സകള്‍ക്കും വിധേയയായി. പൂജകളും വഴിപാടുകളും നടത്തി. എന്നാല്‍ പെണ്‍കുഞ്ഞാണ് പിറന്നത്. ആണ്‍കുഞ്ഞിനെ ലഭിക്കാത്തതില്‍ നിന്നുണ്ടായ ദേഷ്യമാണ് കുഞ്ഞിനെ കൊല്ലാന്‍ നേഹ തീരുമാനിക്കാന്‍ കാരണം. സാമ്ബത്തിക ആസ്തിയും വിദ്യാഭ്യാസമുള്ള നേഹയില്‍ നിന്നും ഇത്തരമൊരു പ്രവര്‍ത്തി ഉണ്ടായതില്‍ ഞെട്ടിയിരിക്കുകയാണ് അവരുടെ ഭര്‍ത്താവും കുടുംബവും.