പ്രമേഹം, രക്തസമ്മര്ദ്ദം തുടങ്ങിയവയ്ക്കുള്ള മരുന്നുകളെ അവശ്യമരുന്നുകളുടെ ലിസ്റ്റില് നിന്നൊഴിവാക്കി: വില 10% ഉയരാന് സാധ്യത
അല്ഷിമേഴ്സ്, പ്രമേഹം, രക്തസമ്മര്ദ്ദം എന്നിങ്ങനെയുള്ള രോഗങ്ങള്ക്ക് നല്കുന്നവയുള്പ്പെടെ നൂറോളം മരുന്നുകളുടെ വില 10% ഉയരാന് സാധ്യത. അവശ്യമരുന്നുകളുടെ ലിസ്റ്റില് നിന്നും ഇവയെ ഒഴിവാക്കിയതാണ് വില ഉയരാനിടയാക്കുന്നത്.
ഈ മരുന്നുകള് അവശ്യമരുന്നുകളുടെ ലിസ്റ്റില് നിന്ന് ഒഴിവാക്കിയതിനാല് കേന്ദ്രസര്ക്കാര് ഇവയുടെ വിലയിന്മേലുള്ള നിയന്ത്രണം എടുത്തുമാറ്റിക്കൊണ്ട് ഉത്തരവിട്ടിരിക്കുകയാണ്. ഇത്തരം മരുന്നുകളുടെ വില വര്ധിപ്പിക്കുന്നത് സര്ക്കാറിനുവേണ്ടി മരുന്നുവില നിയന്ത്രിക്കുന്ന നാഷണല് ഫാര്മസ്യൂട്ടിക്കല് െ്രെപസിങ് അതോറിറ്റി ഒരുവര്ഷത്തോളമായി തടഞ്ഞിരിക്കുകയാണ്. ഈ ഉത്തരവാണ് ഇപ്പോള് നീക്കിയിരിക്കുന്നത്.
എന്.പി.പി.എയുടെ ഉത്തരവിനെതിരെ മരുന്നുകമ്പനികള് കേന്ദ്രസര്ക്കാറിനെ സമീപിക്കുകയായിരുന്നു. ഇതേത്തുടര്ന്ന് ഉത്തരവ് പിന്വലിക്കാന് ഡിപ്പാര്ട്ട്മെന്റ് ഓഫ് ഫാര്മസ്യൂട്ടിക്കല്സ് നിര്ദേശിക്കുകയായിരുന്നു.
സര്ക്കാറിന്റെ ഈ നീക്കം ഉപഭോക്താക്കളെ വലിയതോതില് ബാധിക്കില്ല എന്നാണ് ഉദ്യോഗസ്ഥര് പറയുന്നത്. സര്ക്കാര് വിലനിയന്ത്രണം എടുത്തുമാറ്റിയിരിക്കുന്ന മരുന്നുകള്ക്ക് പകരമായി ഉപയോഗിക്കാവുന്ന വില കുറഞ്ഞ, കൂടുതല് ഫലം നല്കുന്ന മരുന്നുകളുണ്ടെന്നും അതിനാല് ഉപയോക്താക്കളെ ഇത് ബാധിക്കില്ലെന്നുമാണ് അധികൃതരുടെ വാദം.
എന്നാല് വില നിയന്ത്രണം എടുത്തുമാറ്റിയാല് മരുന്നുകമ്പനികള് ഡോക്ടര്മാരിലൂടെ ഇത്തരം മരുന്നുകളുടെ വില്പന വര്ധിപ്പിക്കുമെന്നും അത് സാധാരണക്കാരെ വലിയതോതില് ബാധിക്കുമെന്നും പൊതുജനാരോഗ്യ വിദഗ്ധര് മുന്നറിയിപ്പു നല്കുന്നു.
അവശ്യമരുന്നുകളുടെ ലിസ്റ്റില് ഉള്പ്പെട്ടവയുടെ വില നിശ്ചയിക്കാനുള്ള അധികാരം സര്ക്കാറിനാണ്. ഇതിനു പുറത്തുള്ള എല്ലാ മരുന്നുകളുടെയും വില വര്ഷം 10% എന്ന നിലയില് വര്ധിപ്പിക്കാം.
കഴിഞ്ഞവര്ഷം ഡിസംബറില് അവശ്യമരുന്നുകളുടെ ലിസ്റ്റ് സര്ക്കാര് പുനപരിശോധിക്കുകയും നൂറോളം മരുന്നുകളുടെ ലിസ്റ്റില് നിന്നും ഒഴിവാക്കുകയും ചെയ്തിരുന്നു. സാധാരണയായി കൂടുതല് ഉപയോഗിക്കുന്ന മരുന്നുകള് ലിസ്റ്റില് ഉള്പ്പെടുത്താന് വേണ്ടിയാണിതെന്ന വിശദീകരണമാണ് നല്കിയത്.
https://www.facebook.com/Malayalivartha
