തിരക്കേറിയ റോഡുകളെല്ലാം ശൂന്യം. സാധാരണ തുറക്കാറുള്ള ചെറിയ കടകള്‍ ഒഴിച്ച് മറ്റെല്ലാം അടഞ്ഞുകിടക്കുകയാണ്. തോക്കുകളുമായി സൈനികര്‍ റോഡുകളില്‍ റോന്തു ചുറ്റുന്നു. ആയുധം നിറച്ച ട്രക്കുകളുമായി ബിഎസ്എഫ് ജവാന്‍മാരുടെ വാഹനങ്ങള്‍ ഇടയ്ക്കിടെ കടന്നു പോകുന്നു. ഇതൊക്കെയാണ് കശ്മീരിലെ ഇപ്പോഴത്തെ കാഴ്ച. ഒരു യുദ്ധത്തിനുള്ള തയ്യാറെടുപ്പുകളാണോ ഇതെല്ലാം എന്ന ഭീതിയിലാണ് കശ്മീരിലെ ജനങ്ങള്‍.
19 സൈനികര്‍ വീരമൃത്യു വരിച്ച ഉറി ഭീകരാക്രമണത്തിന് ശേഷം ഇന്ത്യപാകിസ്താന്‍ ബന്ധം കൂടുതല്‍ വഷളായതിനാല്‍ ഒരു യുദ്ധം അത്ര വിദൂരമല്ല എന്ന ആശങ്ക ഇവിടെയുള്ള ആളുകള്‍ക്കിടയിലുണ്ട്്. ഞങ്ങളെ ആക്രമിച്ചതിന് ഭീകരര്‍ക്ക് അതിലും വലിയ ഒരു മറുപടി നല്‍കുമെന്ന് സൈനികര്‍ പറയുന്നു. തിരിച്ചടിക്കാനുള്ള എല്ലാ ഒരുക്കങ്ങളും നടത്തിയിട്ടുണ്ടെന്നും എന്നാല്‍ സര്‍ക്കാര്‍ അതിന് അനുമതി നല്‍കുമോ എന്ന കാര്യം അറിയില്ലെന്നും ഹവില്‍ദാര്‍ സഞ്ജയ് സിംഗ് പറഞ്ഞു.
ഭീകരാക്രമണമുണ്ടായ ഉറി സെക്ടറില്‍ കനത്ത സുരക്ഷയാണ് ഇന്ത്യന്‍ സൈന്യം ഏര്‍പ്പെടുത്തിയിട്ടുള്ളത്. അതിര്‍ത്തിയോട് ചേര്‍ന്ന് താമസിക്കുന്ന ജനങ്ങള്‍ പക്ഷേ സൈനിക നടപടിയെ കുറിച്ചൊന്നും പ്രതികരിക്കാന്‍ തയ്യാറല്ല.
പെട്ടെന്നൊരാക്രണമുണ്ടായാലും പ്രതിരോധിക്കാനുള്ള എല്ലാ സംവിധാനങ്ങളും സൈന്യത്തിനുണ്ടെന്ന് മുതിര്‍ന്ന ഉദ്യോഗസ്ഥര്‍ വെളിപ്പെടുത്തുന്നു. യുദ്ധത്തിനുള്ള എല്ലാ തയ്യാറെടുപ്പുകളും പാകിസ്താനും നടത്തിയതായി കഴിഞ്ഞ ദിവസം റിപ്പോര്‍ട്ടുകള്‍ വന്നിരുന്നു.
എന്നാല്‍ ഇനിയൊരു യുദ്ധം വേണ്ടെന്നാണ് ഇവിടെയുള്ള ജനങ്ങള്‍ പറയുന്നത്. മാസങ്ങളായി തുടരുന്ന സംഘര്‍ഷവും ഇവരുടെ ജീവിതത്തെ സാരമായി ബാധിച്ചിട്ടുണ്ട്. താഴ് വരയിലെ കലാപം കാരണം കഴിഞ്ഞ മൂന്ന് മാസമായി റേഷന്‍ പോലും പലരുടെയും വീടുകളില്‍ എത്തുന്നില്ലെന്ന് നൗഗം സെക്ടറിലെ ഗ്രാമത്തലവന്‍ പറഞ്ഞു.