ലോകത്തിലെ മികച്ച അന്വേഷണ ഏജന്‍സി എന്നുപേരെടുത്ത സിബിഐ ഉദ്യോഗസ്ഥരുടെ ക്രൂരമുഖം പുറത്ത്. ഭാര്യയെ കൂട്ടബലാത്സംഗം ചെയ്യും, നിന്നെ വെട്ടിപട്ടിയ്ക്കു മുന്നില്‍ ഇട്ടുകൊടുക്കും. അഞ്ചു സിബിഐ ഉദ്യോഗസ്ഥരും അയല്‍വാസിയും ചേര്‍ന്നു നടനത്തിയ ഭീഷണിയില്‍ കുടുങ്ങി കേന്ദ്ര സര്‍ക്കാര്‍ ജീവനക്കാരനും കുടുംബവും ആത്മഹത്യ ചെയ്തപ്പോള്‍ വെളിവാകുന്നത് സിബിഐയുടെ അന്വേഷണത്തിന്റെ ക്രൂരമായ മുഖമാണ്. കോര്‍പ്പറേറ്റ് അഫയേഴ്‌സ് മന്ത്രാലയത്തിന്റെ മുന്‍ ഡയറക്ടര്‍ ജനറല്‍ ബി.കെ ബന്‍സാലിന്റെ ആത്മഹത്യയോടെയാണ് സിബിഐയുടെ അന്വേഷണ രീതികള്‍ വീണ്ടും ചര്‍ച്ചാ വിഷയമായിരിക്കുന്നത്. ഇന്‍സ്‌പെക്ടര്‍ ജനറല്‍ ഓഫ് പൊലീസ്, സൂപ്രണ്ട് ഓഫ് പൊലീസ്, ഡെപ്യൂട്ടി സൂപ്രണ്ട് ഓഫ് പൊലീസ് എന്നിവരും ബന്‍സാലിന്റെ അയല്‍വാസിയുമാണ് ഇപ്പോള്‍ ആരോപണ വിധേയരായിരിക്കുന്നത്. ഇദ്ദേഹത്തിന്റെ ആത്മഹത്യാ കുറിപ്പില്‍ ഇവരുടെയെല്ലാം പേരുകളും ഉള്‍പ്പെടുത്തിയാണ് ഇപ്പോള്‍ റിപ്പോര്‍ട്ട് നല്‍കിയിരിക്കുന്നത്. ഇത് ശരിക്കും സിബിഐ എന്ന അന്വേഷണ സംഘത്തെ തന്നെ പ്രതിക്കൂട്ടില്‍ നിര്‍ത്തുന്നതുമാണ്.
ഫാര്‍മസ്യൂട്ടിക്കല്‍ കമ്പനികളില്‍ നിന്നു ഒന്‍പതു ലക്ഷം രൂപ കോഴവാങ്ങിയെന്ന ആരോപണത്തില്‍ ബന്‍സാലിനെതിരെ അന്വേഷണം ആരംഭിച്ച സിബിഐ ഇദ്ദേഹത്തെ നേരത്തെ തന്നെ അറസ്റ്റ് ചെയ്തിരുന്നു. തുടര്‍ അന്വേഷണത്തിന്റെ ഭാഗമായി ഇദ്ദേഹത്തിന്റെ വീട്ടില്‍ എത്തിയ സിബിഐ സംഘം ആദ്യം ഇദ്ദേഹത്തെ കസ്റ്റഡിയില്‍ വാങ്ങുകയായിരുന്നു. തുടര്‍ന്നു വീട്ടില്‍ പലതവണ സിബിഐ സംഘം റെയ്ഡ് നടത്തുകയും ചെയ്തു. ഇതേ തുടര്‍ന്നു രണ്ടാഴ്ച മുന്‍പ് നടന്ന റെയ്ഡിനിടെ സിബിഐ ഉദ്യോഗസ്ഥന്‍ ബെന്‍സാലിന്റെ ഭാര്യയോടും മകളോടും ഇരുവരെയും കൂട്ടബലാത്സംഗത്തിനു ഇരയാക്കുമെന്നു ഭീഷണിപ്പെടുത്തുകയായിരുന്നു. ഇതേ തുടര്‍ന്നു ഇവര്‍ ആത്മഹത്യ ചെയ്തു. എന്നാല്‍, ബൈന്‍സാലിന്റെ അഴിമതിയില്‍ മനം നൊന്താണ് കുടുംബം ആത്മഹത്യ ചെയ്തതെന്നാണ് സിബിഐ പ്രവരിപ്പിച്ചിരുന്നത്.
എന്നാല്‍, ബന്‍സാലിനെതിരെ സിബിഐ നടത്തിയ ക്രൂരമായ പീഡന മുറകളാണ് ഇപ്പോള്‍ പുറത്തു വന്നിരിക്കുന്നത്. ഇദ്ദേഹത്തിന്റെ വീട്ടിലെത്തിയ സിബിഐ സംഘം ഭാര്യയെയും മകളെയും വേറെ വേറെ മൂറിയിലാക്കിയ ശേഷം അനാവശ്യ ചോദ്യങ്ങള്‍ അടക്കം ഉന്നയിക്കുകയായിരുന്നു ആദ്യം ചെയ്തത്. തുടര്‍ന്നു ശാരീരികമായി ആക്രമിക്കുമെന്നും, സ്വകാര്യ ഭാഗങ്ങളില്‍ തോക്ക് കുത്തിക്കയറ്റുമെന്നും ഭീഷണിപ്പെടുത്തി. ബന്‍സാലിനെയും, മകനെയും ഇരുവരുടെയും മുന്നില്‍ പൂര്‍ണ നഗ്‌നരാക്കി സംഭവിച്ച കാര്യങ്ങള്‍ തുറന്നു പറയാനും, കോഴപ്പണം പുറത്തെടുത്തു നല്‍കാനും തയ്യാറായില്ലെങ്കില്‍ ഭര്‍ത്താവിനെയും മകനെയും വെട്ടിയരിഞ്ഞ് പട്ടിക്കിട്ടു കൊടുക്കുമെന്നും സിബിഐ ഉദ്യോഗസ്ഥര്‍ ഇവരെ ഭീഷണിപ്പെടുത്തുകയായിരുന്നു. ഇതേ തുടര്‍ന്നാണ് അമ്മയും മകളും ആത്മഹത്യ ചെയ്തത്.
ഭാര്യയുടെയും മകളുടെയും ആത്മഹത്യയില്‍ സിബിഐ ഉദ്യോഗസ്ഥര്‍ക്കെതിരെ ബന്‍സാല്‍ പരാതി നല്‍കുമെന്നു നേരത്തെ തന്നെ സൂചനയുണ്ടായിരുന്നു. എന്നാല്‍, ബന്‍സാല്‍ പരാതിയുമായി മുന്നോട്ടു പോകാതിരിക്കാന്‍ സിബിഐ ഭാഗത്തു നിന്നു സമ്മര്‍ദവും ശക്തമായി. സമ്മര്‍ദം ശക്തമാക്കുന്നതിന്റെ ഭാഗമായി ഇദ്ദേഹത്തെ 48 മണിക്കൂറിലേറെ നേരം ഇദ്ദേഹത്തെ മുറിയില്‍ പൂട്ടിയിട്ടും സിബിഐ ഉദ്യോഗസ്ഥര്‍ ഭീഷണി മുഴക്കിയിരുന്നു. ഇതേ തുടര്‍ന്നാണ് ഇദ്ദേഹം മകനൊപ്പം ജീവനൊടുക്കാന്‍ തീരുമാനിച്ചതെന്നാണ് കത്തില്‍ എഴുതിയിരിക്കുന്നത്.