തിരിച്ചടിയോടെ കൈയടികള് ഏറ്റുവാങ്ങി പ്രധാനമന്ത്രി നരേന്ദ്ര മോഡി, പാക്കിസ്ഥാന് പിടിയിലായ സൈനികനെ ഉടനെ മോചിപ്പിക്കുമെന്നു രാജ് നാഥ് സിംഗ്
ഇന്ത്യ നല്കിയ തിരിച്ചടിക്ക് പിന്നാലെ അതിര്ത്തി ലംഘിച്ചെന്നാരോപിച്ചു പാക്കിസ്ഥാന് പിടികൂടിയ ഇന്ത്യന് സൈനികനെ മോചിപ്പിക്കുന്നതിനുള്ള എല്ലാ ശ്രമങ്ങളും തുടങ്ങിയതായി കേന്ദ്ര ആഭ്യന്തരമന്ത്രി രാജ്നാഥ് സിങ്. പാക് ഭീകര ക്യാപുകളില് ഇന്ത്യന് സൈന്യം നടത്തിയ മിന്നലാക്രമണത്തിന്റെ വാര്ത്ത പുറത്തുവന്നതിനു പിന്നാലെയാണ് അതിര്ത്തി ലംഘനത്തിന്റെ പേരില് 22കാരനായ ഇന്ത്യന് സൈനികനെ പാക് സൈന്യം പിടികൂടിയെന്ന റിപ്പോര്ട്ട് പുറത്തുവരുന്നത്. മഹാരാഷ്ട്രയില്നിന്നുള്ള സൈനികന് ചന്ദു ബാബുലാല് ചൗഹാനാണു പാക് സൈന്യത്തിന്റെ പിടിയിലുള്ളത്.
അബദ്ധത്തില് അതിര്ത്തി ലംഘിച്ചതിനാണു ചന്ദു ചൗഹാനെ പാക് സൈന്യം പിടികൂടിയതെന്നും, സൈനികരും പ്രദേശവാസികളും അബദ്ധത്തില് അതിര്ത്തി ലംഘിക്കുന്ന സംഭവങ്ങളുണ്ടാകുമ്പോള് ചെയ്യാറുള്ള പതിവ് ഔദ്യോഗിക നടപടിക്രമങ്ങളിലൂടെ അവരെ തിരികെയെത്തിക്കുമെന്നും സൈന്യം വാര്ത്താക്കുറിപ്പില് വ്യക്തമാക്കി. 37 രാഷ്ട്രീയ റൈഫിള്സിലെ അംഗമാണു ചന്ദു ബാബുലാല് ചൗഹാന്. ജന്ധ്റൂട്ട് മേഖലയില്നിന്നാണു ചന്ദു ബാബുലാലിനെ പാക് സൈന്യം പിടികൂടിയതെന്നും ഇദ്ദേഹത്തെ നികായലിലെ സൈനികാസ്ഥാനത്തു തടവിലാക്കിയിരിക്കുകയാണെന്നും ദേശീയ മാധ്യമങ്ങള് റിപ്പോര്ട്ട് ചെയ്യുന്നുണ്ട്.
സൈനികര് കൊല്ലപ്പെട്ടെന്ന വാര്ത്തകള് തെറ്റാണെന്നു കരസേന അറിയിച്ചു. നിയന്ത്രണരേഖയിലെ സൈനിക നടപടിക്കു ശേഷം പോറല്പോലുമേല്ക്കാതെയാണു സൈനികര് തിരിച്ചെത്തിയതെന്നും സൈനികവൃത്തങ്ങള് അറിയിച്ചു.
ഭീകരവാദത്തിനെതിരെ ഇന്ത്യയുടെ നിലപാടുകള് ശക്തമായിരിക്കുമെന്നുള്ളതിനു തെളിവാണ് മിന്നലാക്രമണത്തിലൂടെ ഇന്ത്യ നല്കിയത്. അതിനാല് തന്നെ ഏറ്റവും പ്രശംസയര്ഹിക്കുന്നതും മോഡി തന്നെയാണ്. അധികാരത്തിലേറി രണ്ടര വര്ഷമായെങ്കിലും നരേന്ദ്ര മോദിയില്നിന്ന് പ്രധാനമന്ത്രിക്ക് ചേരുന്ന ഒരു നടപടി ഉണ്ടാകുന്നത് ഇതാദ്യമാണെന്ന് കോണ്ഗ്രസ് ഉപാധ്യക്ഷന് രാഹുല് ഗാന്ധി. ഉറി ഭീകരാക്രമണത്തിന് നിയന്ത്രണരേഖ കടന്ന് ഇന്ത്യ നല്കിയ തിരിച്ചടിയേക്കുറിച്ച് പ്രതികരിക്കുമ്പോഴായിരുന്നു രാഹുലിന്റെ ഈ പരാമര്ശം. ഭീകരതയ്ക്കെതിരായ പോരാട്ടത്തില് പ്രധാനമന്ത്രിക്ക് സമ്പൂര്ണ പിന്തുണ പ്രഖ്യാപിക്കാനും രാഹുല് മറന്നില്ല. ഭീകരതയ്ക്കെതിരായ തുറന്ന യുദ്ധത്തില് പ്രധാനമന്ത്രിക്ക് എന്റെ പൂര്ണ പിന്തുണയുണ്ട്. കോണ്ഗ്രസ് പാര്ട്ടിയും ഈ രാജ്യം മുഴുവനായും ഇക്കാര്യത്തില് അദ്ദേഹത്തോട് ചേര്ന്നു നില്ക്കുമെന്നും രാഹുല് പറഞ്ഞു.ഉറി ഭീകരാക്രമണത്തിന് ശേഷം പാക് അധീന കാശ്മീരില് കയറി പാക് ഭീകരവാദികളെ വധിച്ചത്തിനു പുറമെ രാജ്യമൊട്ടാകെ പ്രധാനമന്ത്രി നരേന്ദ്ര മോഡിക്ക് അഭിനന്ദന പ്രവാഹങ്ങളായിരുന്നു. സോഷ്യല് മീഡിയ വഴിയും അല്ലാതെയും അഭിനന്ദന പ്രവാഹം ചൊരിയുന്നത് പ്രധാന മന്ത്രി എന്ന നിലക്ക് നരേന്ദ്ര മോഡിക്ക് തന്നെയാണ്. ഉറിയിലേറ്റ പ്രഹരത്തിനു കനത്ത തിരിച്ചടിയായിരുന്നു ഇന്ത്യന് സൈന്യം അതിര്ത്തിയില് നടത്തിയത്.
https://www.facebook.com/Malayalivartha
