തമിഴ്‌നാട് മുഖ്യമന്ത്രി ജയലളിത മരിച്ചുവെന്ന അഭ്യൂഹങ്ങള്‍ പുറത്തുവരാന്‍ തുടങ്ങിയിട്ട് കുറച്ചു നേരമായി. എന്നാലിതാ ഇപ്പോള്‍ സാക്ഷാല്‍ വിക്കിപീഡിയ തന്നെ ജയലളിതയുടെ മരണവിവരങ്ങള്‍ പ്രസിദ്ധീകരിച്ചിരിക്കുന്നു. ജനന തീയതിയുടെ കൂടെ മരണതീയതിയുമാണ് വിക്കിപീഡിയയില്‍ പുതുതായി എഡിറ്റ് ചെയ്ത് ചേര്‍ത്തിരിക്കുന്നത്. സെപ്റ്റംബര്‍ 30 ആണ് മരണതീയതിയായി ഇതില്‍ നല്‍കിയത്. എന്നാല്‍ സംഭവം വ്യാപക പ്രതിഷേധത്തിന് തിരികൊളുത്തിയതോടെ വിക്കപീഡിയയില്‍ നിന്നും ഈ വിവരം നീക്കം ചെയ്തു.

ഇന്നലെ രാവിലെ മുതലാണ് ജയലളിത മരിച്ചുവെന്ന തരത്തില്‍ വാര്‍ത്തകള്‍ പ്രചരിയ്ക്കാന്‍ തുടങ്ങിയത്. മരണവിവരങ്ങള്‍ കൂട്ടിച്ചേര്‍ത്തു കൊണ്ടുള്ള ഒരു എഡിറ്റ് പരമ്പര തന്നെ വിക്കിപീഡിയയിലെ ജയലളിതയുടെ പേരിലുള്ള പേജില്‍ നടന്നു. ഇന്നലെ രാത്രി മാത്രം നൂറുകണക്കിന് എഡിറ്റുകളാണ് ജയലളിതയുടെ പേജില്‍ മാത്രം ഉണ്ടായിട്ടുള്ളത്. മരണതീയതി സെപ്തംബര്‍ 30, എന്നതിനു പുറമെ മ പ്രതീക്ഷിക്കുന്ന മരണ തീയതി ഒക്ടോബര്‍ 1 വരെയുള്ള സ്ഥിരീകരിക്കാത്ത വിവരങ്ങളാണ് പേജില്‍ തിരുത്താന്‍ ശ്രമിച്ചിരിക്കുന്നത്.

എന്നാലിതിനിടെ അപ്പോളോ ആശുപത്രി അധികൃതര്‍ ഔദ്യോഗിക വാര്‍ത്തക്കുറിപ്പ് പുറത്തിറക്കി. ജയലളിതയുടെ ആരോഗ്യസ്ഥിതിയില്‍ ആശങ്കപ്പെടേണ്ടെന്ന് അപ്പോളോ ആശുപത്രി അധികൃതര്‍ വ്യക്തമാക്കി. ഇത്തരം കിംവദന്തികളോട് പ്രതികരിച്ച് ഇത്തരക്കാരെ പ്രോത്സാഹിപ്പിക്കാനില്ലെന്നും അധികൃതര്‍ കൂട്ടിച്ചേര്‍ത്തു.

പനിയും നിര്‍ജലീകരണവും ബാധിച്ച് ഒമ്പതു ദിവസമായി ജയലളിത ആശുപത്രിയിലാണ്. മുഖ്യമന്ത്രിയെന്ന നിലയില്‍ അവരുടെ ആരോഗ്യപുരോഗതിയെ കുറിച്ച് ജനങ്ങള്‍ക്ക് നിരന്തരം വിവരം കൈമാറണം. ഒരാഴ്ചയായി ആശുപത്രിയില്‍ തുടരുന്ന ജയലളിതയെ സന്ദര്‍ശിക്കാന്‍ എന്തുകൊണ്ട് ആരെയും അനുവദിക്കുന്നില്ലെന്നും സംസ്ഥാനത്തിന്റെ ഗവര്‍ണര്‍ ഇക്കാര്യത്തില്‍ ഇടപെടണമെന്നും കരുണാനിധി ആവശ്യപ്പെട്ടു.

നവമാദ്ധ്യമങ്ങളിലൂടെ മുഖ്യമന്ത്രിയുടെ ആരോഗ്യനിലയെ കുറച്ച് ദിവസങ്ങളായി കിംവദന്തി പരക്കുന്നുണ്ട്. അടിസ്ഥാനരഹിതമായ വാര്‍ത്തകള്‍ പ്രചരിക്കുന്നത് അവസാനിപ്പിക്കാന്‍ കൃത്യമായ വിവരങ്ങള്‍ ജനങ്ങളെ ധരിപ്പിക്കണമെന്നും കരുണാനിധി പറഞ്ഞു.