സ്ത്രീകളോടുള്ള ലൈംഗിക അതിക്രമങ്ങള്‍ നാള്‍ക്കുനാള്‍ വര്‍ധിച്ചുവരുകയാണ്. യാത്രാവേളയില്‍, ജോലിസ്ഥലങ്ങളില്‍ എന്തിന് സ്വന്തം വീട്ടില്‍ പോലും അവള്‍ സുരക്ഷിയല്ലെന്ന രീതിയിലാണ് വാര്‍ത്തകള്‍ പുറത്തു വരുന്നത്. നിരന്തരം അവള്‍ വേട്ടയാടപ്പെടുന്നു, പേടിക്കൊണ്ട് അവളുടെ മനസ്സും.

ഒടുവിലായി പുറത്തുവരുന്ന റിപ്പോര്‍ട്ടുകള്‍ അനുസരിച്ച് സ്ത്രീകള്‍ ജോലിചെയ്യുന്ന കമ്പനികളില്‍ അവര്‍ക്ക് നേരിടേണ്ടിവരുന്ന ലൈംഗിക അതിക്രമങ്ങള്‍ വര്‍ദ്ധിക്കുന്നുവെന്നാണ്. നിഫ്റ്റിയില്‍ ആദ്യത്തെ 50 സ്ഥാനങ്ങളില്‍ നില്‍ക്കുന്ന കമ്പനികളിലെ സ്ത്രീ ജീവനക്കാരില്‍ നിന്ന് ലഭിച്ച പരാതികളുടെ അടിസ്ഥാനത്തിലാണ് റിപ്പോര്‍ട്ട് പുറത്തുവന്നിരിക്കുന്നത്. 80 % വനിതാ ജീവനക്കാരാണ് ഐടി, ബാങ്കിംഗ് കമ്പനികളില്‍ തൊഴില്‍ നോക്കുന്നത്. ഇവിടെ ജോലി ചെയ്യുന്നവര്‍ക്കു നേരെ വലിയ രീതിയില്‍ അതിക്രമങ്ങള്‍ നടക്കുന്നുവെന്നാണ് പരാതി.

മാര്‍ച്ചില്‍ അവസാനിച്ച കഴിഞ്ഞ സാമ്പത്തിക വര്‍ഷത്തില്‍ 525 പരാതികളാണ് ആകെ ലഭിച്ചത്. മുന്‍ വര്‍ഷത്തെക്കാള്‍ 26 % ആണ് ഇതിന്റെ വര്‍ധനവ്. വിപ്രോയില്‍ നിന്നാണ് ഏറ്റവും കൂടുതല്‍ പരാതികള്‍ ലഭിച്ചത്. 111 പരാതികള്‍. 87 പരാതികളുമായി ഐസിഐസിഐ ബാങ്ക് രണ്ടാം സ്ഥാനത്താണ്. 62 പരാതികളുമായി ഇന്‍ഫോസിസ് മൂന്നാം സ്ഥാനത്തും. ടിസിഎസിലും സ്‌റ്റേറ്റ് ബാങ്ക് ഓഫ് ഇന്ത്യയിലും പരാതികളുടെ എണ്ണം കഴിഞ്ഞ വര്‍ഷത്തേതിനേക്കാള്‍ പതിന്‍മടങ്ങ് വര്‍ധിച്ചിട്ടുണ്ട്.

സ്ത്രീ ജീവനക്കാര്‍ ജോലിസ്ഥലത്തു നേരിടുന്ന പീഡനങ്ങള്‍ തടയാനായി 2013ല്‍ നിയമം പുറത്തിറങ്ങിയിട്ടുണ്ട്. ആ നിയമത്തിന്റെ അടിസ്ഥാനത്തില്‍ കമ്പനികള്‍ പുറത്തിറക്കിയ വാര്‍ഷിക റിപ്പോര്‍ട്ടിലാണ് ഈ വിവരം പുറത്തു വിട്ടത്. രണ്ടാമത്തെ തവണയാണ് ഇത്തരത്തില്‍ ഈ വിവരങ്ങള്‍ പുറത്തു വരുന്നത്. അതിക്രമങ്ങള്‍ തടയുന്നതിനായി ജീവനക്കാര്‍ക്ക് ബോധവല്‍ക്കരണ പരിപാടികള്‍ ഏര്‍പ്പെടുത്തിയതായി ടിസിഎസ് അധികൃതര്‍ പറഞ്ഞു. എന്നാല്‍ ചില കമ്പനികള്‍ ഈ നിയമം പാലിക്കാന്‍ ഇനിയും സന്നദ്ധരായിട്ടില്ലെന്നാണ് വിദഗ്ദ്ധരുടെ വാദം.