'ആത്മഹത്യ ചെടി' എന്ന വിളിപ്പേരിന് പിന്നിലെ രഹസ്യം മറ്റൊന്നല്ല, ദേഹത്ത് മുട്ടിയാല്‍ ചാകാന്‍ തോന്നുന്നത്ര വേദന മനുഷ്യര്‍ക്ക് ഉണ്ടാകും. ഓസ്‌ട്രേലിയയിലാണ് ഈ സ്യൂയിസൈഡ് പ്ലാന്റ് തഴച്ച് വളരുന്നത്. നാടന്‍ ചൊറിയണ്ണത്തിന്റെ ഭീകര വേര്‍ഷ്യന്‍ എന്നൊക്കെ കളിയായി പറയാം. പക്ഷേ വിഷാംശമുള്ള ചെടി ചില്ലറക്കാരനല്ല. സഹിക്കാനാകാത്ത വേദനയാണ് മനുഷ്യര്‍ക്ക് നല്‍കുക.
രണ്ടു വര്‍ഷത്തോളം ഈ കഠിന വേദന തുടരും. സഹിക്കാനാകാത്ത വേദന ആത്മഹത്യക്ക് ആളുകളെ പ്രേരിപ്പിക്കുകയും ചെയ്യുമെന്ന് അനുഭവസ്ഥര്‍ പറയുന്നു. ഡെന്‍ഡ്രോക്‌നൈഡ് മോറോയിഡ്‌സ് എന്നാണ് ഈ അപകടകാരിയായ സസ്യത്തിന്റെ യഥാര്‍ത്ഥ പേര്. പരക്കെ അറിയപ്പെടുന്നത് ആത്മഹത്യ ചെടിയെന്ന പേരിലും. കുത്ത് കിട്ടുന്നവര്‍ ഇനി പെട്ടെന്നങ്ങ് ചത്താല്‍ മതിയെന്ന് ആഗ്രഹിച്ചു പോകുന്നത്ര ശരീരത്തെ തുളയ്ക്കുന്ന വേദനയാണ് ഉണ്ടാവുക എന്നാണ് പറയപ്പെടുന്നത്.
കുത്തുന്ന ചെടിയെന്നും ജിംപി ജിംപിയെന്നും മൂണ്‍ലൈറ്ററെന്നും ഇതിനെ വിളിക്കാറുണ്ട്. വടക്കു കിഴക്കന്‍ ഓസ്‌ട്രേലിയയിലെ മഴക്കാടുകളാണ് ചെടിയുടെ കേന്ദ്രം. നാരുകള്‍ കട്ടിയോടെ പുറത്തേക്ക് കുത്താന്‍ പാകത്തിന് തള്ളി നില്‍ക്കുന്നു. ഇതില്‍ ഒരു നീറോടോക്‌സിന്‍ ഉള്ളതാണ് കഠിന വേദനക്ക് കാരണമാകുന്നത്. നാഡിവ്യൂഹത്തെ തളര്‍ത്തുന്ന തരത്തിലുള്ള വിഷാംശമാണ് ഇത്.
മനുഷ്യ ശരീരത്തില്‍ ഭ്രാന്തമായ വേദനക്ക് കാരണമാകുമെങ്കിലും മൃഗങ്ങള്‍ക്കും പക്ഷികള്‍ക്കും ഇത് അപകടകരമായി തീരാറില്ല. ഡെന്‍ഡ്രോക്‌നൈഡ് മോറോയിഡ്‌സ് കുത്തിയാലുള്ള ചികില്‍സയില്‍ പ്രധാനം വാക്‌സ് ഉപയോഗിച്ച് ഈ നാരുകള്‍ പിഴുത് മാറ്റുക എന്നതാണ്.