പൊതുമുതലും സര്‍ക്കാര്‍ സംവിധാനങ്ങളും ഇനി മുതല്‍ രാഷ്ട്രീയ നേട്ടങ്ങള്‍ക്കും പ്രചരണത്തിനും ഉപയോഗിക്കാനാവില്ല. ഇതുമായി ബന്ധപ്പെട്ട കേന്ദ്ര തെരഞ്ഞെടുപ്പ് കമ്മീഷന്‍ ഉത്തരവ് ഇറക്കി. ഇതിനു പുറമെ പൊതുമുതല്‍ ഉപയോഗിച്ച് പാര്‍ട്ടികളുടെ തെരഞ്ഞെടുപ്പ് ചിഹ്നങ്ങള്‍ സ്ഥാപിക്കുന്നതും കമ്മീഷന്‍ വിലക്കിയിട്ടുണ്ട്.

പൊതുമുതലോ പൊതുസ്ഥലങ്ങളോ സര്‍ക്കാര്‍ സംവിധാനങ്ങളോ ഉപയോഗിച്ച് ഏതെങ്കിലും തരത്തിലുള്ള പ്രചരണങ്ങളോ പരസ്യങ്ങളോ പാര്‍ട്ടിക്കോ പാര്‍ട്ടിയുടെ തെരഞ്ഞെടുപ്പ് ചിഹ്നത്തിനോ നല്‍കാന്‍ പാടില്ല. ഈ നിര്‍ദേശം ലംഘിക്കുന്നത് ധിക്കരിക്കലായി കണക്കാക്കി നടപടി സ്വീകരിക്കുമെന്നും തെരഞ്ഞെടുപ്പ് കമീഷനെ പുറത്തിറക്കിയ ഉത്തരവില്‍ വിവരിക്കുന്നു.

രാഷ്ട്രീയ പാര്‍ട്ടികളുടെ തെരഞ്ഞെടുപ്പ് ചിഹ്നങ്ങള്‍ സര്‍ക്കാര്‍ പണം ഉപയോഗിച്ച് പൊതുയിടങ്ങളില്‍ പ്രദര്‍ശിപ്പിക്കുന്നതിന് എതിരെ ഡല്‍ഹി ഹൈക്കോടതി നേരത്തെ വിധി പുറപ്പെടുവിച്ചിരുന്നു. ഈ സാഹചര്യത്തിലാണ് കേന്ദ്ര തെരഞ്ഞെടുപ്പ് കമീഷന്‍ പുതിയ നിര്‍ദേശം നല്‍കിയത്.

ഉത്തര്‍പ്രദേശില്‍ മായാവതി സര്‍ക്കാര്‍ പാര്‍ട്ടി ചിഹ്നമായ ആനയുടെ പ്രതിമകള്‍ സ്ഥാപിച്ചത് വലിയ വിവാദങ്ങള്‍ക്ക് വഴിവെച്ചിരുന്നു. ഇതേതുടര്‍ന്ന് ഒരു സന്നദ്ധ സംഘടനയാണ് ഡല്‍ഹി ഹൈകോടതിയില്‍ ഹരജി നല്‍കിയത്. പൊതുമുതല്‍ ഉപയോഗിച്ചുള്ള പ്രചരണങ്ങള്‍ വിലക്കണമെന്ന നിലപാടാണ് അഭിപ്രായം ആരാഞ്ഞ കോടതിയില്‍ രാഷ്ട്രീയ പാര്‍ട്ടികളും കേന്ദ്ര തെരഞ്ഞെടുപ്പ് കമീഷനും സ്വീകരിച്ചത്.