ആഘോഷം തകര്ക്കാതിനിക്കാന് മുന്നറിയിപ്പ്... ദസറ, മുഹറം ആഘോഷങ്ങളില് ഭീകരാക്രമണ, വര്ഗീയസംഘര്ഷ സാധ്യത; സുരക്ഷാകാര്യങ്ങളില് അതീവ ജാഗ്രത പുലര്ത്താന് കേന്ദ്രം
ഉത്സവകാലത്ത് സുരക്ഷാകാര്യങ്ങളില് അതീവ ജാഗ്രത പുലര്ത്താന് കേന്ദ്ര സര്ക്കാര് എല്ലാ സംസ്ഥാനങ്ങള്ക്കും നിര്ദ്ദേശം നല്കി. ഈ സമയത്ത് ഭീകരാക്രമണസാധ്യത ഏറെയാണെന്നും രാജ്യത്തെ സമാധാനാന്തരീക്ഷം തകര്ത്ത് വര്ഗീയ സംഘര്ഷങ്ങള്ക്ക് തുടക്കമിടാന് സാമൂഹ്യവിരുദ്ധശക്തികള് ശ്രമിച്ചേക്കാമെന്നുമുള്ള ഇന്റലിജന്സ് റിപ്പോര്ട്ടിന്റെ അടിസ്ഥാനത്തിലാണ് നടപടി. ദസറ, മുഹറം ആഷോഷങ്ങളുടെ പശ്ചാത്തലത്തിലാണ് എല്ലാ സംസ്ഥാനങ്ങള്ക്കും കേന്ദ്ര ആഭ്യന്തര മന്ത്രാലയം ജാഗ്രതാ നിര്ദേശം നല്കിയത്.
ആഘോഷങ്ങളോട് അനുബന്ധിച്ച് ജനങ്ങള് കൂടുതലായെത്താന് സാധ്യതയുള്ള വ്യാപാര കേന്ദ്രങ്ങള്, റയില്വേ സ്റ്റേഷനുകള്, ബസ് ടെര്മിനലുകള്, ആരാധനാലയങ്ങള് എന്നിവിടങ്ങളിലെല്ലാം കൂടുതല് സുരക്ഷാ ഉദ്യോഗസ്ഥരെ നിയോഗിക്കാനും നിര്ദേശമുണ്ട്. ഏതാനും ദിവസങ്ങള്ക്കുമുന്പ് നിയന്ത്രണരേഖ കടന്ന് പാക്ക് അധീന കശ്മീരിലെ ഭീകരക്യാംപുകള്ക്കു നേരെ ഇന്ത്യന് സൈന്യം മിന്നലാക്രമണം നടത്തിയിരുന്നു. ഇതിന് തിരിച്ചടിയായി ഉത്സവകാലത്ത് വര്ഗീയ ലഹളയുണ്ടാക്കാന് ഭീകരര് ശ്രമിച്ചേക്കാമെന്നും ഇന്റലിജന്സിന്റെ മുന്നറിയിപ്പുണ്ട്.
ഡല്ഹി, മുംബൈ, കൊല്ക്കത്ത, ചെന്നൈ, ബെംഗളൂരു, ഹൈദരാബാദ് എന്നീ മെട്രോ നഗരങ്ങളിലെ പൊലീസ് ഉദ്യോഗസ്ഥരോടും കൂടുതല് ജാഗ്രത പാലിക്കാന് ആവശ്യപ്പെട്ടിട്ടുണ്ട്. മതസ്ഥാപനങ്ങള്ക്കും ആരാധനാലയങ്ങള്ക്കും സമീപം പ്രകോപനപരമായി മുദ്രാവാക്യം വിളിക്കുന്നതുള്പ്പെടെയുള്ള കാര്യങ്ങള് നിയന്ത്രിക്കാനും പൊലീസിന് നിര്ദേശം നല്കിയിട്ടുണ്ട്. തര്ക്ക പ്രദേശങ്ങളിലെ ഉത്സവാഘോഷങ്ങള്, പതിവുവഴി വിട്ടുള്ള പ്രദക്ഷിണങ്ങള്, മതചടങ്ങുകള്ക്കായുള്ള നിര്ബന്ധിത പിരിവ് എന്നിവയെല്ലാം പ്രത്യേകം നിരീക്ഷിക്കാനാണ് നിര്ദ്ദേശം.
https://www.facebook.com/Malayalivartha
