ഹേ പറ്റിപ്പാണേ പറ്റിപ്പാണല്ലോ. ചെടികളുടെ ഇലകളില്‍നിന്ന് പെട്രോള്‍ ഉണ്ടാക്കിയെന്ന അവകാശവാദമുന്നയിച്ച രാമര്‍ പിള്ളൈയ്ക്ക് കോടതി മൂന്നുവര്‍ഷം കഠിനതടവ് വിധിച്ചു. 'ഹെര്‍ബല്‍ പെട്രോള്‍' എന്നപേരില്‍ രാമര്‍പിള്ളൈയും കൂട്ടരും വിറ്റഴിച്ചത് പെട്രോളിയം ഉത്പന്നങ്ങളുടെ മിശ്രിതമായിരുന്നുവെന്ന് സി.ബി.ഐ. കണ്ടെത്തിയിരുന്നു. ഇതുശരിവെച്ചുകൊണ്ടാണ് ചെന്നൈ എഗ്മൂറിലെ അഡീഷണല്‍ ചീഫ് മെട്രൊപ്പൊളിറ്റന്‍ മജിസ്‌ട്രേട്ട് കോടതി രാമര്‍പിള്ളൈയ്ക്കും കൂട്ടാളികളായ ആര്‍. വേണുദേവി, എസ്. ചിന്നസാമി, ആര്‍. രാജശേഖരന്‍, എസ്.കെ. ഭരത് എന്നിവര്‍ക്കും മൂന്നുവര്‍ഷം കഠിനതടവ് വിധിച്ചത്. ഓരോരുത്തരും ആറായിരംരൂപ വീതം പിഴയടയ്ക്കണമെന്നും കോടതി നിര്‍ദേശിച്ചു.
1999ലും 2000ലുമായി വ്യാജ പെട്രോള്‍ വിറ്റഴിച്ച് രാമറും കൂട്ടരും 2.27 കോടി രൂപയുടെ നേട്ടമുണ്ടാക്കിയെന്നാണ് സി.ബി.ഐ. കേസ്. ഈ കേസില്‍ 2000 മാര്‍ച്ച് പത്തിന് സി.ബി.ഐ. രാമറിനെയും സഹായികളെയും അറസ്റ്റുചെയ്തിരുന്നു. 1996ലാണ് വിരുതുനഗര്‍ ജില്ലയിലെ രാജപാളയത്തുനിന്നുള്ള രാമര്‍ പിള്ളൈ ജനശ്രദ്ധ പിടിച്ചുപറ്റിയത്. ഹൈസ്‌കൂള്‍ പഠനം പൂര്‍ത്തിയാക്കിയിട്ടില്ലാത്ത രാമര്‍ പച്ചിലപെട്രോളുമായി രംഗപ്രവേശം ചെയ്തത് വന്‍ മാധ്യമശ്രദ്ധ പിടിച്ചുപറ്റി. ഇലകളും വെള്ളവുമുപയോഗിച്ചാണ് താന്‍ പെട്രോളുണ്ടാക്കുന്നതെന്നായിരുന്നു രാമറിന്റെ അവകാശവാദം.
ഈ പെട്രോളുപയോഗിച്ച് വാഹനങ്ങള്‍ ഓടിച്ചുകാണിച്ചുകൊണ്ടാണ് രാമന്‍ ജനത്തെ കൈയിലെടുത്തത്. അന്നത്തെ തമിഴ്‌നാട് മുഖ്യമന്ത്രി കരുണാനിധിയുടെയും നിരവധി ശാസ്ത്രജ്ഞരുടെയും മുന്നില്‍ രാമര്‍ ഈ പ്രദര്‍ശനങ്ങള്‍ നടത്തിയിരുന്നു. ചെന്നൈയില്‍മാത്രം രാമറും കൂട്ടരും 11 വില്പനശാലകളാണ് ഈ പെട്രോള്‍ വിറ്റഴിക്കാനായി തുറന്നത്. ലിറ്ററിന് 15 രൂപ മുതല്‍ 20 രൂപ വരെയായിരുന്നു നിരക്ക്.
എന്നാല്‍, പിന്നീട് ഐ.ഐ.ടി. മദ്രാസിലും ഡെറാഡൂണിലെ ഇന്ത്യന്‍ ഇന്‍സ്റ്റിറ്റിയൂട്ട് ഒഫ് പെട്രോളിയത്തിലും നടത്തിയ പരിശോധനകളില്‍ രാമറിന്റെ പെട്രോള്‍ മണ്ണെണ്ണയും ബെന്‍സീനും നാഫ്തയുമൊക്കെ കലര്‍ത്തിയുണ്ടാക്കിയതാണെന്ന് കണ്ടെത്തി. ഇതിന്റെ അടിസ്ഥാനത്തിലാണ് സി.ബി.ഐ. രാമറിനും കൂട്ടര്‍ക്കുമെതിരെ കേസെടുത്ത് അന്വേഷണം നടത്തിയത്. പെട്രോള്‍ നിര്‍മാണത്തിന് ഫാക്ടറിയുണ്ടെന്ന് രാമര്‍ അവകാശപ്പെട്ടിരുന്നെങ്കിലും ആകെയുണ്ടായിരുന്നത് ചെന്നൈയിലെ പല്ലാവരത്ത് ഒരു ഗോഡൗണ്‍ മാത്രമായിരുന്നെന്നും സി.ബി.ഐ. കണ്ടെത്തി.