ബ്രിട്ടീഷ് സേനയുടെ നേതൃത്വത്തില്‍ വിവിധ രാജ്യങ്ങളിലെ സൈനികര്‍ക്കായി നടത്തിയ അതികഠിന സൈനിക പരിശീലന മത്സരത്തില്‍ ഇന്ത്യന്‍ സൈന്യത്തിലെ ഗൂര്‍ഖാ റൈഫിള്‍സ് സംഘത്തിന് സ്വര്‍ണമെഡല്‍. കാമ്പ്രിയന്‍ പട്രോള്‍ എന്ന പേരിലുള്ളതായിരുന്നു മത്സരം.
വെയില്‍സിലെ അതികഠിനമായ കാമ്പ്രിയന്‍ മലനിരകളില്‍ എല്ലാ വര്‍ഷവും സംഘടിപ്പിക്കുന്ന അന്താരാഷ്ട്ര മത്സര പരിപാടിയാണ് കാമ്പ്രിയന്‍ പട്രോള്‍. 80 കിലോമീറ്റര്‍ ചുറ്റളവില്‍ 48 മണിക്കൂറായിരുന്നു പരിപാടി. വിവിധ രാജ്യങ്ങളുടെ സൈനിക സംഘത്തിനും പ്രത്യേകം ജോലി ഏര്‍പ്പിക്കും. അത് 48 മണിക്കൂറിനുള്ളില്‍ പൂര്‍ത്തീകരിക്കുകയാണ് വേണ്ടത്. ഇതിനായി ഓരോരുത്തര്‍ക്കും ആയുധ സാമഗ്രികളടങ്ങിയ പ്രത്യേക കിറ്റും നല്‍കും. കിറ്റിലുള്ള എന്തെങ്കിലും നഷ്ടപ്പെട്ടാല്‍ അത്രയും ഭാരമുള്ള ഉപയോഗമില്ലാത്ത മറ്റൊരു വസ്തു നല്‍കുകയും പോയിന്റില്‍ കുറവ് വരുത്തുകയും ചെയ്യും.
സൈനികരുടെ പ്രകടനത്തിന്റെ അടിസ്ഥാനത്തിലാണ് പോയിന്റ് നല്‍കുന്നത്. അടിയന്തര ശസ്ത്രക്രിയാ കഴിവ്, അനധികൃത വിമാനങ്ങളെയും വാഹനങ്ങളെയും തിരിച്ചറിയല്‍, തടസങ്ങള്‍ മറികടന്ന് ലക്ഷ്യ പൂര്‍ത്തീകരണം തുടങ്ങിയ മറ്റ് പ്രവര്‍ത്തനങ്ങളും നിരീക്ഷിക്കും. 75 പോയിന്റ് നേടിയാണ് ഇന്ത്യന്‍ സൈന്യം സ്വര്‍ണ മെഡല്‍ നേടിയത്. 2010 ലും 2014 ലും ഇന്ത്യന്‍ സൈന്യത്തിന് സ്വര്‍ണ മെഡല്‍ ലഭിച്ചിട്ടുണ്ട്.