ഉപതിരഞ്ഞെടുപ്പു നടന്ന നാലു ലോക്‌സഭാ സീറ്റില്‍ രണ്ടെണ്ണം വീതം ബിജെപിയും തൃണമൂല്‍ കോണ്‍ഗ്രസും നേടി. ആറു സംസ്ഥാനങ്ങളിലും കേന്ദ്രഭരണ പ്രദേശമായ പുതുച്ചേരിയിലുമായി നടന്ന 10 നിയമസഭാ ഉപതിരഞ്ഞെടുപ്പുകളില്‍ ഭരണകക്ഷികള്‍ വിജയംകൊയ്തു. അസമിലെ ലക്ഷ്മിപുര്‍ ലോക്‌സഭാ മണ്ഡലത്തിലും മധ്യപ്രദേശിലെ ഷന്തോള്‍ ലോക്‌സഭാ സീറ്റിലും ഭരണകക്ഷിയായ ബിജെപി സീറ്റ് നിലനിര്‍ത്തി.

ദയനീയമാണു ബംഗാളില്‍ പ്രതിപക്ഷ പാര്‍ട്ടികളുടെ സ്ഥിതി. കൂച് ബിഹാര്‍ ലോക്‌സഭാ സീറ്റില്‍ തൃണമൂല്‍ ബിജെപിയെ തറപറ്റിച്ചതു നാലുലക്ഷം വോട്ടിന്റെ ഭൂരിപക്ഷത്തിനാണ്. ഇടതുപക്ഷ സഖ്യകക്ഷി ഫോര്‍വേഡ് ബ്‌ളോക്കിനു മൂന്നാം സ്ഥാനം. ടംലുക് ലോക്‌സഭാ സീറ്റില്‍ തൃണമൂലിന്റെ ഭൂരിപക്ഷം അഞ്ചുലക്ഷം.

മൊന്‍ടേശ്വര്‍ നിയമസഭാ തിരഞ്ഞെടുപ്പില്‍ തൃണമൂലിന്റെ ഭൂരിപക്ഷം 1.27 ലക്ഷമാണ്. സംസ്ഥാന നിയമസഭാ തിരഞ്ഞെടുപ്പുകളില്‍ തന്നെ ഒരു സ്ഥാനാര്‍ഥിക്കു ലഭിക്കുന്ന ഏറ്റവും വലിയ ഭൂരിപക്ഷമാണിത്. ബിജെപിക്കും സിപിഎമ്മിനും കോണ്‍ഗ്രസിനും എല്ലായിടത്തും കെട്ടിവച്ച കാശുപോയി.
തമിഴ്‌നാട്ടിലെ മൂന്നു നിയമസഭാ മണ്ഡലങ്ങളിലും അണ്ണാ ഡിഎംകെ വന്‍വിജയം നേടി. ഉപതിരഞ്ഞെപ്പു നടന്ന തിരുപ്പറന്‍കുണ്ട്രത്ത് ഭൂരിപക്ഷം ഇരട്ടിയോളമായി. അരുവാക്കുറിച്ചിയില്‍ വി.സെന്തില്‍ ബാലാജി (ഭൂരിപക്ഷം23,673), തഞ്ചാവൂരില്‍ എം.രംഗസാമി (26,874) തിരുപ്പറന്‍കുണ്ട്രത്ത് എ.കെ.ബോസ് (42,670) എന്നിവര്‍ വിജയിച്ചു. വന്‍തോതില്‍ ക്രമക്കേടു നടന്നെന്ന ആരോപണത്തെ തുടര്‍ന്ന് അരുവാക്കുറിച്ചി, തഞ്ചാവൂര്‍ എന്നിവിടങ്ങളില്‍ മേയില്‍ നടക്കേണ്ടിയിരുന്ന തിരഞ്ഞെടുപ്പു മാറ്റിവയ്ക്കുകയായിരുന്നു.
അണ്ണാ ഡിഎംകെ എംഎല്‍എയുടെ മരണത്തെ തുടര്‍ന്നായിരുന്നു തിരുപ്പറന്‍കുണ്ട്രത്ത് (കഴിഞ്ഞതവണ ഭൂരിപക്ഷം 22,992) ഉപതിരഞ്ഞെടുപ്പ്. പുതുച്ചേരി മുഖ്യമന്ത്രി വി.നാരായണസാമി (കോണ്‍) നെല്ലിത്തോപ്പ് മണ്ഡലത്തില്‍ 11,144 വോട്ടിന്റെ ഭൂരിപക്ഷത്തില്‍ വിജയിച്ചു. എന്‍ആര്‍ കോണ്‍ഗ്രസിന്റെയും ബിജെപിയുടെയും പിന്തുണയോടെ മല്‍സരിച്ച അണ്ണാ ഡിഎംകെ സ്ഥാനാര്‍ഥി ഓംശക്തി ശേഖറിനെയാണു തോല്‍പിച്ചത്. മുഖ്യമന്ത്രിയായതിനെ തുടര്‍ന്നു നാരായണസാമിക്കു മല്‍സരിക്കാനായി മണ്ഡലത്തിലെ കോണ്‍ഗ്രസ് അംഗം സീറ്റ് ഒഴിഞ്ഞുകൊടുക്കുകയായിരുന്നു.

മഹാരാഷ്ട്ര നിയമസഭാ കൗണ്‍സില്‍ തിരഞ്ഞെടുപ്പില്‍ എന്‍സിപിക്കു തിരിച്ചടി. ആറു സീറ്റുകളിലേക്കു നടന്ന തിരഞ്ഞെടുപ്പില്‍ നിലവിലുണ്ടായിരുന്ന നാലു സീറ്റില്‍ മൂന്നെണ്ണം എന്‍സിപിക്കു നഷ്ടമായി. ഓരോ സീറ്റ് വീതം ബിജെപി, ശിവസേന, കോണ്‍ഗ്രസ് എന്നിവ പിടിച്ചെടുക്കുകയായിരുന്നു.
ത്രിപുരയിലെ ബര്‍ജാല സംവരണ സീറ്റ് കോണ്‍ഗ്രസില്‍ നിന്നു തിരിച്ചുപിടിച്ച ഭരണകക്ഷി സിപിഎം കോവായി സീറ്റ് നിലനിര്‍ത്തി. അരുണാചലില്‍ ഹയുലിയാങ് നിയമസഭാ സീറ്റ് എന്‍ഇഡിഎ സഖ്യത്തിലെ ദസംഗുല പുള്‍ (ബിജെപി) നേടി. ആത്മഹത്യ ചെയ്ത മുഖ്യമന്ത്രി കലിഖോ പുളിന്റെ മൂന്നു ഭാര്യമാരില്‍ ഇളയയാളാണ്.