നോട്ട് അസാധുവാക്കല്‍ തീരുമാനത്തിന്റെ പശ്ചാത്തലത്തില്‍ ഡിസംബര്‍ 31 വരെ ഡെബിറ്റ് കാര്‍ഡ് ഇടപാടുകള്‍ക്ക് ബാങ്കുകള്‍ സര്‍വീസ് ചാര്‍ജ് ഈടാക്കില്ലെന്ന് കേന്ദ്രസര്‍ക്കാര്‍. റെയില്‍വേ ഇ-ടിക്കറ്റ് ബുക്കിങ്ങിനും ഈ ഇളവുണ്ടാകുമെന്ന് കേന്ദ്ര സാമ്പത്തികകാര്യ സെക്രട്ടറി ശക്തികാന്ത ദാസ് പറഞ്ഞു. മൊബൈല്‍ ഫോണുകള്‍ മുഖേനയുള്ള ഇടപാടുകള്‍ക്കും ഈ ആനുകൂല്യം ലഭിക്കും. ഡിജിറ്റല്‍ ഇടപാടുകള്‍ പ്രോത്സാഹിപ്പിക്കുന്നതിന്റെ ഭാഗമായാണ് ഇതെന്നും അദ്ദേഹം പറഞ്ഞു.

നോട്ട് പിന്‍വലിച്ചതുമായി ബന്ധപ്പെട്ട പ്രതിസന്ധികള്‍ മറികടക്കാന്‍ കര്‍ഷകര്‍ക്ക് കൂടുതല്‍ ഇളവുകള്‍ കേന്ദ്രസര്‍ക്കാര്‍ പരിഗണനയിലുണ്ട്. കര്‍ഷകരെ സഹായിക്കാന്‍ ഗ്രാമീണ മേഖലകളിലേക്ക് നബാര്‍ഡ് 21,000 കോടി രൂപ അനുവദിച്ചു. ജില്ലാ സഹകരണ ബാങ്കുകളില്‍ വഴി ഈ പണം പ്രാഥമിക കര്‍ഷകസംഘങ്ങളിലേക്കെത്തും. ഗ്രാമങ്ങളിലെ 1.5 ലക്ഷം പോസ്റ്റ് ഓഫീസുകള്‍ വഴി പണം വിതരണം ചെയ്യും. പുതിയ 500,2000 നോട്ടുകളുടെ ലഭ്യത ഉറപ്പാക്കും.
ടോള്‍ പ്ലാസകളിലും ഡിജിറ്റല്‍ ഇടപാടുകള്‍ പ്രോത്സാഹിപ്പിക്കും. ഇതിനായി എല്ലാ പുതിയ കാറുകളിലും ഇടിസി കംപ്ലെയിന്റ് ആര്‍എഫ്‌ഐഡി സംവിധാനം ഉള്‍പ്പെടുത്താന്‍ എല്ലാ നിര്‍മ്മാതാക്കളോടും കേന്ദ്ര ഗതാഗത മന്ത്രാലയം ആവശ്യപ്പെട്ടിട്ടുണ്ട്. രാജ്യത്തെ ആകെയുള്ള രണ്ട് ലക്ഷം എടിഎമ്മുകളില്‍ ഏതാണ്ട് 80,000ത്തോളം എണ്ണം പുനക്രമീകരിച്ചു. കുറച്ചുദിവസത്തിനുള്ളില്‍ നോട്ടുക്ഷാമത്തിന് പരിഹാരമാകുമെന്ന് പ്രതീക്ഷിക്കാം.