നോട്ട് നിരോധന ത്തിന്റെ പേരില്‍ സര്‍ക്കാര്‍ സാധാരണക്കാരെ പ്രതിസന്ധിയിലാക്കിയതിനെതിരെ 28ന് പ്രതിപക്ഷ കക്ഷികള്‍ ദേശീയ തലത്തില്‍ പ്രതിഷേധദിനം ആചരിക്കും. പ്രധാനമന്ത്രി നരേന്ദ്ര മോദി ഇന്നലെ ലോക്‌സഭയില്‍ എത്തിയെങ്കിലും പ്രതിപക്ഷ ബഹളത്തില്‍ സഭ സ്തംഭിച്ചു.

ഇതിനിടെ, പ്രതിപക്ഷത്തെ അനുനയിപ്പിക്കാനുള്ള ശ്രമവുമായി സര്‍ക്കാരും രംഗത്തിറങ്ങി. പരിഷ്‌കരണ നടപടി പിന്‍വലിക്കില്ലെന്ന നിലപാടില്‍ സര്‍ക്കാര്‍ ഉറച്ചുനില്‍ക്കുന്നു. നോട്ട് പരിഷ്‌കരണ വിഷയത്തില്‍ പ്രതിപക്ഷ കക്ഷികളുമായി ചര്‍ച്ചയ്ക്കു നേതൃത്വം നല്‍കുന്നത് കേന്ദ്ര ആഭ്യന്തര മന്ത്രി രാജ്‌നാഥ് സിങ്ങാണ്. കോണ്‍ഗ്രസിലെ മല്ലികാര്‍ജുന്‍ ഖര്‍ഗേ, തൃണമൂല്‍ നേതാവ് സുധീപ് ബന്ധോപാധ്യായ എന്നിവരുമായി പാര്‍ലമെന്ററികാര്യ മന്ത്രി അനന്ത് കുമാര്‍ ഇന്നലെ ചര്‍ച്ച നടത്തിയിരുന്നു.

ഇന്നു രാവിലെ 10ന് ആണ് രാജ്‌നാഥ് വിവിധ കക്ഷികളുടെ സഭാനേതാക്കളെ കാണുന്നത്. പ്രധാനമന്ത്രി ചുമതല വഹിക്കുന്ന മന്ത്രാലയങ്ങളുടെ ചോദ്യങ്ങള്‍ക്കു മറുപടി നല്‍കുന്നതിനാണ് ഇന്നലെ മോദി ലോക്‌സഭയില്‍ എത്തിയത്. ഇന്നു ചോദ്യത്തിനു മറുപടിയുമായി രാജ്യസഭയിലും പ്രധാനമന്ത്രി എത്തും. എന്നാല്‍, നോട്ട് പരിഷ്‌കരണ വിഷയത്തില്‍ ഇടപെട്ടു സംസാരിക്കുമോ എന്നതില്‍ ഇനിയും ഉറപ്പു ലഭിച്ചിട്ടില്ല. അടിയന്തര പ്രമേയം അനുവദിക്കുന്നതു സംബന്ധിച്ച വിഷയത്തില്‍ വിവിധ കക്ഷിനേതാക്കള്‍ സംസാരിച്ചു. നോട്ടുപിന്‍വലിക്കലിലെ ജനഹിതം അറിയാന്‍ മൊബൈല്‍ ആപ്ലിക്കേഷനിലൂടെ ശ്രമിക്കുന്ന പ്രധാനമന്ത്രി വോട്ടിങ്ങിലൂടെ ജനഹിതം അറിയാന്‍ തയാറാകണമെന്ന് എന്‍.കെ. പ്രേമചന്ദ്രന്‍ പറഞ്ഞു.
ബിജെഡിയും എന്‍ഡിഎയുടെ ഭാഗമായ അകാലിദള്‍, ശിവസേന എന്നിവയും നോട്ട് പരിഷ്‌കരണത്തെ പിന്തുണച്ചെങ്കിലും ജനങ്ങളുടെ ബുദ്ധിമുട്ടില്‍ ആശങ്ക അറിയിച്ചു. ടിആര്‍എസ്, വൈഎസ്ആര്‍ കോണ്‍ഗ്രസ് തുടങ്ങിയ കക്ഷികള്‍ പ്രതിപക്ഷ ഐക്യത്തിനൊപ്പമില്ല. ചട്ടം 193നു കീഴില്‍ വോട്ടെടുപ്പില്ലാതെയുള്ള ചര്‍ച്ചയെങ്കിലും മതിയെന്ന നിലപാടിലാണ് ഈ കക്ഷികള്‍.

രാജ്യസഭയും കാര്യമായ നടപടികള്‍ കൂടാതെ പിരിഞ്ഞു. പാര്‍ലമെന്റ് സമ്മേളനകാലത്തു പുറത്തു പോയി നിലപാടുകള്‍ വ്യക്തമാക്കുന്ന പ്രധാനമന്ത്രിയുടെ നടപടിയെ വിവിധ കക്ഷിനേതാക്കള്‍ വിമര്‍ശിച്ചു. പ്രഖ്യാപിച്ചതൊന്നും പിന്‍വലിക്കുന്നതു പ്രധാനമന്ത്രിയുടെ രക്തത്തിലില്ലെന്ന് കേന്ദ്ര മന്ത്രി വെങ്കയ്യ നായിഡു പറഞ്ഞു. 500, 1000 രൂപയുടെ നോട്ടുകള്‍ അസാധുവാക്കിയ തീരുമാനത്തില്‍നിന്നു വ്യതിചലിക്കില്ലെന്നും വ്യാപാരികളുടെയും കര്‍ഷകരുടെയും സംഗമത്തില്‍ വെങ്കയ്യ കൂടിച്ചേര്‍ത്തു.