ഉത്തര്‍പ്രദേശില്‍ ദമ്പതികളെ ക്രൂരമായി തല്ലിച്ചതക്കുന്ന വീഡിയോ പുറത്ത്. ഇതിനെ തുടര്‍ന്ന് ബജ് റംഗ് ദളിനെ നിരോധിക്കണമെന്നാവശ്യപ്പെട്ട് പ്രമുഖ സാമൂഹ്യപ്രവര്‍ത്തകന്‍ ഷെഹ് സാദ് പൂനവല്ല ദേശീയ ന്യൂനപക്ഷ കമ്മീഷന് പരാതി നല്‍കി.

ഉത്തര്‍പ്രദേശിലെ ബുലന്ത്‌ഷെഹ്‌റിലെ ഖുര്‍ജയിലാണ് ഒരു സംഘം ബജ് റംഗ് ദള്‍ പ്രവര്‍ത്തകര്‍ മുസ്ലിം യുവാവിനെയും ഭാര്യയേയും അതി ക്രൂരമായി തല്ലിച്ചതച്ചത്. അയല്‍ക്കാരായ ഹിന്ദുക്കളെ 'മോശമാക്കുന്നു' എന്നാരോപിച്ചായിരുന്നു മര്‍ദ്ദനം.

മുസല്‍ മാനാണോ എന്ന് ചോദിച്ച് അക്രമിച്ചു പരിക്കേല്‍പ്പിക്കുന്ന ദൃശ്യങ്ങളാണ് വീഡിയോയിലുള്ളത്.

വടിയും മരത്തിന്റെ റീപ്പറും ഉപയോഗിച്ചാണ് സംഘം ദമ്ബതികളെ മര്‍ദ്ദിച്ചത്. സ്ത്രീ എന്ന പരിഗണന പോലും നല്‍കാതെ യുവാവിന്റെ ഭാര്യയെയും തല്ലരുതെന്ന് കേണുപറഞ്ഞിട്ടും അവശയായി നിലത്ത് വീണതിന് ശേഷവും നിര്‍ദയം വടി കൊണ്ട് അടിക്കുന്ന ഭാഗങ്ങളും വീഡിയോയിലുണ്ട്.

സംഭവത്തില്‍ അഞ്ചു പേരെ പോലീസ് അറസ്റ്റു ചെയ്തതായി ജനതാ കി റിപോര്‍ട്ടര്‍ പ്രസിദ്ധീകരിച്ച വാര്‍ത്തയില്‍ പറയുന്നു.

ബജ് റംഗ് ദള്‍ ലോക്കല്‍ കണ്‍ വീനര്‍ പ്രവീണ്‍ ഭാട്ടി, തനു സോളങ്കി, പുഷ്‌പേന്ദ്ര ചൗധരി, നിധിന്‍, സോനു എന്നിവരടക്കം 20 പേര്‍ക്കെതിരെ കേസെടുത്തിട്ടുണ്ട്.

ഇത്തരം സംഭവങ്ങള്‍ രാജ്യത്തിന്റെ നിയമ വ്യവസ്ഥിതിയെ വെല്ലുവിളിക്കുന്നതാണെന്നും ബജ് റംഗ് ദളിനെ നിരോധിക്കണമെന്നുമാണ് ഷെഹ് സാദ് പൂനവല്ല ദേശീയ ന്യൂനപക്ഷ കമ്മീഷന് നല്‍കിയ പരാതിയില്‍ പറയുന്നത്. ദാദ്രിയിലെയും ഗുജറാത്തിലും കര്‍ണാടകയിലും മറ്റിതര സംസ്ഥാനങ്ങളിലും ഈയടുത്ത് നടന്ന പല അക്രമ സംഭവങ്ങളും പരാതിയില്‍ ചൂണ്ടിക്കാട്ടുന്നുണ്ട്.