കുരങ്ങനെ തല്ലിക്കൊന്ന് മെഡിക്കല് വിദ്യാര്ത്ഥികളുടെ ക്രൂരത; കെട്ടിയിട്ട് കൈകാലുകള് തല്ലിയൊടിച്ചു; മനസാക്ഷിയെ ചോദ്യം ചെയ്ത് ചിത്രങ്ങളും ദൃശ്യങ്ങളും
നാളത്തെ ഡോക്ടര്മാരുടെ ക്രൂരമനസ്സ്. മനുഷ്യരുടേതായാലും മൃഗങ്ങളുടേതായാലും ജീവന് രക്ഷിക്കാന് ഉത്തരവാദിത്തപ്പെട്ടവരാണ് ഡോക്ടര്മാര്. എന്നാല് ആ കടമ വെല്ലൂര് ക്രിസ്ത്യന് മെഡിക്കല് കോളേജിലെ നാല് മെഡിക്കല് വിദ്യാര്ത്ഥികള് മറന്നു. ഹോസ്റ്റല് മുറിയില് കടന്ന കുരങ്ങിനെ അവര് കെട്ടിയിട്ട് കുത്തിക്കൊന്നു. മൃഗസ്നേഹിയും സാമൂഹ്യപ്രവര്ത്തകനുമായ ശ്രാവണ് കൃഷ്ണന് ആണ് മെഡിക്കല് വിദ്യാര്ത്ഥികളുടെ ക്രൂരതയില് പെണ് കുരങ്ങിനുണ്ടായ ദാരുണാന്ത്യം പുറംലോകത്തെ അറിയിച്ചത്.
കൃഷ്ണയുടെ ഫെയ്സ്ബുക്ക് പോസ്റ്റ് ഇപ്പോള് വൈറലായിരിക്കുകയാണ്. നാലായിരത്തിലധികം പേര് പോസ്റ്റ് ഷെയര് ചെയ്തിരിക്കുന്നു. കുരങ്ങിനുണ്ടായ ദാരുണാന്ത്യത്തില് വിഷമം അറിയിച്ചും വിദ്യാര്ത്ഥികളോടുള്ള രോഷം പ്രകടിപ്പിച്ചാണ് യൂസര്മാരുടെ പ്രതികരണങ്ങള്.
നവംബര് 19ന് ഞായറാഴ്ച്ചയാണ് സംഭവം. കുരങ്ങന്റെ കൈകാലുകള് കെട്ടിയിട്ടായിരുന്നു ക്രൂരത. വടികളും ബെല്റ്റും ഉപയോഗിച്ച് തല്ലിച്ചതച്ചു. എല്ലുകള് ഒടിച്ചു. മലദ്വാരത്തില് കമ്പി കയറ്റിയെന്ന് കൃഷ്ണന് ഫെയ്സ്ബുക്ക് പോസ്റ്റില് പറയുന്നു. കൊന്ന ശേഷം വിദ്യാര്ത്ഥികള് മെസ്സിന് പിന്നിലുള്ള ഹോസ്റ്റല് വളപ്പില് കുരങ്ങനെ കുഴിച്ചുമൂടി.
വിദ്യാര്ത്ഥികളുടെ ക്രൂരതയില് രോഷമുണ്ടായിരുന്ന ചില സഹപാഠികള് നടപടിയെടുക്കാന് ആവശ്യപ്പെട്ടെങ്കിലും കോളേജ് അധികൃതര് അതിന് തയ്യാറായില്ലെന്നും കൃഷ്ണന് പറഞ്ഞു. തുടര്ന്ന് ഹോസ്റ്റലിലെ വിദ്യാര്ത്ഥികളില് ഒരാള് മൃഗസംഘടനയായ പെറ്റയുടെ എമര്ജന്സി നമ്പറില് ബന്ധപ്പെട്ട് ക്രൂരതയെക്കുറിച്ച് പരാതിപ്പെട്ടു. തുടര്ന്ന് പെറ്റ ഇടപെട്ട് പൊലീസില് പരാതി നല്കി.
ചെന്നൈയില് നിന്നും മൂന്ന് സുഹൃത്തുക്കള്ക്കൊപ്പം എത്തി ഹോസ്റ്റല് വളപ്പില് കുഴിച്ചിട്ടിരുന്ന കുരങ്ങിന്റെ മൃതശരീരം പുറത്തെടുത്തപ്പോള് മിണ്ടാപ്രാണിയോടുള്ള ക്രൂരത കണ്ട് കോളേജ് മുഴുവന് ഞെട്ടി. കുരങ്ങനെ നിഷ്ടൂരമായി കൊന്ന വിദ്യാര്ത്ഥികള്ക്കെതിരെ കര്ശന നടപടിയുണ്ടാകുമെന്ന് തത്സമയം അവിടെയുണ്ടായിരുന്ന കോളേജ് പ്രിന്സിപ്പല് അറിയിച്ചതായും കൃഷ്ണ പറഞ്ഞു. കുരങ്ങിന്റെ എല്ലുകളെല്ലാം പൊട്ടിയ നിലയില് ആയിരുന്നു. കഴുത്തില് ടെലിഫോണ് വയറിട്ട് കുരക്കിയിരുന്നു. ആ കാഴ്ച്ച ഹൃദയഭേദകം ആയിരുന്നുവെന്നും കൃഷ്ണ പറയുന്നു.
സംഭവത്തില് പൊലീസ് കേസെടുത്തതിന് പിന്നാലെ നാല് വിദ്യാര്ത്ഥികളെ കോളേജ് സസ്പെന്ഡ് ചെയ്തു. ഇതുവരെ അറസ്റ്റുണ്ടായിട്ടില്ല. ക്രൂരതയില് നവമാധ്യമങ്ങളിലും പ്രതിഷേധം ശക്തമായിട്ടുണ്ട്. മെഡിക്കല് വിദ്യാര്ത്ഥികള്ക്ക് കര്ശന ശിക്ഷ നല്കണമെന്നാണ് എല്ലാവരുടേയും ആവശ്യം.
ടെറസില് നിന്നും നായയെ താഴേക്ക് വലിച്ചെറിഞ്ഞ ചെന്നൈയില് നിന്നുള്ള മെഡിക്കല് വിദ്യാര്ത്ഥികളുടെ ക്രൂരത നേരത്തെ വ്യാപക പ്രതിഷേധത്തിന് ഇടയാക്കിയിരുന്നു. മൃഗസംഘടനകളുടെ പരാതിയില് അന്ന് അറസ്റ്റുമുണ്ടായി.
https://www.facebook.com/Malayalivartha
