നാലോ, അതിലധികമോ ചക്രങ്ങളുള്ള വാഹന ഉടമകളെ തേടി ഭക്ഷ്യവകുപ്പിന്റെ നോട്ടീസ്
നാലോ, അതിലധികമോ ചക്രങ്ങളുള്ള വാഹന ഉടമകളെ തേടി ഭക്ഷ്യവകുപ്പിന്റെ നോട്ടീസ് വീട്ടിലെത്തും. അനര്‍ഹരെ കണ്ടെത്തി മുന്‍ഗണനാ പട്ടികയില്‍ നിന്ന് ഒഴിവാക്കാനുള്ള നടപടിയുടെ രണ്ടാം ഘട്ടമാണിത്. ഉപജീവനത്തിനല്ലാതെ വലിയ വാഹനങ്ങള്‍ സ്വന്തമായുള്ളവര്‍ സമ്പന്നരുടെ പട്ടികയിലാണ്. ഇവരെ കണ്ടെത്താന്‍ മോട്ടോര്‍ വാഹന വകുപ്പിന്റെ സഹായവും തേടിയിട്ടുണ്ട്. ഇവരില്‍ ആര്‍ക്കെങ്കിലും മുന്‍ഗണനാ കാര്‍ഡുണ്ടെങ്കില്‍ റദ്ദാക്കി പകരം ജനറല്‍ കാര്‍ഡ് നല്‍കും. രണ്ട് ലക്ഷത്തോളം പേരെ ഇത്തരത്തില്‍ കണ്ടെത്താനാവുമെന്നാണ് കണക്കുകൂട്ടല്‍. സര്‍ക്കാര്‍ ശമ്പളവും പെന്‍ഷനും വാങ്ങുന്ന ഒന്നര ലക്ഷത്തില്‍പ്പരം മുന്‍ഗണനാ കാര്‍ഡുകാരെ നേരത്തേ ലിസ്റ്റില്‍ നിന്ന് ഒഴിവാക്കിയിരുന്നു.
ഉപജീവനാവശ്യത്തിനായി കാര്‍, വാന്‍, ലോറി തുടങ്ങിയവ വാങ്ങി ഉപയോഗിക്കുന്നവരെ മുന്‍ഗണനാപട്ടികയില്‍ നിന്ന് ഒഴിവാക്കില്ല. ബിസിനിസ് ആവശ്യത്തിനും സ്വന്തം ആവശ്യത്തിനും ഉപയോഗിക്കുന്നവര്‍ക്കാണ് പിടി വീഴുക. ഇവരില്‍ അര്‍ഹരായവര്‍ക്ക് പൊതുവിഭാഗം സബ്‌സിഡി കാര്‍ഡ് (നീല) നല്‍കും. അല്ലാത്തവര്‍ക്ക് ജനറല്‍ (വെള്ള) കാര്‍ഡും.
ഭക്ഷ്യ വകുപ്പിന്റെ നോട്ടീസ് വരുന്നതിന് മുന്‍പ് സ്വയം ഒഴിവാകാനും അവസരം ഉണ്ട്. ബന്ധപ്പെട്ട താലൂക്ക് സപ്‌ളൈ ഓഫീസര്‍ക്കോ, സിറ്റി റേഷനിംഗ് ഓഫീസര്‍ക്കോ അപേക്ഷ നല്‍കിയാല്‍ മതി. സ്വയം ഒഴിയാത്തവര്‍ക്ക് നോട്ടീസ് ലഭിച്ചിട്ടും കാരണം ബോധിപ്പിച്ചില്ലെങ്കില്‍ അടുത്ത മാസം മുതല്‍ റേഷന്‍ കിട്ടില്ല.
അര്‍ഹതയുണ്ടായിട്ടും മുന്‍ഗണനാ പട്ടികയില്‍ നിന്ന് പുറത്തായതായി കാണിച്ച് ആറ് ലക്ഷം പരാതികളാണ് ലഭിച്ചത്. ഇതില്‍ 60 ശതമാനം പരിശോധിച്ചതില്‍ തന്നെ, ഏറെയും മുന്‍ഗണനാ കാര്‍ഡിന് അര്‍ഹരാണെന്നാണ് കണ്ടെത്തിയത്. പരിശോധന തീരുമ്പോള്‍ അഞ്ച് ലക്ഷത്തോളം പേരെ മുന്‍ഗണനാ പട്ടികയില്‍ വീണ്ടും ഉള്‍പ്പെടുത്തേണ്ടി വന്നേക്കും. മുന്‍ഗണനാ ഉപഭോക്താക്കളുടെ എണ്ണം കൂട്ടാനാവാത്ത സാഹചര്യത്തിലാണ് അനര്‍ഹരെ തട്ടുന്നത്. പൊതുവിതരണ രംഗം കുറ്റമറ്റതാക്കാനുള്ള സര്‍ക്കാര്‍ ശ്രമത്തിന്റെ ഭാഗമാണിത് .
സ്വന്തമായി കാറുണ്ടോ? ബസോ, വാനോ ഉണ്ടോ?. റേഷന്‍ കാര്‍ഡ് ഏത് നിറമായാലും ഉടനേ വെളുക്കും.
https://www.facebook.com/Malayalivartha
