എച്ച്ഐവി ബാധിതയ്ക്ക് ചികിത്സ നിഷേധിച്ച് സര്ക്കാര് ആശുപത്രി
എച്ച്.ഐ.വി ബാധിതയായതിനാല് 20കാരിക്ക് ഭോപ്പാലിലെ സര്ക്കാര് ആശുപത്രി ചികിത്സ നിഷേധിച്ചതായി കുടുംബത്തിന്റെ പരാതി. ഭോപ്പാലിലെ ഏറ്റവും വലിയ സര്ക്കാര് ആശുപത്രികളിലൊന്നായ സുല്താനിയ ആണ് എച്ച്.ഐ.വി ബാധിതക്ക് ചികിത്സ നിഷേധിച്ചത്. ഗര്ഭിണിയായ യുവതിയെ മധ്യപ്രദേശ് മുഖ്യമന്ത്രി ശിവരാജ് സിങ് ചൗഹാന്റെ മണ്ഡലമായ സെഹോറിലെ ആശുപത്രിയിലായിരുന്നു ആദ്യം പ്രവേശിപ്പിച്ചത്.
രക്തത്തിലെ ഹീമോഗ്ലോബിന്റെ അളവ് അപകടകരമായ അളവില് താഴ്ന്നതിനാല് മികച്ച ചികിത്സക്കായി 40 കിലോമീറ്റര് അകലെയുള്ള സുല്താനിയ ആശുപത്രിയിലേക്ക് യുവതിയെ കൊണ്ട് പോവാന് ഡോക്ടര്മാര് നിര്ദേശിക്കുകയായിരുന്നു. അര്ധരാത്രി സുല്താനിയ ആശുപത്രിയില് എത്തിയെങ്കിലും യുവതി എച്ച്.ഐ.വി പോസിറ്റീവ് ആണെന്ന് കണ്ടതും ആശുപത്രി അധികൃതര് ചികിത്സ നിഷേധിച്ചു.
ചികിത്സ നല്കണമെന്ന കുടുംബത്തിന്റെ അപേക്ഷ പരിഗണിക്കാത്ത സാഹചര്യത്തില് രോഗിക്കും കുടുംബത്തിനും സെഹോറിലേക്ക് തിരികെ പോവേണ്ടിയും വന്നു. നാലു മണിക്കൂര് നേരം കാത്ത് നിന്നതായും അധികൃതര് കയര്ത്ത് സംസാരിച്ചെന്നും കുടുംബം പരാതിപ്പെട്ടു. സംഭവം വിവാദമായതോടെ വിശദീകരണവുമായി രംഗത്തെത്തിയ ആശുപത്രി മേല്നോട്ടകാരന് കരണ് പീപ്രേ സംഭവം സത്യമാണെങ്കില് നടപടിയെടുക്കുമെന്ന് അറിയിച്ചു.
എച്ച്.ഐ.വി ബാധിതക്ക് ചികിത്സ നിഷേധിച്ച സംഭവത്തില് മുഖ്യമന്ത്രി ശിവരാജ് സിങ് ചൗഹാന് മാപ്പ് പറയണമെന്ന് ആവശ്യപ്പെട്ട് കോണ്ഗ്രസ് രംഗത്തെത്തി. എച്ച്.ഐ.വി ബാധിത എന്നത് മൂലം യുവതി വിവേചനം നേരിട്ടിട്ടില്ലെന്നാണ് ബി.ജെ.പിയുടെ നിലപാട്.
https://www.facebook.com/Malayalivartha
