ഇന്നലെ വൈകിട്ട് മുതല്‍ കാണാതായ സൈനികനെ മരിച്ചനിലയില്‍ കണ്ടെത്തി. ഇന്നു രാവിലെ ദക്ഷിണ കശ്മീരിലെ ഷോപിയാനിലാണ് മൃതദേഹം കണ്ടെത്തിയത്. വെടിയുണ്ടകള്‍ തറച്ചുകയറിയ നിലയിലാണ് സൈനികനായ ഇമ്രാന്‍ അഹമ്മദ് ദറിന്റെ മൃതദേഹം കണ്ടെത്തിയത്.

അവധി എടുത്ത് വീട്ടിലെത്തിയതായിരുന്നു 23കാരനായ സൈനികന്‍. ദറിനെ ഭീകരര്‍ തട്ടിക്കൊണ്ടുപോയി കൊലപ്പെടുത്തിയതാണോയെന്ന് അന്വേഷിച്ചുവരികയാണെന്ന് പോലീസ് പറഞ്ഞു.

ടെറിറ്റോറിയല്‍ ആര്‍മിയില്‍ സൈനികനായ ദര്‍ നിയന്ത്രണ രേഖയ്ക്കു സമീപം ഗുര്‍സിലെ എന്‍ജിനീയറിംഗ് റെജിമെന്റില്‍ ആണ് നിയമിക്കപ്പെട്ടിരുന്നത്.ഇന്നലെ വൈകിട്ട് തന്റെ കാറില്‍ വീട്ടില്‍ നിന്ന് പുറത്തേക്ക് പോയ ദറിനെ പിന്നീട് കാണാതാവുകയായിരുന്നു. ഇന്നു രാവിലെ മൃതദേഹമാണ് കണ്ടെത്തിയത്. പ്രദേശത്തുനിന്നും ഒരുകിലോമീറ്റര്‍ അകലെ വാഹനം കണ്ടെടുത്തിട്ടുണ്ട്. 

സംഭവത്തില്‍ മുഖ്യമന്ത്രി മെഹ്ബൂബ മുഫ്ത്തിയും മുന്‍ മുഖ്യമന്ത്രി ഒമര്‍ അബ്ദുള്ളയും അപലപിച്ചു. ഈ വര്‍ഷം അവധിയിലായിരിക്കേ കൊല്ലപ്പെടുന്ന മൂന്നാമത്തെ സൈനികനാണ് അഹമ്മദ് ദര്‍. മേയില്‍ ലഫ്റ്റനന്റ് ഉമര്‍ ഫയാസിനെ ഒരു വിവാഹ ചടങ്ങില്‍ നിന്നും പിടിച്ചുവലിച്ചുകൊണ്ടുപോയി ഭീകരര്‍ വെടിവച്ചുകൊന്നിരുന്നു. സെപ്തംബറില്‍ ബി.എസ്.എഫ് സൈനികനായ മുഹമ്മദ് റംസാന്‍ പാരെയ് വീട്ടില്‍ നിന്നും തട്ടിക്കൊണ്ടുപോയി കൊലപ്പെടുത്തിയിരുന്നു.