ബാങ്ക് അക്കൗണ്ടുകള്‍, മൊബൈല്‍ നമ്പറുകള്‍ തുടങ്ങി വിവിധ സേവനങ്ങള്‍ക്ക് ആധാര്‍ നിര്‍ബന്ധമാക്കുന്നതിനെതിരെ സമര്‍പ്പിച്ച ഹര്‍ജിയില്‍ സുപ്രീംകോടതിയുടെ അഞ്ചംഗ ഭരണഘടന ബെഞ്ച് വെള്ളിയാഴ്ച വിധി പുറപ്പെടുവിക്കും.

ഹര്‍ജികളില്‍ അന്തിമ വാദം ജനുവരി 10ന് ആരംഭിക്കുമെന്നും സുപ്രീംകോടതി വ്യക്തമാക്കി. ആധാറുമായി ബന്ധപ്പെട്ട് നേരത്തേ സുപ്രീംകോടതി പുറപ്പെടുവിച്ച ഉത്തരവുകള്‍ കേന്ദ്ര സര്‍ക്കാര്‍ പലതവണ ലംഘിച്ചതായി ഹരജിക്കാര്‍ക്കുവേണ്ടി ഹാജരായ മുതിര്‍ന്ന അഭിഭാഷകന്‍ ശ്യാം ദിവാന്‍ ബോധിപ്പിച്ചു.

ഇത്തരം വിജ്ഞാപനങ്ങളിലൂടെ സുപ്രീംകോടതിയുടെ പദവി ഇടിച്ചുതാഴ്ത്തുകയാണ് കേന്ദ്ര സര്‍ക്കാര്‍ ചെയ്തതെന്നും ദിവാന്‍ പറഞ്ഞു. എന്നാല്‍, ആധാറുമായി ബന്ധപ്പെട്ട് കേന്ദ്ര സര്‍ക്കാര്‍ പുറപ്പെടുവിച്ച എല്ലാ ഉത്തരവുകളും 2016ലെ ആധാര്‍ നിയമം അനുസരിച്ചാണെന്ന് അറ്റോണി ജനറല്‍ കെ.കെ. വേണുഗോപാല്‍ വാദിച്ചു. അനധികൃത പണമിടപാട് തടയുന്ന 2002ലെ നിയമത്തില്‍ ഭേദഗതി കൊണ്ടുവന്നാണ് ബാങ്ക് അക്കൗണ്ടുകളും പെര്‍മനന്റ് അക്കൗണ്ട് നമ്പറും (പാന്‍) ആധാറുമായി ബന്ധിപ്പിക്കണമെന്ന് സര്‍ക്കാര്‍ വ്യവസ്ഥ വെച്ചതെന്നും വേണുഗോപാല്‍ പറഞ്ഞു. മുതിര്‍ന്ന അഭിഭാഷകരായ അരവിന്ദ് ദത്താര്‍, ഗോപാല്‍ സുബ്രഹ്മണ്യം എന്നിവരും ഹരജിക്കാര്‍ക്കുവേണ്ടി വാദങ്ങള്‍ ഉന്നയിച്ചു.

ബാങ്ക് അക്കൗണ്ടുകള്‍ ആധാറുമായി ബന്ധിപ്പിക്കുന്നതിനുള്ള സമയപരിധി മാര്‍ച്ച് 31 വരെയായി കേന്ദ്ര സര്‍ക്കാര്‍ നീട്ടിയിരുന്നു. മൊബൈല്‍ നമ്പറുകള്‍ അടുത്ത വര്‍ഷം ഫെബ്രുവരി ആറിനകം ആധാറുമായി ബന്ധിപ്പിച്ചാല്‍ മതിയെന്ന നിലപാടില്‍ സര്‍ക്കാര്‍ മാറ്റമൊന്നും വരുത്തിയിട്ടില്ല.