ജാതി രാഷ്ട്രീയത്തെ കോണ്‍ഗ്രസ് കൂട്ട്പിടിച്ചതോടെയാണ് ഗുജറാത്തില്‍ ബി.ജെ.പിക്ക് വെല്ലുവിളി ഉയര്‍ന്നത്. അതിന് പിന്നാലെ ജി.എസ്.ടിയും നോട്ട് നിരോധനവും ജനങ്ങളില്‍ ഉണ്ടാക്കിയ നീരസവും പ്രശ്‌നമായിരുന്നു. ഇതിനെയെല്ലാം മോദി നേരിട്ടത് ആറ് കാര്യങ്ങളിലൂടെയാണ്. ഇവ ഇതാണ്.

അയ്യരുടെ നാക്ക്

തെരഞ്ഞെടുപ്പിന്റെ പടിവാതില്‍ക്കല്‍ വെച്ചാണ് മുതിര്‍ന്ന കോണ്‍ഗ്രസ് നേതാവ് മണിശങ്കര്‍ അയ്യര്‍ മോദിക്കെതിരെ വ്യക്തിപരമായ ആക്ഷേപം ഉന്നയിച്ചത്. ഇതോടെ അയ്യര്‍ തന്നെ താഴ്ന്നജാതിക്കാരനെന്ന് അധിക്ഷേപിച്ചെന്ന് മോദി തെരഞ്ഞെടുപ്പ് റാലികളില്‍ വ്യക്തമാക്കി. ഇത് പിന്നോക്കക്കാരിലും മറ്റും അനുകമ്പ തരംഗം ഉണ്ടാക്കാനായി. സംഭവം വിവാദമായതോടെ അയ്യരെ കോണ്‍ഗ്രസില്‍ നിന്ന് പുറത്താക്കിയിരുന്നു. 

ജി.എസ്.ടി

വ്യാപാരികള്‍ ജി.എസ്.ടിക്കെതിരെ രംഗത്ത് വന്നതോടെ തെരഞ്ഞെടുപ്പിന് മുമ്പ് ജി.എസ്.ടി നിരക്ക് മോദി കുറച്ചു. പിന്നാലെ ജി.എസ്.ടിയുടെ നടപടിക്രമങ്ങള്‍ ലഘൂകരിക്കുകയും ചെയ്തു. ഇത് ഒരുപരിധി വരെ ബി.ജെ.പിക്ക് രക്ഷയായി.

കര്‍ഷക വായ്പ എളുപ്പമാക്കി

ഗ്രാമീണ മേഖലയില്‍ ബി.ജെ.പിക്ക് വോട്ട് കുറവാണ്. ഇത് ലക്ഷ്യമാക്കി കര്‍ഷകര്‍ക്ക് മൂന്ന് ലക്ഷം രൂപയുടെ പലിശരഹിത വായ്പ മുഖ്യമന്ത്രി വിജയ് രൂപാണി പ്രഖ്യാപിച്ചു. ഇത് 25 ലക്ഷത്തോളം കര്‍ഷകര്‍ക്ക് പ്രയോജനം ചെയ്തു.

പാക്കിസ്ഥാന്‍ ഇഫക്ട്

പാക്കിസ്ഥാനെ കൂട്ടുപിടിച്ച് തനിക്കെതിരെ നീക്കം നടത്താന്‍ കോണ്‍ഗ്രസ് നേതാക്കളായ മന്‍മോഹന്‍സിംഗും മണിശങ്കര്‍ അയ്യരും ശ്രമിച്ചെന്ന് നരേന്ദ്രമോദി ആരോപിച്ചു. ഇരുവരും പാക്ക് ഹൈക്കമ്മിഷണറെ കണ്ടെന്നും അത് എന്തിനാണെന്ന് വ്യക്തമാക്കണമെന്നും മോദി ആവശ്യപ്പെട്ടു. ഇതിന് കോണ്‍ഗ്രസ് നല്‍കിയ മറുപടി അത്ര തൃപ്തികരമായിരുന്നില്ല. 

ഹാര്‍ദിക് ടേപ്പ്

പട്ടേല്‍ സമുദായത്തിന് സംവരണം ആവശ്യപ്പെട്ട് പ്രക്ഷോഭം നടത്തുന്ന ഹാര്‍ദിക് പട്ടേലിനെതിരായ നിരവധി സെക്‌സ് ടേപ്പുകള്‍ തെരഞ്ഞെടുപ്പ് സമയത്ത് ബി.ജെ.പി പുറത്ത് വിട്ടു. ഇത് യാഥാസ്ഥിതികരായ പട്ടേല്‍ സമുദായങ്ങളുടെ പിന്തുണ നേടുന്നതിന് ബി.ജെ.പിയെ സഹായിച്ചു. 

നിസാമിയുടെ പ്രചരണം

കാശ്മിരി വിഘടനവാദി നേതാവ് സല്‍മാന്‍ നിസാമിക്കൊപ്പം കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി തെരഞ്ഞെടുപ്പ് പ്രചരണ പരിപാടികളില്‍ പങ്കെടുത്തതിനെ മോദി രൂക്ഷമായി വിമര്‍ശിച്ചു. സല്‍മാന്‍ നിസാമിയുടെ അഫ്‌സല്‍ ഗുരു അനുകൂല ട്വീറ്റുകള്‍ രാജ്യദ്രോഹമാണെന്നും മോദി റാലികളില്‍ ആവര്‍ത്തിച്ചു. ഇതിലൂടെ ഇന്ത്യ അനുകൂല വികാരം വളര്‍ത്തിയെടുക്കാനും മോദിക്കായി.