ഗുജറാത്തില്‍ ബി.ജെ.പി ആറാം തവണയും അധികാരത്തിലേറുമ്പോള്‍ അത് പ്രധാനമന്ത്രി നരേന്ദ്രമോദിയുടെ വിജയം തന്നെയാണ്. ഈ വിജയത്തിലും കയ്‌പ്പേറിയ അനുഭവങ്ങള്‍ മോദിക്കും പാര്‍ട്ടി അധ്യക്ഷന്‍ അമിത്ഷായ്ക്കും തിരിച്ചടിയാകുന്നു. ജനവിധി ഉള്‍ക്കൊണ്ട് പ്രവര്‍ത്തിച്ചില്ലെങ്കില്‍ 2019ലെ ലോക്‌സഭാ തെരഞ്ഞെടുപ്പില്‍ മോദിക്കും കൂട്ടര്‍ക്കും ഏറെ വിയര്‍പ്പൊഴിക്കേണ്ടിവരും. ജി.എസ്.ടിയും നോട്ട്‌നിരോധനവും വരുത്തിവച്ച ദുരിതത്തിന് ചെറിയതോതിലെങ്കിലും ജനങ്ങള്‍ ബി.ജെ.പിക്ക് തിരിച്ചടി നല്‍കി. 2012ല്‍ 115 സീറ്റുമായി അധികാരത്തിലേറിയ ബി.ജെ.പിക്ക് ഇത്തവണ 100 സീറ്റ് കടക്കാനാവുമോ എന്ന ആശങ്കയുണ്ട്. അതേസമയം കോണ്‍ഗ്രസിന് നിലമെച്ചപ്പെടുത്താനുമായി. 

ജാതി സമവാക്യങ്ങളാണ് പ്രധാനമായും തെരഞ്ഞെടുപ്പിനെ പ്രധാനമായും സ്വാധീനിച്ചത്. പട്ടേല്‍ സമുദായത്തിന് സംവരണം വേണമെന്ന് ആവശ്യപ്പെട്ട് രണ്ട് വര്‍ഷമായി പ്രക്ഷോഭം നടത്തുന്ന ഹാര്‍ദിക് പട്ടേല്‍ ഇത്തവണ ബി.ജെ.പിക്കെതിരെ ശക്തമായ പരിപാടികളാണ് സംഘടിപ്പിച്ചത്. റാലികളിലുടനീളം അദ്ദേഹം മോദിക്കും ബി.ജെ.പിക്കും എതിരെ ആഞ്ഞടിച്ചു. കോണ്‍ഗ്രസുമായി സംഖ്യമുണ്ടാക്കിയ ഹാര്‍ദികിന് അവരുടെ സ്ഥാനാര്‍ത്ഥിയെ മാറ്റി തന്റെ ആളെ മല്‍സരിപ്പിക്കാനുമായി. ദളിത് നേതാവായ ജിഗ്‌നേഷ് മേവാനി വിജയിച്ചു. കോണ്‍ഗ്രസുമായി ജിഗ് നേഷ് നല്ല ബന്ധമാണ് നിലനിര്‍ത്തിയത്. രാഹുല്‍ഗാന്ധി ജിഗ്‌നേഷുമായും ഹാര്‍ദികുമായും ചര്‍ച്ചകള്‍ നടത്തിയിരുന്നു. ബി.ജെ.പി അതൊന്നും കാര്യമായി എടുത്തിരുന്നില്ല.

പിന്നോക്ക വിഭാഗത്തിലെ യുവനേതാവ് അല്‍പേഷ് ഠാക്കൂറും വിജയിച്ചു. കോണ്‍ഗ്രസിനോട് അനുഭാവം പ്രകടിപ്പിക്കുന്നയാളാണ് അല്‍പേഷ്. രാഹുല്‍ ഗാന്ധിയെ പപ്പുവെന്നും മറ്റും വിളിച്ച് അധിഷേപിച്ചാണ് ബി.ജെ.പി നേതാക്കള്‍ നടന്നിരുന്നത്. തെരഞ്ഞെടുപ്പിന്റെ പ്രചരണഘട്ടത്തില്‍ രാഹുല്‍ വ്യക്തമായ ആധിപത്യം സ്ഥാപിച്ചതോടെ ബി.ജെ.പി പരിഭ്രാന്തരായി. വികസനത്തിന്റെ കാര്യങ്ങളൊന്നും ചര്‍ച്ച ചെയ്യാതെ അവര്‍ ജാതിയും കപടദേശീയതും കളത്തിലിറക്കി. പ്രധാനമന്ത്രി നരേന്ദ്രമോദി ജലവിമാനത്തില്‍ വരെ പ്രചരണം നടത്തി. എന്നിട്ടും പഴയ തെളിമയില്ലാതെയാണ് അധികാരം നിലനിര്‍ത്താനായത്. 

150 സീറ്റുമായി അധികാരത്തിലേറുമെന്ന് പറഞ്ഞാണ് അമിത്ഷാ ഗുജറാത്തില്‍ തെരഞ്ഞെടുപ്പിനിറങ്ങിയത്. നല്ല പോലെ വിയര്‍പ്പൊഴുക്കിയിട്ടും 2012ലെ സീറ്റ് നിലയായ 115 കടക്കാനാകാത്ത പരുങ്ങലിലാണ് പാര്‍ട്ടി. മുന്നോക്കക്കാരിലെ ബ്രാഹ്മണരെയും കയ്യിലെടുക്കാന്‍ ബി.ജെ.പിക്കായില്ലെന്നാണ് ദേശീയമാധ്യമങ്ങള്‍ വിലയിരുത്തുന്നത്. നഗരങ്ങളിലെല്ലാം ബി.ജെ.പി തങ്ങളുടെ ആധിപത്യം നിലനിര്‍ത്തി. വര്‍ഷങ്ങളായി ഇതാണ് തുടരുന്നത്. ഗ്രാമങ്ങളില്‍ കോണ്‍ഗ്രസ് വാഴ്ച തുടരുകയാണ്. കര്‍ഷകരുടെ പ്രശ്‌നങ്ങളോ, ജി.എസ്.ടിയിലെ അപാകതളോ പൂര്‍ണമായും പരിഹരിക്കാന്‍ ബി.ജെ.പിക്ക് ആയിട്ടില്ല. പട്ടേല്‍ വിഭാഗം അടക്കമുള്ളവരുടെ വിശ്വാസം വീണ്ടെടുക്കേണ്ടതുണ്ട്. അതെല്ലാം ജനഹിതമായി നടപ്പാക്കിയാല്‍ മാത്രമേ 2019ല്‍ ഗുജറാത്തില്‍ തിളക്കമാര്‍ന്ന വിജയം നേടാന്‍ മോദിക്കും അമിത്ഷായ്്ക്കും കഴിയൂ.