ആര്‍.കെ നഗര്‍ ഉപതെരഞ്ഞെടുപ്പിന് മുന്നോടിയായി ജയലളിത ചികില്‍സയില്‍ കഴിഞ്ഞ സമയത്തെ വീഡിയോ പുറത്ത് വിട്ട ദിനകരന്‍ പക്ഷത്തിന് തിരിച്ചടി. വീഡിയോ സംപ്രേക്ഷണം ചെയ്യരുതെന്ന് തെരഞ്ഞെടുപ്പ് കമ്മിഷന്‍ നിര്‍ദ്ദേശം നല്‍കി. ജയലളിതയ്ക്ക് നല്ല ചികില്‍സ നല്‍കിയില്ലെന്ന പന്നീര്‍സെല്‍വത്തിന്റെയും എടപ്പാടി പളനിസ്വാമിയുടെയും ആരോപണങ്ങള്‍ക്ക് മറുപടിയായാണ് ഇന്ന് രാവിലെ വീഡിയോ പുറത്ത് വിട്ടത്. പ്രവര്‍ത്തകര്‍ക്കിടയില്‍ വികാരം ഇളക്കിവിട്ട് വോട്ട് നേടുകയായിരുന്നു ദിനകരന്റെ ലക്ഷ്യം. അശുപത്രി വീഡിയോ കൈവശമുണ്ടെന്ന് കഴിഞ്ഞ സെപ്തംബറില്‍ ദിനകരന്‍ വെളിപ്പെടുത്തിയിരുന്നു. 

ജയലളിതയുടെ മരണത്തെ കുറിച്ച് അന്വേഷിക്കുന്ന ജുഡീഷ്യല്‍ കമ്മിഷന് മുമ്പാകെ വീഡിയോ സമര്‍പ്പിക്കുമെന്നായിരുന്നു ദിനകരന്‍ പറഞ്ഞിരുന്നത്. എന്നാല്‍ ഉപതെരഞ്ഞെടുപ്പില്‍ നിലപരുങ്ങലിലായതോടെ അവസാന അടവ് എന്ന നിലയ്ക്കാണ് വീഡിയോ മാധ്യമങ്ങള്‍ക്ക് ചോര്‍ത്തിക്കൊടുത്തത്. ജയലളിത ആശുപത്രിയിലായിരുന്ന സമയത്ത് ശശികലയല്ലാതെ മറ്റാരെയും കടത്തിവിടാന്‍ അനുവദിച്ചില്ലെന്ന് മന്ത്രിമാര്‍ ഉള്‍പ്പെടെ വിമര്‍ശനം ഉന്നയിച്ചിരുന്നു. രണ്ടരമാസത്തെ ചികില്‍സയ്ക്ക് ശേഷമാണ് ജയലളിത 2016 ഡിസംബര്‍ അഞ്ചിന് മരിച്ചത്. അതിന് ശേഷമാണ് ശശികല ഇടപെട്ട് മുഖ്യമന്ത്രിയായിരുന്ന പന്നീര്‍ സെല്‍വത്തെ മാറ്റിയത്. പിന്നാലെ ഇടപ്പാടി പളനിസ്വാമിയെ മുഖ്യമന്ത്രിയുമാക്കി.

അനധികൃതസ്വത്ത് സമ്പാദനക്കേസില്‍ ശശികല അറസ്റ്റിലായതോടെ ദിനകരന്റെയും കൂട്ടരുടെയും നീക്കങ്ങള്‍ കീഴ്‌മേല്‍മറിഞ്ഞു. ദിനകരനെയും ശശികലയെയും പാര്‍ട്ടിയില്‍ നിന്ന് പുറത്താക്കി. ഇ.പി.എസും ഒ.പി.എസും പരസ്പ്പര ധാരണയില്‍ എത്താന്‍ ശ്രമിച്ചെങ്കിലും നടന്നില്ല. എങ്കിലും ശശികലയ്ക്കും ദിനകരനും എതിരെ ഇരുവരും ശക്തമായനിലപാടെടുത്ത് മുന്നോട്ട് പോവുകയാണ്. ജയലളിതയുടെ മണ്ഡലമായ ആര്‍.കെ നഗറില്‍ ശശികല മല്‍സരിക്കാനിരുന്നതാണ്. ഈ സീറ്റ് എങ്ങനെയും നിലനിര്‍ത്താനാണ് സര്‍ക്കാര്‍ ശ്രമിക്കുന്നത്.