പഞ്ചാബ് നാഷണല്‍ ബാങ്കിന്റെ 11,300 കോടി രൂപ രത്‌നവ്യാപാരി നീരവ് മോദി തട്ടിയെടുത്തതിന് പിന്നാലെ, റോട്ടോമാക് പേന കമ്പനി ഉടമ വിക്രം കോത്താരി അഞ്ച് പൊതു മേഖലാ ബാങ്കുകളെ ആയിരം കോടിയിലേറെ രൂപ കബളിപ്പിച്ച വിവരവും പുറത്തുവന്നു. ബാങ്കുകളില്‍ നിന്ന് വായ്പയെടുത്ത തുക തിരിച്ചടയ്ക്കാതെ കോത്താരി വിദേശത്തേക്ക് മുങ്ങിയെന്നാണ് റിപ്പോര്‍ട്ട്. ഒരാഴ്ചയായി കാണ്‍പൂര്‍ സിറ്റി സെന്ററിലെ വിക്രം കോത്താരിയുടെ ഓഫീസ് അടഞ്ഞു കിടക്കുകയാണ്. കോത്താരിയെക്കുറിച്ച് ഒരു വിവരവും ഇതുവരെയില്ല.
അതേസമയം, കോത്താരിയുടെ സ്വത്തുക്കള്‍ വിറ്റ് പണം വീണ്ടെടുക്കാമെന്ന് പ്രതീക്ഷിക്കുന്നതായി അലഹാബാദ് ബാങ്കിന്റെ മാനേജര്‍ രാജേഷ് ഗുപ്ത പറഞ്ഞു. യൂണിയന്‍ ബാങ്ക്, അലഹബാദ് ബാങ്ക്, ബാങ്ക് ഒഫ് ഇന്ത്യ, ബാങ്ക് ഒഫ് ബറോഡ, ഇന്ത്യന്‍ ഓവര്‍സീസ് ബാങ്ക്, എന്നിവയാണ് ചട്ടങ്ങള്‍ ലംഘിച്ച് കോത്താരിക്ക് വായ്പ അനുവദിച്ചത്. യൂണിയന്‍ ബാങ്ക് 485 കോടി രൂപയും അലഹബാദ് ബാങ്ക് 352 കോടി രൂപയുമാണ് നല്‍കിയത്. ഇത് മാത്രം 837 കോടി വരും.
മറ്റ് ബാങ്കുകള്‍ നല്‍കിയ വായ്പയുടെ കൃത്യമായ കണക്ക് ലഭ്യമായിട്ടില്ല. എല്ലാംകൂടി ആയിരം കോടിയിലേറെ വരുമെന്നാണ് കരുതുന്നത്. വായ്പ തുകയോ പലിശയോ കോത്താരി തിരിച്ചടച്ചിട്ടില്ല. കഴിഞ്ഞ അഞ്ച് വര്‍ഷം നടന്ന വായ്പാ തട്ടിപ്പുകളില്‍ ബാങ്കുകള്‍ക്കുണ്ടായ നഷ്ടം 61,260 കോടി രൂപയാണെന്ന് റിസര്‍വ് ബാങ്ക് ഒഫ് ഇന്ത്യ കഴിഞ്ഞാഴ്ച വ്യക്തമാക്കിയിരുന്നു. 2017 മാര്‍ച്ച് 31വരെയുള്ള കണക്ക് പ്രകാരം 8,670 വായ്പാ തട്ടിപ്പ് കേസുകളാണ് റിസര്‍വ് ബാങ്കിന്റെ റിപ്പോര്‍ട്ടിലുള്ളത്. ഒരു ലക്ഷം രൂപയക്ക് മേലുള്ള വായ്പാ തട്ടിപ്പുകള്‍ മാത്രമാണ് ഈ കണക്കിലുള്ളത്.

നീരവ് മോദിയും കുടുംബാംഗങ്ങളും 11,300 കോടി രൂപ തട്ടിപ്പ് നടത്തിയത് പുറത്തുവന്നതിന് പിന്നാലെയാണ് മറ്റ് കമ്പനികളുടെയും തട്ടിപ്പുകള്‍ പുറത്തുവരുന്നത്. രാജ്യത്തിന്റെ ചരിത്രത്തിലെ ഏറ്റവും വലിയ ബാങ്കിംഗ് തട്ടിപ്പാണ് പഞ്ചാബ് നാഷണല്‍ബാങ്കില്‍ നടന്നത്. എന്‍ഫോഴ്‌സ്‌മെന്റ് ഡയറക്ടറേറ്റിന്റെ ആവശ്യപ്രകാരം നീരവ് മോദിയുടെയും അമ്മാവനായ മെഹുല്‍ ചോക്‌സിയുടെയും പാസ്‌പോര്‍ട്ടുകള്‍ വിദേശകാര്യ മന്ത്രാലയം നാലാഴ്ചത്തേക്ക് സസ്‌പെന്‍ഡ് ചെയ്തിരിക്കുകയാണ്. രാജ്യംവിട്ട ഇവരെ കണ്ടെത്താന്‍ സി.ബി.ഐ ഇന്റര്‍പോളിനെ സമീപിച്ചിരിക്കുകയാണ്.