ഹാദിയ കേസ് ഇന്ന് സുപ്രീം കോടതിയില്... ഭര്ത്താവ് ഷെഫിനൊപ്പം ജീവിക്കണമെന്നുള്ള ഹാദിയയുടെ ആവശ്യമാണ് കോടതി പ്രധാനമായും പരിഗണിക്കുക
ഹാദിയ കേസ് ഇന്ന് വീണ്ടും സുപ്രീംകോടതിയില്. വിവാഹം റദ്ദാക്കിയ ഹൈക്കോടതി വിധി ചോദ്യം ചെയ്ത് ഷെഫിന് ജഹാന് നല്കിയ ഹര്ജിയാണ് സുപ്രീംകോടതിയുടെ പരിഗണനയിലുള്ളത്. കേസില് സുപ്രീംകോടതി കക്ഷി ചേര്ത്ത ഹാദിയ കഴിഞ്ഞ ദിവസം വിശദമായ സത്യവാങ്മൂലം സമര്പ്പിച്ചിരുന്നു.
സ്വതന്ത്രയായി ജീവിക്കാനുള്ള അവകാശം പൂര്ണ്ണമായും പുനഃസ്ഥാപിക്കണമെന്നും അനുഭവിച്ച പീഡനങ്ങള്ക്ക് നഷ്ടപരിഹാരം വേണമെന്നും ഹാദിയ നല്കിയ സത്യവാങ്മൂലത്തില് ആവശ്യപ്പെട്ടിട്ടുണ്ട്. അഭിഭാഷകനായ സയ്യദ് മര്സൂഖ് ബാഫഖി മുഖേനെ സുപ്രീംകോടതിയില് കഴിഞ്ഞ ദിവസം ഫയല് ചെയ്ത സത്യവാങ്മൂലത്തില് അച്ഛന് അശോകന്, അമ്മ, എന്ഐഎ ഉദ്യോഗസ്ഥര്, വൈക്കം ഡിവൈഎസ്പി ,രാഹുല് ഈശ്വര്, ശിവ ശക്തി യോഗ സെന്ററിലെ കൗണ്സിലര്മാര് എന്നിവര്ക്കെതിരെ ഹാദിയ ഗുരുതരമായ ആരോപണങ്ങള് ഉന്നയിച്ചിട്ടുണ്ട്.
അതേസമയം ഹാദിയയെ സിറിയയിലേക്ക് കടത്തി ഐസിസ് ഭീകരരുടെ ലൈംഗിക അടിമയാക്കുകയാണ് ഷഫിന് ജഹാന്റെയും സൈനബയുടെയും ഉദ്ദേശമെന്നാണ് അശോകന്റെ ആരോപണം. പോപ്പുലര് ഫ്രണ്ട് പ്രവര്ത്തക സൈനബയും സത്യസരണിയും ചെയ്യുന്നത് രാജ്യ വിരുദ്ധ പ്രവര്ത്തനങ്ങളാണെന്നും ചൂണ്ടിക്കാട്ടി അശോകനും കഴിഞ്ഞ ദിവസം സുപ്രീം കോടതിയില് സത്യവാങ്മൂലം ഫയല് ചെയ്തിരുന്നു.
ഹാദിയയുടെ ആരോപണങ്ങള്ക്ക് മറുപടി നല്കാന് കൂടുതല് സമയം ആവശ്യമാണെന്ന് ഇന്നലെ അശോകന്റെ അഭിഭാഷകന് കോടതിയില് ആവശ്യപ്പെട്ടെങ്കിലും, ഇന്നത്തെ വാദം നീട്ടി വയ്ക്കാനാകില്ലെന്ന് ചീഫ് ജസ്റ്റിസ് അറിയിച്ചിരുന്നു. എന്നാല് ഹാദിയയുടെ ആരോപണത്തെ കുറിച്ച് വിശദമായ സത്യവാങ്മൂലം സമര്പ്പിക്കാന് അനുവദിക്കണമെന്ന് അശോകന്റെ അഭിഭാഷകരും, എന്ഐഎയും ഇന്ന് കോടതിയില് ആവശ്യപ്പെടും എന്നാണ് സൂചന.
https://www.facebook.com/Malayalivartha
