സംസ്ഥാനത്ത് അടച്ചൂപൂട്ടിയ മദ്യഷാപ്പുകളെല്ലാം തുറക്കാന് വഴിയൊരുങ്ങി, ദേശീയ സംസ്ഥാന പാതയോരങ്ങളില് മദ്യശാലകള് പാടില്ലെന്ന വിധിയില് ഭേദഗതി വരുത്തി സുപ്രീം കോടതി
സംസ്ഥാനത്ത് അടച്ചുപൂട്ടിയ മദ്യഷാപ്പുകളെല്ലാം തുറന്നു പ്രവര്ത്തിക്കാന് വഴിയൊരുങ്ങുന്നു. ദേശീയ, സംസ്ഥാന പാതയോരങ്ങളില് മദ്യശാലകള് പാടില്ലെന്ന വിധിയില് സുപ്രീംകോടതി സുപ്രധാന ഭേദഗതി വരുത്തി. പഞ്ചായത്തുകളുടെ കാര്യത്തില് സംസ്ഥാന സര്ക്കാറിന് തീരുമാനമെടുക്കാം. പാതയോര മദ്യശാലകള് നിരോധിച്ച ഉത്തരവ് ഫലത്തില് അപ്രസക്തമായി.
മുനിസിപ്പല് മേഖലകളിലെ മദ്യശാലകള്ക്ക് സുപ്രീംകോടതി നേരത്തെ ഇളവ് അനുവദിച്ചതാണ്. നഗര സ്വഭാവമുള്ള പഞ്ചായത്തുകള്ക്ക് ഇളവു നല്കുന്ന കാര്യം സംസ്ഥാനങ്ങള്ക്ക് തീരുമാനിക്കാമെന്നാണ് ചീഫ് ജസ്റ്റിസ് ദീപക് മിശ്രയുടെ നേതൃത്വത്തിലുള്ള മൂന്നംഗ ബെഞ്ച് വിധി. അനുമതിക്ക് മദ്യക്കട ഉടമകള് സര്ക്കാറിന് അപേക്ഷ നല്കിയാല് മതി. പഞ്ചായത്തിന്റെ നഗരസ്വഭാവം പരിശോധിച്ച് അനുമതി നല്കണമോയെന്ന് നിശ്ചയിക്കേണ്ടത് സര്ക്കാറാണ്.
മദ്യഷാപ്പുകള് തുറക്കുന്ന കാര്യത്തിലാകട്ടെ, സര്ക്കാര് അനുകൂലവുമാണ്. കേരളത്തില് പഞ്ചായത്ത്/മുനിസിപ്പല് പ്രദേശമല്ലാത്ത സ്ഥലങ്ങളിലൂടെ കടന്നുപോകുന്ന ദേശീയപാതകളാകട്ടെ, വളരെ കുറവാണ്. സംസ്ഥാന, ദേശീയ പാതയോരത്ത് 500 മീറ്റര് പരിധിയില് മദ്യഷാപ്പുകള് പാടില്ലെന്നാണ് 2016 ഡിസംബര് 15ന് മൂന്നംഗ ബെഞ്ച് വിധിച്ചത്.
എന്നാല് ബാറുകള് മാത്രമല്ല, ബിയര്വൈന് പാര്ലറുകളും ഇതിന്റെ പരിധിയില്വരുമെന്ന് വ്യക്തമാക്കി 2017 മാര്ച്ച് 31ന് കൂടുതല് ശക്തമായ ഉത്തരവ് നല്കുകയും ചെയ്തു. അതായത്, മുനിസിപ്പല് മേഖലകള്ക്ക് ഇളവ് അനുവദിച്ച് 2017 ജൂലൈ 11ന് സുപ്രീംകോടതി ഉത്തരവിറക്കിയതോടെ നിരോധനത്തിന്റെ മൂര്ച്ച തേഞ്ഞു. നഗരമേഖലയിലൂടെ കടന്നുപോകുന്ന റോഡുകളുടെ ഹൈവേ പദവി ഇല്ലാതാക്കി മദ്യശാലകള്ക്ക് അനുമതിനല്കിയ ചണ്ഡിഗഢ് ഭരണകൂട നടപടി ശരിവെക്കുന്നതായിരുന്നു ആ ഉത്തരവ്.
ഇതോടെ, നഗരമേഖലയില് മദ്യശാലകള്ക്ക് അനുമതിനല്കാന് ഹൈവേകള് ഡീനോട്ടിഫൈ ചെയ്യാമെന്ന സ്ഥിതി വന്നു. നഗരമേഖലകളിലെ തിരക്കുള്ള റോഡില് അമിതവേഗത്തില് വാഹനമോടിക്കാന് പറ്റില്ലെന്ന വാദം അംഗീകരിച്ചാണ് മുനിസിപ്പല് മേഖലകള്ക്ക് ഇളവ് നല്കിയത്. ചണ്ഡിഗഢിന് നല്കിയ ഇളവ് മറ്റിടങ്ങളില് ബാധകമല്ലെന്ന് വ്യക്തമാക്കണമെന്ന കോണ്ഗ്രസ് നേതാവ് വി.എം. സുധീരന്റെ ആവശ്യം സുപ്രീംകോടതി തള്ളുകയും ചെയ്തു. പഞ്ചായത്തുകള്ക്ക് ഇളവുനല്കി വിധിയില് വ്യക്തത വരുത്തണമെന്നാവശ്യപ്പെട്ട് കേരളം, അസം തുടങ്ങിയ സംസ്ഥാനങ്ങളും ബാറുടമകളുമെല്ലാം പിന്നാലെ സുപ്രീംകോടതിയിലെത്തി. പാതയോര മദ്യശാല നിരോധനം സംസ്ഥാനത്തിന്റെ ടൂറിസം വരുമാനത്തില് ഗണ്യമായ കുറവുണ്ടാക്കിയെന്ന് കേരളം വാദിച്ചു.
കുമരകം, മൂന്നാര്, തേക്കടി, ബേക്കല് തുടങ്ങി സംസ്ഥാനത്തെ പല വിനോദസഞ്ചാര കേന്ദ്രങ്ങളും നെടുമ്പാശ്ശേരി, കരിപ്പൂര് വിമാനത്താവളങ്ങളും പഞ്ചായത്തുകളിലാണെന്നും കേരളം വാദിച്ചു. വികസനത്തിനായി പല റോഡുകളും ഹൈവേകളായി ഉയര്ത്തിയിട്ടുണ്ട്. അതിനാല് അവിടെ മദ്യശാലകള് തുടങ്ങാനാവാത്ത സാഹചര്യമാണ്. ഈ സാഹചര്യത്തില് പഞ്ചായത്തുകള്ക്ക് ഇളവുനല്കുന്നത് തീരുമാനിക്കാന് സംസ്ഥാനങ്ങള്ക്ക് അധികാരം നല്കണമെന്നും കേരളം ആവശ്യപ്പെട്ടു. അങ്ങനെസംസ്ഥാനങ്ങളുടെ വാദം സുപ്രീംകോടതി അംഗീകരിച്ചു.
https://www.facebook.com/Malayalivartha
