അന്തരിച്ച നടി ശ്രീദേവിയും ഭര്‍ത്താവ് ബോണികപൂറും തമ്മില്‍ പ്രശ്‌നങ്ങളുണ്ടായിരുന്നെന്ന് ശ്രീദേവിയുടെ സഹോദരി ശ്രീലത. ശ്രീദേവിയെ കൊന്നതാണെന്ന് സുബ്രഹ്മണ്യന്‍ സ്വാമി. മുംബയില്‍ നിന്ന് അപ്രതീക്ഷിതമായി ബോണികപൂര്‍ ദുബയിലെ ഹോട്ടലില്‍ എത്തിയതെന്തിന്. സിനിമകളെ വെല്ലുന്ന നാടകീയ മുഹൂര്‍ത്തങ്ങളാണ് നടി ശ്രീദേവിയുടെ മരണ ശേഷവും സംഭവിക്കുന്നത്. ബോണിയുമായി അഭിപ്രായ വ്യത്യാസമുണ്ടായതിനെ തുടര്‍ന്നാണ് ശ്രീദേവി തനിയ്‌ക്കൊപ്പം ദുബയില്‍ തങ്ങിയെന്നാണ് സഹോദരി പൊലീസിന് നല്‍കിയ മൊഴിയില്‍ പറയുന്നത്. മരുമകന്റെ വിവാഹ ശേഷം മുംബയ്ക്ക് മടങ്ങിയ ബോണി കപൂര്‍ സര്‍പ്രൈസ് ഡിന്നറൊരുക്കാന്‍ ദുബയില്‍ പറന്നിറങ്ങുകയായിരുന്നു എന്നാണ് അദ്ദേഹം നല്‍കിയ മൊഴി. ബോണി ശ്രീദേവിയെ കാണാന്‍ ചെല്ലുമ്പോള്‍ സഹോദരി ശ്രീലത മുറിയില്‍ ഉണ്ടായിരുന്നെന്നാണ് വിവരം. കൂടാതെ മറ്റാരെങ്കിലും ഉണ്ടോ എന്നും സംശയമുണ്ട്. ഇത് സ്ഥിരീകരിച്ചാലേ എന്താണ് യഥാര്‍ത്ഥത്തില്‍ നടന്നതെന്ന് വ്യക്തമാകൂ.

മാതൃകാ ദമ്പതിമാരെ പോലെയാണ് ബോണി കപൂറും ശ്രീദേവിയും പൊതുചടങ്ങുകളില്‍ പങ്കെടുത്തിരുന്നത്. ഇരുവരും തമ്മില്‍ എന്തെങ്കിലും അഭിപ്രായവ്യത്യാസം ഉണ്ടായിരുന്നതായി അറിവില്ല. എന്നാല്‍ ശ്രീലത ഇക്കാര്യം പറയുമ്പോള്‍ പൊലീസിന് അക്കാര്യത്തില്‍ കൂടുതല്‍ വ്യക്തത വരുത്തേണ്ടതുണ്ട്. ശ്രീദേവിയുടെ തലയില്‍ ആഴത്തില്‍ മുറിവേറ്റതായി ഫോറന്‍സിക് റിപ്പോര്‍ട്ടില്‍ പറയുന്നു. അത് എങ്ങനെ സംഭവിച്ചു എന്നത് അറിഞ്ഞാലേ മരണത്തിന് പിന്നിലെ ദുരൂഹതയുടെ ചുരുളഴിയൂ. അബോധാവസ്ഥയില്‍ വീണാലും ഇത്രയും ആഴത്തില്‍ മുറിവുണ്ടാകാന്‍ സാധ്യതയില്ലെന്ന് ഡോക്ടര്‍മാര്‍ പറയുന്നു. അതേസമയം ബോധമില്ലാതെ ബാത്ത്ടബ്ബില്‍ വീണാലും മരണം സംഭവിക്കാം. ശ്രീദേവി മദ്യപിക്കാറില്ലെന്ന് മുന്‍ എം.പി അമര്‍സിംഗ് അടക്കമുള്ള സുഹൃത്തുക്കള്‍ പറയുന്നു. പോസ്റ്റ്‌മോര്‍ട്ടം റിപ്പോര്‍ട്ടില്‍ രക്തത്തില്‍ മദ്യത്തിന്റെ അളവുണ്ടെന്നും പറയുന്നു.

ശ്രീദേവിയും ശ്രീലതയും തമ്മില്‍ ഏറെനാള്‍ പിണക്കത്തിലായിരുന്നു. ഇരുവരും കണ്ടാല്‍പ്പോലും മിണ്ടില്ലായിരുന്നു. ബോണികപൂര്‍ ഇടപെട്ടാണ് ആ പ്രശ്‌നം പരിഹരിച്ചത്. ശ്രീലത ഇപ്പോള്‍ പറയുന്നത് ബോണിയും ശ്രീദേവിയും തമ്മില്‍ അകല്‍ച്ചയിലായിരുന്നെന്നാണ്. ഇതെല്ലാം കൂട്ടിവായിക്കുമ്പോള്‍ മൊത്തത്തില്‍ ദുരൂഹതകളില്‍ നിന്ന് ദുരൂഹതകളിലേക്ക് നീങ്ങുകയാണ്. മൃതദേഹം വീണ്ടും പോസ്റ്റ്‌മോര്‍ട്ടം ചെയ്യണമെന്ന് പറയുന്നു. അതിനര്‍ത്ഥം മരണ കാരണത്തില്‍ കൂടുതല്‍ വ്യക്തത ഉണ്ടാവേണ്ടതുണ്ടെന്നാണ്.

സാധാരണ ഒന്നര മണിക്കൂര്‍ കൊണ്ട് നടപടിക്രമങ്ങള്‍ പൂര്‍ത്തിയാക്കി മൃതദേഹം എംബാം ചെയ്യാനായി ബന്ധുക്കള്‍ക്ക് വിട്ട് കൊടുക്കേണ്ടതാണ്. രണ്ട് ദിവസം കഴിഞ്ഞിട്ടും അത് ഉണ്ടാകുന്നില്ല. ബോണി കപൂറും മറ്റ് ബന്ധുക്കളും ഉള്‍പ്പെടെയുള്ളവര്‍ ദുബയ് വിടരുതെന്നും പൊലീസ് അറിയിച്ചിട്ടുണ്ട്. ഒരുപാട് സിനിമകളിലൂടെ പ്രേക്ഷകരെ ത്രില്ലടിപ്പിച്ച ശ്രീദേവിയുടെ മരണകാരണവും ഒരു സസ്‌പെന്‍സ് ആയി തുടരുന്നു... താമസിക്കാതെ യഥാര്‍ത്ഥ സംഭവം പുറത്ത് വരുമെന്ന് തന്നെയാണ് ബന്ദുക്കളുടെയും ആരാധകരുടെയും വിശ്വാസം. കാരണം ദുബയില്‍ നിയമങ്ങള്‍ കര്‍ശനമാണ്. ഏത് ഉന്നതനായാലും പിടിവീഴും.