നടി ശ്രീദേവി ദുബയിലെ ഹോട്ടലിലെ ബാത്ത് ടബ്ബില്‍ ദുരൂഹസാഹചര്യത്തില്‍ മരിച്ച സംഭവം മാധ്യമലോകമാകെ ചര്‍ച്ച ചെയ്യുകയാണ്. ഓരോരുത്തരും പുതിയ പുതിയ വിവരങ്ങളും വ്യത്യസ്തമായ ആംഗിളുകളില്‍ റിപ്പോര്‍ട്ട് ചെയ്യുകയാണ്. തെലുങ്ക് വാര്‍ത്താ ചാനലായ മഹാന്യൂസാണ് ഏറ്റവും രസകരമായ രീതിയില്‍ മരണം നടന്നത് എങ്ങനെയെന്ന രീതിയിലുള്ള ഡെമോ റിപ്പോര്‍ട്ട് ചെയ്തത്.

ഇതിനായി അവരുടെ ക്രൈംബ്യൂറോ ചീഫ് ബാത്ത് ടബ്ബില്‍ കിടന്നാണ് സംഭവങ്ങള്‍ വിവരിച്ചത്. ശ്രീദേവി ബാത്ത് ടബ്ബില്‍ കുഴഞ്ഞ് വീണതാണോ? അതോ ഇതിന് പിന്നില്‍ മറ്റെന്തെങ്കിലുമുണ്ടോ? എന്ന ചോദ്യത്തോടെയാണ് സ്‌റ്റോറി തുടങ്ങുന്നത്. ശ്രീദേവി ഉപയോഗിച്ചതെന്ന് പറയുന്ന ബാത്ത് ടബ്ബിന് മൂന്നടി ഉയരവും രണ്ടടി നീളവുമുണ്ട്. അതേ രീതിയിലുള്ള ടബ്ബിലാണ് താനും കിടക്കുന്നതെന്ന് റിപ്പോര്‍ട്ടര്‍ വ്യക്തമാക്കുന്നു.

ഇത്തരം ടബ്ബില്‍ കമഴ്ന്ന് കിടന്നാലും മുങ്ങിമരിക്കാന്‍ സാധ്യതയില്ലെന്നും പെട്ടെന്ന് പുറത്തേക്ക് ചാടാമെന്നും റിപ്പോര്‍ട്ടര്‍ അന്വേഷണത്തിലൂടെ കണ്ടെത്തുന്നു. ആരെങ്കിലും ശ്രീദേവിയെ മുക്കിക്കൊല്ലാനുള്ള സാധ്യതയും റിപ്പോര്‍ട്ടര്‍ തള്ളിക്കളയുന്നില്ല. ശ്രീദേവിയെ അപമാനിക്കുന്ന തരത്തിലുള്ള റിപ്പോര്‍ട്ടിംഗാണിതെന്ന ആക്ഷേപം ഉയര്‍ന്നിട്ടുണ്ട്. ശ്രീദേവിയെ സ്‌നേഹിക്കുന്നവരുടെ വികാരങ്ങളെ വ്രണപ്പെടുത്തുന്ന ഇത്തരം കോപ്രായങ്ങള്‍ റേറ്റിംഗ് കൂട്ടാനും യുട്യൂബ് ഹിറ്റ്‌സ് വര്‍ദ്ധിപ്പിക്കാനുമുള്ള തന്ത്രമാണെന്നും ആരോപണമുണ്ട്.

54 വയസിലും ആരോഗ്യവതിയായി, സുന്ദരിയായി കഴിഞ്ഞിരുന്ന ശ്രീദേവിയെ ആരോ ബലമായി മുക്കിക്കൊന്നതാണ് എന്ന തരത്തില്‍ പല ഇന്ത്യന്‍ മാധ്യമങ്ങളും റിപ്പോര്‍ട്ട് ചെയ്തിട്ടുണ്ട്. ഇന്ത്യന്‍ മാധ്യമങ്ങള്‍ വിവരങ്ങള്‍ നല്‍കുന്നതിന് പകരം നടന്നതെന്തെന്ന് പ്രഖ്യാപിക്കുകയാണെന്ന് ഖലീല്‍ ടൈംസിലെ മുതിര്‍ന്ന മാധ്യമപ്രവര്‍ത്തകന്‍ ചൂണ്ടിക്കാട്ടി.