രാജ്യത്തെ പ്രതിരോധമേഖലയെ ശക്തിപ്പെടുത്തുന്നതിനായി 9,435 കോടിയുടെ ആയുധ ഉപകരണങ്ങള്‍ കരസ്ഥമാക്കുന്നു. പ്രതിരോധമന്ത്രി നിര്‍മ്മല സീതാരാമന്‍ അധ്യക്ഷയായ പ്രതിരോധ സാമ്പത്തിക സമിതിയാണ് ഇത്രയും വലിയ ആയുധ ശേഖരണ പദ്ധതിക്ക് അനുമതി നല്‍കിയത്.
കര, നാവിക, വ്യോമ വിഭാഗത്തിനു പുറമെ തീരസംരക്ഷണ സേനയ്ക്കും (കോസ്റ്റ് ഗാര്‍ഡ്) ഇതിന്റെ ഗുണം ലഭിക്കും.
പദ്ധതി പ്രകാരം 41,000 ലൈറ്റ് മെഷീന്‍ ഗണ്ണുകള്‍, 3.5 ലക്ഷം ക്ലോസ് ക്വാര്‍ട്ടര്‍ യുദ്ധ കാര്‍ബൈനുകള്‍ എന്നിവയാണ് വാങ്ങുന്നത്. ഇവയ്ക്ക് യഥാക്രമം 4,607 , 3000 കോടി രൂപ ചെലവാകും. യുദ്ധസമയത്ത് സൈനികന് അത്യാവശ്യം വേണ്ടി വരുന്ന ആയുധങ്ങളാണ് ഇവ, അതിനാല്‍ യുദ്ധസാഹചര്യത്തില്‍ ഇവയുടെ ഉപയോഗം മൂലം സൈനികര്‍ക്ക് കൂടുതല്‍ ശക്തമായ തരത്തില്‍ നിലയുറപ്പിക്കാന്‍ സാധിക്കുമെന്ന് പ്രതിരോധമന്ത്രാലയം വാര്‍ത്ത കുറിപ്പില്‍ അറിയിച്ചിട്ടുണ്ട്.

ആയുധങ്ങള്‍ക്ക് പുറമെ കര, വ്യോമ സേനകള്‍ക്കായി 'ഹൈ കപ്പാസിറ്റി റേഡിയോ റിലേ (എച്ച്‌സിആര്‍ആര്‍) സംവിധാനങ്ങള്‍ കരസ്ഥമാക്കുന്നതിന് 1,092 കോടി രൂപയും മുടക്കും. സേനവിഭാഗങ്ങള്‍ക്ക് തമ്മില്‍ മികച്ച തരത്തില്‍ ആശയ വിനിമയം നടത്തുന്നതിന് ഉതകുന്നതാണ് ഉയര്‍ന്ന ബാന്‍ഡ്‌വിത്ത് ശേഷിയുള്ള ഈ സംവിധാനം. തീരസംരക്ഷണത്തിനും മലിനീകരണം നിയന്ത്രിക്കുന്നതിനുമായി കോസ്റ്റ് ഗാര്‍ഡിന് മലിനീകരണം നിയന്ത്രിക്കുന്നതിനുള്ള രണ്ട് കപ്പലുകളും വാങ്ങുന്നുണ്ട്. 673 കോടി ചെലവില്‍ രണ്ടു കപ്പലുകളും ഇന്ത്യന്‍ ഷിപ്പ്‌യാര്‍ഡാണ് നിര്‍മ്മിക്കുന്നത്.
സമുദ്രത്തില്‍ നിരീക്ഷണം നടത്തുന്നതിനും തീപിടുത്തം, രക്ഷപ്പെടുത്തല്‍ തുടങ്ങിയവയ്ക്ക് അനുയോജ്യമായ കപ്പലുകളാണ് ഇവയെന്നും പ്രതിരോധമന്ത്രാലയം വ്യക്തമാക്കി.