അധികാരമില്ലെങ്കിലും ത്രിപുരയിലെ സാധാരണ ജനങ്ങള്‍ക്കൊപ്പം ഉണ്ടാകുമെന്ന് സി.പി.എം നേതാവും മുന്‍ മുഖ്യമന്ത്രിയുമായ മാണിക് സര്‍ക്കാര്‍. രാജിവെച്ച ശേഷം മാധ്യമങ്ങളോട് പ്രതികരിക്കുകയായിരുന്നു അദ്ദേഹം. തോല്‍വിയുടെ കാരണം വിശദമായി പഠിക്കും. അതിന് ശേഷം കാര്യങ്ങള്‍ തീരുമാനിക്കും. തോല്‍വിയിലും സൗമ്യത കൈവിടാതെ മുന്‍മുഖ്യമന്ത്രി പറഞ്ഞു. താഴേത്തട്ടിലുള്ളവരുടെ പ്രശ്‌നങ്ങള്‍ മുന്‍നിര്‍ത്തിയായിരിക്കും പ്രവര്‍ത്തനം. സാധാരണക്കാര്‍ക്ക് സ്വന്തം കാലില്‍ നില്‍ക്കാനുള്ള എല്ലാ പിന്തുണയും നല്‍കും. നിയമസഭയിലും പുറത്തും അവര്‍ക്കായി പ്രവര്‍ത്തിക്കുമെന്നും വ്യക്തമാക്കി.

ഇലക്‌ട്രോണിക് വോട്ടിങ് മെഷീനിലെ തിരിമറിയെക്കുറിച്ചുള്ള ആക്ഷേപങ്ങളെ കുറിച്ച് ചോദിച്ചപ്പോള്‍ പ്രതികരിക്കാനില്ലെന്ന് പറഞ്ഞു. ബിജെപി പണവും സ്വാധീനവും ഉപയോഗിച്ച് ആളുകളെ വശത്താക്കിയെന്നും ഗുണ്ടാ സംഘങ്ങളെയും മറ്റും ഉപയോഗിച്ചാണ് തെരഞ്ഞെടുപ്പില്‍ വിജയം നേടിയതെന്നും പറഞ്ഞു. 60 അംഗ നിയമസഭയിലെ 59 സീറ്റുകളിലേക്കുള്ള തിരഞ്ഞെടുപ്പില്‍ ബിജെപി സഖ്യം 43 സീറ്റുകള്‍ നേടി. സിപിഎം 16ഉം. കാല്‍നൂറ്റാണ്ടോളം ഭരണം നടത്തിയിരുന്ന സി.പി.എം ഇനി പ്രതിപക്ഷത്തിരിക്കും.