ലോയയുടെ ദുരൂഹമരണത്തില്‍ ഏതെങ്കിലും രീതിയിലുള്ള ചെറിയ സംശയമെങ്കിലും ഉണ്ടെങ്കില്‍ അന്വേഷണത്തിന് ഉത്തരവിടുമെന്ന് സുപ്രീംകോടതി
ബി.ജെ.പി അദ്ധ്യക്ഷന്‍ അമിത് ഷാ പ്രതിയായ സൊഹ്‌റാബുദ്ദിന്‍ ഷെയ്ഖ് വ്യാജ ഏറ്റുമുട്ടല്‍ കേസിന്റെ വിചാരണ കേട്ടിരുന്ന സി.ബി.ഐ പ്രത്യേക കോടതി ജഡ്ജി ബി.എച്ച്.ലോയയുടെ ദുരൂഹമരണത്തില്‍ ഏതെങ്കിലും രീതിയിലുള്ള ചെറിയ സംശയമെങ്കിലും ഉണ്ടെങ്കില്‍ അന്വേഷണത്തിന് ഉത്തരവിടുമെന്ന് സുപ്രീംകോടതി വ്യക്തമാക്കി.
സംശയങ്ങളുണ്ടെങ്കില്‍ അത് ദുരീകരിക്കാന്‍ സ്വതന്ത്രമായ അന്വേഷണത്തിന് ഉത്തരവിടുമെന്ന് ചീഫ് ജസ്റ്റിസ് ദീപക് മിശ്ര അദ്ധ്യക്ഷനായ ബെഞ്ച് നിരീക്ഷിച്ചു. ലോയയുടെ മരണം ഹൃദയാഘാതത്തെ തുടര്‍ന്നല്ലെന്ന രാജ്യത്തെ പ്രമുഖ ഫോറന്‍സിക് വിദഗ്ദന്റെ വിലയിരുത്തലിന്റെ അടിസ്ഥാനത്തില്‍ കേസില്‍ പ്രത്യേക അന്വേഷണം ആവശ്യപ്പെട്ട് സെന്റര്‍ ഫോര്‍ പബ്‌ളിക് ഇന്‍ട്രസ്റ്റ് ലിറ്റിഗേഷന്‍ അഡ്വ.പ്രശാന്ത് ഭൂഷന്‍ മുഖേന നല്‍കിയ ഹര്‍ജിയും പരിഗണിക്കുമെന്ന് കോടതി വ്യക്തമാക്കി.
ലോയയുടെ ഇ.സി.ജി റിപ്പോര്‍ട്ടുകളുടെ അടിസ്ഥാനത്തിലാണ് മരണം ഹൃദയാഘാതം മൂലമല്ലെന്ന് എയിംസ് ആശുപത്രിയിലെ ഫോറന്‍സിക് വിഭാഗം മുന്‍ മേധാവി ഡോ. ആര്‍.കെ.ശര്‍മ്മ വിലയിരുത്തിയിരുന്നു. ഈ റിപ്പോര്‍ട്ടിന്റെ പകര്‍പ്പ് സഹിതമാണ് പ്രശാന്ത് ഭൂഷന്റെ ഹര്‍ജി. സൊഹ്‌റാബുദ്ദിന്‍ ഷെയ്ഖ് കേസില്‍ സത്യസന്ധത പുലര്‍ത്താന്‍ ശ്രമിച്ച ന്യായാധിപന്‍മാരായ ജസ്റ്റിസ് ജയന്ത് പട്ടേലും ജഡ്ജി ലോയയും അതിന്റെ വില കൊടുക്കേണ്ടി വന്നവരാണെന്ന് മുതിര്‍ന്ന അഭിഭാഷകന്‍ ദുഷ്യന്ത് ദവേയുടെ വാദം കോടതിക്കുള്ളില്‍ അഭിഭാഷകര്‍ക്കിടയില്‍ വാഗ്വാദത്തിന് ഇടയാക്കി.
സൊഹ്‌റാബുദ്ദിന്‍ ഷെയ്ഖ് കേസില്‍ സി.ബി.ഐ അന്വേഷണം പ്രഖ്യാപിച്ച ഗുജറാത്ത് ഹൈക്കോടതി ജഡ്ജിയായിരുന്ന ജസ റ്റിസ് ജയന്ത് പട്ടേലിന് അര്‍ഹമായ സ്ഥാനക്കയറ്റം ലഭിച്ചിരുന്നില്ല. ഇതേ തുടര്‍ന്ന് അദ്ദേഹം പദവി രാജിവച്ചിരുന്നു. ജഡ്ജി ലോയയുടെ മരണത്തില്‍ ദുരൂഹതയില്ലെന്ന് സ്ഥാപിക്കാന്‍ ബോംബെ ഹൈക്കോടതിയിലെ ചില സിറ്റിംഗ് ജഡ്ജിമാര്‍ അഭിമുഖങ്ങള്‍ നല്‍കിയതും ദവേ ചൂണ്ടിക്കാട്ടി.
അതേസമയം, ജഡ്ജിമാരെ അധിക്ഷേപിക്കുന്ന പരാമര്‍ശങ്ങള്‍ തള്ളിക്കളയാനാവില്ലെന്ന് മഹാരാഷ്ട്ര സര്‍ക്കാരിന് വേണ്ടി ഹാജരായ അഡീഷണല്‍ സോളിസിറ്റര്‍ ജനറല്‍ തുഷാര്‍ മേത്ത പറഞ്ഞു. ഒന്നും തള്ളിക്കളയില്ലെന്ന് വ്യക്തമാക്കിയ കോടതി, കൃത്യമായ തെളിവുകളുടെ അഭാവത്തില്‍ ജഡ്ജിമാരെ ബാധിക്കുന്ന ഉത്തരവ് പുറപ്പെടുവിക്കാന്‍ സാധിക്കില്ലെന്ന് നിരീക്ഷിച്ചു.
https://www.facebook.com/Malayalivartha
