തെക്കന്‍ കാഷ്മീരിലെ ഷോപിയാനില്‍ സുരക്ഷാസേനയും ഭീകരരും തമ്മിലുണ്ടായ ഏറ്റുമുട്ടലില്‍ കൊല്ലപ്പെട്ടവരില്‍ നാല് പേര്‍ സാധാരണക്കാരായിരുന്നുവെന്ന് ജമ്മു കാഷ്മീര്‍ മുഖ്യമന്ത്രി മെഹ്ബൂബ മുഫ്തി. ഷോപിയാനിലെ വെടിവയ്പ്പില്‍ സാധാരണക്കാര്‍ കൊല്ലപ്പെട്ടതില്‍ അഗാധമായ ദുഃഖം രേഖപ്പെടുത്തുന്നു. മരിച്ചവരുടെ ബന്ധുക്കളോടുള്ള അനുശോചനം അറിയിക്കുന്നതായും ഇത്തരം നടപടികളില്‍ ആശങ്കയുണ്ടെന്നും മുഖ്യമന്ത്രി പറഞ്ഞു. ഞായറാഴ്ച രാത്രി ഷോപിയാനിലെ ബൈല്‍ വെഹിക്കിള്‍ ചെക്‌പോസ്റ്റില്‍ പരിശോധനയ്ക്കിടെ നിര്‍ത്താതെ പോയ രണ്ട് വാഹനങ്ങളിലുണ്ടായിരുന്നവരാണ് കൊല്ലപ്പെട്ടത്.

സൈന്യം ഇവരെ പിന്തുടര്‍ന്നതോടെ ഇവര്‍ പ്രത്യാക്രമണം തുടങ്ങി. സൈന്യത്തിന്റെ ശക്തമായ തിരിച്ചടിയില്‍ ആറുപേര്‍ കൊല്ലപ്പെടുകയും ചെയ്തു. തീവ്രവാദികളുടെ പക്കല്‍ നിന്ന് ആയുധങ്ങളും സൈന്യം കണ്ടെടുത്തിരുന്നു. ലഷ്‌കര്‍ ഇ തൊയിബ ഭീകരരായ അഷിഖ് ഹുസൈന്‍, അമിര്‍ അഹമ്മദ് മാലിക്ക് എന്നിവരും ഭീകരര്‍ക്കുവേണ്ടി രഹസ്യമായി പ്രവര്‍ത്തിക്കുന്ന നാല് പേരുമാണ് കൊല്ലപ്പെട്ടതെന്നായിരുന്നു സൈന്യത്തിന്റെ വിശദീകരണം.

എന്നാല്‍ കൊല്ലപ്പെട്ട രണ്ട് പേര്‍ ഭീകരരാണെന്ന് തിരിച്ചറിഞ്ഞിട്ടുണ്ടെന്നും മറ്റ് നാല് പേരെ കുറിച്ച് അന്വേഷണം നടക്കുകയാണെന്നും പോലീസ് അറിയിച്ചിരുന്നു. നാല് പേര്‍ സാധാരണക്കാരാണെന്ന് പറഞ്ഞ് ഇവരുടെ കുടുംബാംഗങ്ങളും പ്രദേശവാസികളും രംഗത്തെത്തിയിരുന്നു.