ആഢംബര ബസിനുള്ളില്‍ വച്ച്‌ ജീവനക്കാരന്‍ മൂന്ന് വയസുകാരിയെ ലൈംഗികമായി പീഡിപ്പിച്ചതായി പരാതി. കൊല്‍ക്കത്തയിലെ വെസ്റ്റ് കനാല്‍ റോഡില്‍ കഴിഞ്ഞ ദിവസമാണ് സംഭവമുണ്ടായതെന്ന് പൊലീസ് ഉദ്യോഗസ്ഥര്‍ വ്യക്തമാക്കി. സംഭവവുമായി ബന്ധപ്പെട്ട് 45കാരനായ ഷെയ്ക് മുന്ന എന്ന ബസ് ക്ലീനറെ അറസ്റ്റ് ചെയ്തതായും പൊലീസ് വ്യക്തമാക്കി. പീഡനത്തിന് ഇരയായ പെണ്‍കുട്ടിയെ ഗുരുതര പരിക്കുകളോടെ ആര്‍.ജി കര്‍ മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചിരിക്കുകയാണ്.

കഴിഞ്ഞ ദിവസം രാത്രിയാണ് അഞ്ച് വയസുകാരനായ സഹോദരനൊപ്പം കളിച്ച്‌ കൊണ്ടിരുന്ന പെണ്‍കുട്ടിയെ പ്രതി ബലാത്കാരമായി തട്ടിക്കൊണ്ട് പോയി ബസിനകത്ത് വച്ച്‌ പീഡിപ്പിച്ചത്. ചോക്ലേറ്റ് വാങ്ങി നല്‍കാമെന്ന് പ്രലോഭിപ്പിച്ചാണ് പ്രതി കുട്ടിയെ അടുത്ത് വിളിച്ചത്. തന്റെ സഹോദരിയെ വെറുതെ വിടണമെന്ന് ആവശ്യപ്പെട്ട് സഹോദരന്‍ ബഹളമുണ്ടാക്കിയെങ്കിലും പ്രതി പിന്മാറിയില്ല. അലറിക്കരയുന്ന പെണ്‍കുട്ടിയെ മോചിപ്പിക്കണമെന്ന് ആവശ്യപ്പെട്ട് സഹോദരന്‍ ബസിന്റെ വാതിലില്‍ മുട്ടി അപേക്ഷിച്ചെങ്കിലും പ്രതി ചെവിക്കൊണ്ടില്ല. തുടര്‍ന്ന് കരഞ്ഞ് കൊണ്ട് സഹോദരന്‍ തന്റെ അമ്മയെ വിവരം അറിയിച്ചു.

അമ്മയുടെ ആവശ്യപ്രകാരം സ്ഥലത്തെത്തിയ നാട്ടുകാരാണ് പ്രതിയുടെ പിടിയില്‍ നിന്നും പെണ്‍കുട്ടിയെ മോചിപ്പിച്ചത്. തുടര്‍ന്ന് നാട്ടുകാര്‍ നല്ല രീതിയില്‍ കൈകാര്യം ചെയ്ത ശേഷമാണ് പ്രതിയെ പൊലീസില്‍ ഏല്‍പ്പിച്ചത്. തങ്ങള്‍ ചെല്ലുമ്ബോള്‍ ചോരയില്‍ കുളിച്ച്‌ കിടക്കുകയായിരുന്നു കുട്ടിയെന്ന് നാട്ടുകാരില്‍ ഒരാള്‍ പൊലീസില്‍ മൊഴി നല്‍കിയിട്ടുണ്ട്. അറസ്റ്റ് ചെയ്യുമ്ബോള്‍ പ്രതിയുടെ കൈയിലും വസ്ത്രത്തിലും പെണ്‍കുട്ടിയുടെ രക്തമുണ്ടായിരുന്നതായി പൊലീസ് വൃത്തങ്ങള്‍ പറഞ്ഞു. എന്നാല്‍ പെണ്‍കുട്ടി പീഡനത്തിന് ഇരയായോ എന്ന് മെഡിക്കല്‍ പരിശോധനയുടെ റിസള്‍ട്ട് വന്നതിന് ശേഷമേ സ്ഥിരീകരിക്കാനാവൂ എന്നും അവര്‍ വ്യക്തമാക്കി.